ឃាតកម្មសម្លាប់ស្រ្តីម្នាក់នៅក្នុងចំការ ស្រុកព្រែកប្រសព្វ
ក្រចេះ៖ ករណីឃាតកម្មសម្លាប់ស្រ្តីម្នាក់ ប្រហែលកើតឡើងនៅរសៀលម្សិលមិញ តែទើបត្រូវបានគេប្រទះឃើញនៅព្រឹកនេះ។ សពស្រ្តីម្នាក់ត្រូវបានគេប្រទះឃើញដេកស្លាប់ក្នុងចំការ កាលពីព្រឹកថ្ងៃទី១៣ ខែធ្នូ ឆ្នាំ២០១៩ នៅចំណុចវាលក្បូន ភូមិរការធំ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។ ចំណែកសមត្ថកិច្ចកំពុងស្រាវជ្រាវរកឃាតករ ដើម្បីផ្តន្ទាទោសចាប់ច្បាប់។
លោក ចាន់ សុផល្លា អធិការនគរបាលស្រុកព្រែកប្រសព្វ បានឲ្យដឹងថា ករណីឃាតកម្មសម្លាប់ស្រ្តីម្នាក់នោះ ប្រហែលកើតឡើងនៅរសៀលម្សិលមិញ តែទើបត្រូវបានគេប្រទះឃើញនៅព្រឹនេះ។ ស្រ្តីរងគ្រោះឈ្មោះ ឈុំ ណៃស៊ីម អាយុ៣៩ឆ្នាំ មានប្ដីមានកូនម្នាក់ រស់នៅភូមិឃុំកើតហេតុ។
កាលពីថ្ងៃទី១២ ខែធ្នូ ឆ្នាំ២០១៩ មានក្មេងស្រីម្នាក់ឈ្មោះ ថៃ វ៉ារី អាយុ៦ឆ្នាំ បានទៅប្រាប់ឈ្មោះ ឈាន លឹមហ៊ួ អាយុ៤៧ឆ្នាំ ត្រូវជាអ៊ំបង្កើតថា ឪពុកខ្លួន ប៊ុន ផេង ទៅដឹកអុសឡ ខណៈម្តាយដឹកគោទៅក្រោយផ្ទះ តែមិនឃើញត្រឡប់មកវិញ ក៏ចាប់អារម្មណ៍រហូតដល់ម៉ោងប្រហែល ៦ល្ងាច រួចនាំគ្នាដើរកតែរកមិនឃើញ លុះដល់ព្រឹកថ្ងៃទី១៣ ខែធ្នូ ឆ្នាំ២០១៩ ក៏ប្រទះឃើញសពជនរងគ្រោះ ដេកស្លាប់ក្នុងព្រៃមានស្ពាយកាបូប នៅខាងក្រោយផ្ទះប្រហែលជា ១៥០ម៉ែត្រ។
តាមការពិនិត្យសាកសព ឃើញមានស្នាមវាយនិងវត្ថុរឹង ដែលមានស្លាកស្នាមជាំថ្គាមសងខាង ចង្កា បែកមាត់ បាក់ធ្មេញលើចំនួន៣ ដាច់ទងត្រចៀកខាងឆ្វេង និងស្នាមជាំដើមទ្រូង។ ក្រោយពីការពិនិត្យពីមន្រ្តីជំនាញ បានប្រគល់សពស្រ្តីរងគ្រោះ ឲ្យសាច់ញាតិទៅធ្វើបុណ្យតាមប្រពៃណី៕
