សមិទ្ធផលដ៏ធំធេងបំផុត នៃចលនាអប់រំយល់ដឹង ពីគ្រោះថ្នាក់ដោយសារមីននៅកម្ពុជា
ភ្នំពេញ៖លោកហេងរតនាអគ្គនាយកស៊ីម៉ាក់កាលពីពេលថ្មីៗនេះបានថ្លែងសារលើផេកហ្វេសប៊ុកថាឆ្នាំ១៩៩៤ ចលនាសកម្មភាពអប់រំយល់ដឹងពីគ្រោះថ្នាក់ដោយសារមីនត្រូវបានបង្កេីតឡេីងសំដៅកាត់បន្ថយអត្រាគ្រោះថ្នាក់ដោយសារមីន។
លោកមានប្រសាសន៍ថាសកម្មភាពនេះមានការចូលយ៉ាងសកម្មពីសម្តេចសង្ឃ ព្រះថេរាអនុថេរៈ អតីតៈព្រះមហាក្សត្រសម្តេចព្រះបរមរតនកោដ្ឋនិងសម្តេចព្រះមហាក្សត្រី សម្តេចប្រធានព្រឹទ្ធសភា សម្តេចប្រធានរដ្ឋសភា និងជាពិសេសសម្តេចអគ្គមហាសេនាបតីតេជោដែលបានដឹកនាំថ្នាក់ដឹកនាំថ្នាក់ជាតិនិងថ្នាក់ដឹកនាំគ្រប់ស្រទាប់នៅមូលដ្ឋាន ក្នុងការផ្សព្វផ្សាយនិងអំពាវនាវទប់ស្កាត់នៃគ្រោះថ្នាក់ដោយសារមីន! អង្គភាពសុីម៉ាក់ដែលជាសេនាធិការរបស់រាជរដ្ឋាភិបាលបានអនុវត្តបទបញ្ជានិងយុទ្ធសាស្ត្រនេះយ៉ាងមុឺងម៉ាត់ ពោលក្នុងរយះពេលជាង២៧ឆ្នាំនេះ បានផ្តល់ការអប់រំដោយផ្ទាល់បានចំនួនជិត៨លាននាក់ក្នុងក្របខណ្ឌ័ទូទាំងប្រទេស! និងមានការចូលរួមយ៉ាងផុសផុលពីគ្រប់ប្រពន្ធ័សារពត៌មាន! ។
អ្វីដែលគួរចងចាំនូវសមិទ្ធផលដ៏ធំធេងបំផុតនៃចលនាអប់រំយល់ដឹងពីគ្រោះថ្នាក់ដោយសារមីននៅកម្ពុជានោះគឺថា៖
១- ការចូលរួមចលនាកាត់បន្ថយជនរងគ្រោះដោយសារមីន៖ មានជនរងគ្រោះប្រមាណ៣០០–៤០០នាក់ក្នុង១ខែៗពោលគឺចំនួនជាង៤.០០០នាក់ ក្នុង១ឆ្នាំៗ ដោយសារសង្គ្រាមសុីវិលបន្តឆាបឆេះជាពិសេសនៅទិសខេត្តប៉ៃលិននិងស្រុកសំឡូត មានប្រជាជនរត់គេចពីសង្គ្រាមមករស់នៅតាមដងខ្លួនជាតិលេខ១០មានចំនួនរាប់ពាន់គ្រួសារ ស្ថិតក្នុងស្រុករតនមណ្ឌលដែលពួកគាត់ជាមុខសញ្ញារងគ្រោះធ្ងន់ធ្ងរដោយសារគ្រាប់មីន។ សំរែកទុក្ខសោកវេទនានៃរងគ្រោះដោយសារគ្រាប់មីននៅទិសស្រុករតនមណ្ឌលពេលនោះក៏បានក្លាយជាចរន្តប្រឆាំងការប្រេីប្រាស់គ្រាប់មីនប្រឆាំងមនុស្សក្នុងឆាកអន្តរជាតិ។
២- ដោយសារគ្រោះថ្នាក់ដ៏ធ្ងន់ធ្ងរដោយសារគ្រាប់មីននៅកម្ពុជា បណ្តាប្រទេសមានសង្គ្រាមលេីលោកនេះ បូករួមជាមួយចលនាអប់រំយល់ដឹងពីគ្រោះថ្នាក់ដោយសារមីនយ៉ាងខ្លាំងក្លាចាប់ពីឆ្នាំ១៩៩៤នោះ បានក្លាយជាចលនាអន្តរជាតិយ៉ាងសំខាន់បំផុតក្នុងការរួមចំណែកក្នុងចលនាអន្តរជាតិនៃការទាមទារឱ្យបង្កេីតអនុសញ្ញាអន្តរជាតិស្តីពីការហាមប្រាមការប្រេីប្រាស់គ្រាប់មីនប្រឆាំងមនុស្សហៅកាត់ថា អនុសញ្ញាអន្តរជាតិអូតាវ៉ានៅចុងឆ្នាំ១៩៩៧និងចូលជាធរមាននៅខែមីនាឆ្នាំ១៩៩៩! ហេីយកម្ពុជាក្លាយជារដ្ឋភាគីនៃអនុសញ្ញាអន្តរជាតិមួយនេះនៅដេីមឆ្នាំ២០០០! ។
នេះជាសមិទ្ធផលជាប្រវត្តិសាស្ត្រនៃស្មារតីស្រឡាញ់សន្តិភាពនិងទឹកចិត្តប្រកបដោយមនុស្សធម៌ក្រោមការដឹកនាំរបស់សម្តេចតេជោសែន! ដែលផលប្រយោជន៍ផុសចេញពីកម្ពុជានៅឆ្នាំ១៩៩៤នោះ បានជួយចូលរួមចំណែកបង្កេីតបានអនុសញ្ញាអន្តរជាតិអូតាវ៉ា ក្នុងស្មារតី ឆន្ទៈសម្រាប់កិច្ចការមនុស្សធម៌នេះឡេីង! ហេីយការបង្កេីតថ្ងៃ២៤ កុម្ភះ ជាទិវារជាតិនៃការយល់ដឹងពីគ្រោះថ្នាក់ដោយសារគ្រាប់មីននេះឡេីងនៅកម្ពុជា មុនអង្គការសហប្រជាជាតិចំនួន១១ឆ្នាំ ពោលគឺអង្គការសហប្រជាជាតិបានធ្វេីសេចក្តីសំរេចក្នុងមហាសន្និបាតរបស់ខ្លួននៅខែធ្នូ ឆ្នាំ២០០៥ ដោយកំណត់យកថ្ងៃទី០៤ ខែមេសា ជារៀងរាល់ឆ្នាំ ជាថ្ងៃទិវារយល់ដឹងពីគ្រាប់មីននេះ៕
