អភិបាលខេត្តព្រះសីហនុ ចុះពិនិត្យ និង ពន្លឿនការស្ថាបនាផ្លូវ ដាក់ប្រព័ន្ធលូ នៅតាមផ្លូវឆ្នេរអូរត្រេះ ការសម្អាតឆ្នេរអូរឈើទាល២ ដេីម្បីត្រៀមទទួលភ្ញៀវទេសចរណ៍
ខេត្តព្រះសីហនុ ៖ ក្រៅម៉ោងរដ្ឋបាល កាលពីល្ងាចនាចុងសប្តាហ៍ ថ្ងៃទី២៣ ខែមករា ឆ្នាំ២០២០នេះ លោក គួច ចំរើនអភិបាលខេត្តព្រះសីហនុបានអញ្ជើញចុះពិនិត្យ ពន្លឿនការស្ថាបនាផ្លូវ និងការរៀបចំដាក់ប្រព័ន្ធលូទឹកស្អុយ ទឹកភ្លៀង តាមបណ្តោយផ្លូវឆ្នេរអូរត្រេះ ព្រមទាំងពិនិត្យការសម្អាតឆ្នេរអូរឈើទាល២ “អតីតឆ្នេរអារីស្តុន” និងឆ្នេរអូរត្រេះ ដេីម្បីត្រៀមទទួលភ្ញៀវទេសចរណ៍មកលេងកំសាន្តនាថ្ងៃខាងមុខនេះ ពិសេសនៅក្នុងឱកាសបុណ្យចូលឆ្នាំថ្មីប្រពៃណីចិន វៀតណាមនេះ។
លោកគួច ចំរើន បានស្នើសូមអោយប្រជាពលរដ្ឋដែលមកកំសាន្ត តាមបណ្តាឆ្នេរទាំងអស់ មេត្តារក្សាអនាម័យ និងទុកដាក់សម្រាមអោយមានសណ្តាប់ធ្នាប់។ ឆ្នេរស្អាត អនាម័យបរិស្ថានល្អ មានផាសុខភាព និងទាក់ទាញភ្ញៀវទេសចរណ៍។
ចាប់ពីម៉ោងនេះតទៅ ឆ្នេរអូរឈើទាល២ ” អតីតឆ្នេរអារីស្តុន ” និងឆ្នេរអូរត្រេះ នឹងត្រូវបានរៀបចំជាឆ្នេរ សមុទ្រសាធារណៈ និងជាសម្បត្តិរួម របស់ប្រជា ពលរដ្ឋខ្មែរទូទៅ ក៏ដូចជាភ្ញៀវទេសចរ ជាតិ និងអន្តរជាតិអាចមកកំសាន្តដោយសេរី ដោយមិនមានបង់ថ្លៃអ្វីឡើយ។ ឆ្នេរស្អាត អនាម័យបរិស្ថានល្អ មានផាសុខភាព។
គួរបញ្ជាក់ថា កន្លងមកនេះរដ្ឋបាលខេត្ត បានចេញ លិខិតជូនដំណឹងលេខ៤៧៣/១៩ សជណ ចុះថ្ងៃទី៤ ខែធ្នូ ឆ្នាំ ២០១៩ ជូនដល់បងប្អូនប្រជាពលរដ្ឋ ដែលកំពុងលក់ដូរ និងអាស្រ័យផល នៅលើឆ្នេរអូរឈើទាល “អតីតឆ្នេរអារីស្តុន “ និងឆ្នេរអូរត្រេះ មានទីតាំងស្ថិត នៅភូមិ៤ និងភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ ។ បន្ទាប់ពីទទួលបានបានសេចក្តីជូនដំណឹង របស់រដ្ឋបាលខេត្តព្រះសីហនុរួចមក បងប្អូនប្រជាពលរដ្ឋដែលកំពុងលក់ដូរនៅនៅលើឆ្នេរអូរឈើទាល “ អតីតឆ្នេរអារីស្តុន “ បានចូលរួមសហការជាមួយអាជ្ញាធរ ដោយបានធ្វើការរុះរើតូប និងស្តង់លក់ដូរ របស់ខ្លួនសរុបទាំងអស់ មានចំនួន ១២៦តូប បានរៀបរយជាស្ថាពរព្រមទាំងបានចូល រួមធ្វើការសម្អាតឆ្នេរខ្សាច់វិលមករកសភាពស្រស់ស្អាតឡើងវិញ។ ដោយឡែកចំពោះបងប្អូនប្រជា ពលរដ្ឋ ដែលលក់ដូរនៅលើឆ្នេរអូរត្រេះ” អូរត្រេះ១ មានចំនួន ១០៨តូបស្តង់ និងអូរត្រេះ២ មានចំនួន ៤៨តូបស្តង់” បានរុះរើរួចរាល់ជាស្ថាពរ។
រដ្ឋបាលខេត្តព្រះសីហនុ សូមកោតសរសេីរ និងថ្លែង អំណរគុណដ៏ជ្រាលជ្រៅបំផុតដល់បងប្អូនប្រជា ពលរដ្ឋ ដែលមានការយល់ដឹងអំពីប្រយោជន៍សាធារណៈ និងបានចូលរួមសហការក្នុងការរៀបចំសណ្ដាប់ធ្នាប់ របៀបរៀបរយ និងកែលម្អ សោភ័ណ ភាពឆ្នេររបស់យើងឡើងវិញ។
សូមបញ្ជាក់ផងដែរថា សំណង់តូបស្តង់របស់បងប្អូនប្រជាពលរដ្ឋ ដែលបានសាងសង់នៅលើឆ្នេរអូរត្រេះភាគច្រើនជាសំណង់រឹងមាំ ដែលបានចាក់សាប បេតុងនៅលើឆ្នេរខ្សាច់ដោយផ្ទាល់ និងមានមួយ ចំនួន សង់ជាប់មាត់ទឹកតែម្តង ក្នុងនោះផងដែរ បន្ទាប់ពីធ្វើការរុះរើតូបស្តង់ទាំងនោះរួច គឺយើងប្រទះឃើញនូវលូស្តុកលាមក និងសំណល់ផ្ទះបាយ ចំនួន១៣៦លូ ដែលបានបង្កប់ក្នុងឆ្នេរខ្សាច់ផងដែរ។ ជាចុងក្រោយរដ្ឋបាលខេត្តសូមបញ្ជាក់ថា ការរុះរើតូបនិងស្តង់លក់ដូរនៅលេីឆ្នេរអូរឈេីទាលពីរ និងឆ្នេរអូរត្រេះនេះគឺមិនមែនយកដីទៅឱ្យក្រុមហ៊ុន ឬអង្គភាព អាជីវកម្មឯកជន ណាមួយធ្វើការវិនិយោគនោះឡើយ គឺដើម្បីរៀបចំសណ្ដាប់ធ្នាប់ របៀប រៀប រយ និងកែលម្អ សោភ័ណភាពឆ្នេររបស់យើងឡើង វិញ ដោយរក្សាទុកជាឆ្នេរ សាធារណៈ និងជាសម្បត្តិរួមរបស់ប្រជាពលរដ្ឋខ្មែរទូទៅ ក៏ដូចជាភ្ញៀវទេសចរជាតិ និងអន្តរជាតិ អាចមកកំសាន្តដោយសេរី ឥត មានបង់ថ្លៃអ្វីឡេីយ។ សូមបងប្អូនប្រជាពលរដ្ឋយើង មេត្តាចូលរួមសហការគាំទ្រ និងផ្តល់ជាកម្លាំងចិត្តដល់ក្រុមការងារ រដ្ឋបាលខេត្តព្រះសីហនុឱ្យដំណើរ ការរៀបចំនេះប្រព្រឹត្តទៅដោយជោគជ័យ៕