ឆេះឃ្លាំងស្តុកទំនិញ ដែលមានម្ចាស់ជាជនជាតិរៀតណាម បណ្តាលមកឆ្លងចរន្តអគ្គីសនី
ភ្នំពេញ៖ អធិការដ្ឋាននគរបាលខណ្ឌច្បារអំពៅ បានឲ្យដឹងថា នៅថ្ងៃពុធ ទី១៦ ខែតុលា ឆ្នាំ២០១៩ ត្រង់ចំណុចក្នុង បុរីស៊ីធីហោ ឃ្លាំងគ្មានលេខ ផ្លូវលេខ៦១២ ក្រុម ១ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ មានករណីអគ្គីភ័យឆេះឃ្លាំង សង់អំពីដែកប្រក់ដំបូលនឹងជញ្ជាំង សង្ក័សីទាំងអស់ ដែលមានទំហំបណ្តោយម៉ែត្រ ៤០មែត្រ ទទឹង ៣០ម៉ែត្រ។
សមត្ថកិច្ចបានបន្ដទៀតថា មុនពេលកើតហេតុប្រជាពលរដ្ឋនៅក្បែរកន្លែងកើតហេតុ បានឃើញផ្សែងហ៊ុយចេញ ពីក្នុងឃ្លាំងរួចបង្កជាអគ្គិភ័យឆាបឆេះយ៉ាងយ៉ាងសន្ធោសន្ធៅ ទើបបង្កការភ្ញាក់ផ្អើលប្រជាពលរដ្ឋនៅក្បែរ កន្លែងកើតហេតុបាន រាយការណ៍ទៅសមត្ថកិច្ច និង រថយន្តពន្លត់អគ្គីភ័យ ចុះមកជួយបាញ់ពន្លត់ភ្លាមៗ ។
ម្ចាស់ឃ្លាំងឈ្មោះ គង់ រដ្ឋ ភេទប្រុស អាយុ៤៣ឆ្នាំ ជនជាតិវៀតណាម មុខរបរ លក់ដូរ ស្នាក់នៅកន្លែងកើតហេតុខាងលើ។ ឃ្លាំងនេះ ជួលពីម្ចាស់បុរីឈ្មោះ ជៀង ញឹម ភេទប្រុស អាយុ ៥៦ឆ្នាំ ផ្ទះលេខ ១២៧ ផ្លូវ៦១២ ក្រុម១ ភូមិដើមស្លែង សង្កាត់ច្បារអំពៅ២ ច្បារអំពៅ។ ការខូចខាត ឆេះអស់ចំនួន២ឃ្លាំង រួមទាំងទំនិញដែលស្តុក មិនបណ្តាលឲ្យរបួសស្នាមស្លាប់អ្វីទេ
។ អគ្គិភ័យបង្កឡើងដោយមូលហេតុបណ្តាលមកឆ្លងចរន្តអគ្គីសនី។ ប្រតិបត្តិការនេះ បានប្រើប្រាស់រថយន្តពន្លត់អគ្គីភ័យជួយអន្តរាគមន៍ សរុប១៤គ្រឿង ក្នុងនោះមាន: រថយន្តពន្លត់អគ្គីភ័យរបស់ក្រសួងមហាផ្ទៃចំនួន ៣ គ្រឿង។ រថយន្តពន្លត់អគ្គីភ័យរបស់ស្នងការនគរបាលរាជធានីភ្នំពេញចំនួន ៩គ្រឿង។ រថយន្តពន្លត់អគ្គីភ័យរបស់សាលាខណ្ឌ ១គ្រឿង។ រថយន្តពន្លត់អគ្គីភ័យរបស់បុរី ប៉េងហួត ១គ្រឿង។ ប្រើប្រាស់ទឹកចំនួន ២៤រថយន្ត ស្មើរនឹង ៩៤ម៉ែត្រគីប។
ការជួយអន្តរាគមន៍ពីរថយន្តពន្លត់អគ្គីភ័យ រលត់ទាំងស្រុងនៅវេលាម៉ោង១៥និង១៥នាទី នាថ្ងៃខែឆ្នាំដដែល៕
