សម្ដេចក្រឡាហោម ផ្ដាំមន្រ្តី ត្រូវទប់ស្កាត់នូវឧបាយកល បដិវត្តន៍ពណ៌
ភ្នំពេញ៖ សម្ដេចក្រឡាហោម បានផ្ដាំផ្ញើដល់មន្រ្តីថា ត្រូវដោះស្រាយភ្លាមៗនូវជម្លោះតូចតាច ប្រកបដោយយុត្តិធម៌ និងគ្មានការរើសអើង ទើបអាចមានប្រសិទ្ធភាពខ្ពស់ ក្នុងទប់ស្កាត់នូវឧបាយកល បដិវត្តន៍ពណ៌នានា ដើម្បីឈានទៅផ្ដួលរំលំរាជរដ្ឋាភិបាលស្របច្បាប់។
សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ កាលពីរសៀលថ្ងៃទី២៧កុម្ភៈ នៅសាលារាជធានីភ្នំពេញ ក្នុងឱកាសបិទសន្និបាត បូកសរុបលទ្ធផលការងារប្រចាំឆ្នាំ២០១៩ និងលើកទិសដៅអនុវត្តការងារឆ្នាំ២០២០ របស់រដ្ឋបាលរាជធានីភ្នំពេញ ។
សម្ដេចក៏បានរំលឹកឡើងវិញ នូវការប៉ុនប៉ងបង្កើតចលនាបដិវត្តន៍ពណ៌ របស់ក្រុមប្រឆាំងក្រៅច្បាប់ ដែលបើទោះបីជាផែនការនេះ បានទទួលបរាជ័យបន្តបន្ទាប់ក្ដី ប៉ុន្តែក្រុមប្រឆាំងក្រៅច្បាប់ នៅតែចិញ្ចឹមចិត្តក្នុងការធ្វើឱ្យសម្រេចផែនការនេះមិន ចេះចប់មិនចេះហើយឡើយ។ យ៉ាងណាក៏ដោយ សម្ដេចក្រឡាហោមបានណែនាំថ្នាក់ដឹកនាំ មន្ត្រីរាជការ និងកងកម្លាំងទាំងអស់ មិនត្រូវបង្កបញ្ហាអសកម្មណាមួយឡើយ ព្រោះសម្ដេចយល់ថាបញ្ហានោះ អាចក្លាយជាកម្មវត្ថុដែលក្រុមប្រឆាំង យកមកពង្រីកដើម្បីបញ្ឆេះកំហឹងពលរដ្ឋ។
សម្តេចក្រឡាហោមស ខេង បានមានប្រសាសន៍ទៀតថា មកដល់ពេលនេះ អ្នកដែលមានបំណងធ្វើសកម្មភាពបែបបដិវត្តន៍ពណ៌ មិនទាន់បោះបង់ចោលនៅឡើយទេ។ សម្រាប់យើងមិនត្រូវភ្លេចខ្លួន ព្រោះថា សកម្មភាពបដិវត្តន៍ពណ៌នេះ គេតែងតែធ្វើអាជីវម្មលើចំណុចខ្សោយរបស់យើង។
សម្តេចក្រឡាហោម បានស្នើដល់រដ្ឋបាលគ្រប់ថ្នាក់យកចិត្តទុកដាក់ដោះស្រាយនូវកង្វល់ សំណើរ សំណូមពរនិងជម្លោះនានាតាំងពីតូច កុំចាំដល់ធំព្រោះនៅពេលធំគេយកធ្វើជាលេស។ ក្រុមប្រឆាំងតែងយកបញ្ហានេះ ពង្រីកឲ្យធំដើម្បីវាយប្រហាររាជរដ្ឋាភិបាល។
ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីរដ្ឋមន្ដ្រីក្រសួងមហាផ្ទៃ បានបញ្ជាឲ្យ ប្រធានគណៈបញ្ជាការ ឯកភាព រដ្ឋបាលរាជធានី-ខេត្ត ត្រូវបង្កើនការគ្រប់គ្រង សភាពការណ៍ នៅតាមមូលដ្ឋាន និងដាក់ចេញវិធានការនានា សំដៅទប់ស្កាត់រាល់សកម្មភាព ប៉ុនប៉ងបង្កអសន្ដិសុខ និងភាពចលាចល វឹកវរដល់សង្គមតាមគ្រប់រូបភាព ជាពិសេសត្រូវរួមគ្នាទប់ស្កាត់ប្រឆាំងដាច់ខាតនូវចលនាឧទ្ទាម និងសកម្មភាពបដិវត្តន៍ពណ៌ របស់ក្រុមប្រឆាំង ។
ក្នុងពិធីបិទសន្និបាត បូកសរុបលទ្ធផល ការងារប្រចាំឆ្នាំ២០១៩ និងទិសដៅការងារឆ្នាំ២០២០ របស់រដ្ឋបាលរាជធានីភ្នំពេញ នារសៀលថ្ងៃទី២៧ ខែកុម្ភៈ ឆ្នាំ២០២០ សម្ដេច ស ខេង បានថ្លែងថា ទាក់ទងបដិវត្តន៍ពណ៌ បានឆ្លងកាត់រួចមកហើយ ក្រោយការបោះឆ្នោតឆ្នាំ២០១៣។ប៉ុន្ដែដោយសារភាពអត់ធ្មត់ ហើយឈរទៅលើការគោរពលទ្ធិប្រជាធិតេយ្យ សេរី ពហុបក្ស តាមរយៈការបោះឆ្នោត ដោយសន្ដិវិធី ហើយស្របតាមគោលការណ៍ លទ្ធិប្រជាធិតេយ្យ ដូច្នេះរាជរដ្ឋាភិបាល មានប្រៀបខាងផ្លូវច្បាប់ ក៏ដូចជានយោបាយ ទប់ស្កាត់បំផ្លាញចោល នូវចលនាបដិវត្តន៍ពណ៌ នៅពេលនោះទើបពួកគេមិនអាចផ្ដួលរំលំ រាជរដ្ឋាភិបាលស្របច្បាប់ កើតចេញពីការបោះឆ្នោតបាន ។
សម្ដេចក្រឡាហោមមានប្រសាសន៍ថា «ឆ្នាំ២០២០ គណៈបញ្ជាការឯកភាព រដ្ឋបាលរាជធានី-ខេត្ត ត្រូវបង្កើនការគ្រប់គ្រង សភាពការណ៍នៅតាមមូលដ្ឋាន និងដាក់ចេញវិធានការនានា សំដៅទប់ស្កាត់រាលកម្មភាព ដែលប៉ុនប៉ងបង្កអសន្ដិសុខ ភាពចលាចលវឹកវរ ដល់សង្គមតាមគ្រប់រូបភាព និងត្រូវរួមគ្នាទប់ស្កាត់ប្រឆាំងដាច់ខាតនូវចលនាឧទ្ទាម និងសកម្មភាពបដិវត្តន៍ពណ៌» ។
សម្ដេចស ខេង បន្ដថា «ដូច្នេះមកដល់ពេលនេះ អ្នកដែលមានបំណង ដើម្បីធ្វើសកម្មភាព បែបបដិវត្តន៍ពណ៌នេះ មិនទាន់បោះបង់ចោលនៅឡើយទេ។ហើយជាពិសេស តាមរយៈផែនការវិលត្រឡប់ ៩វិច្ឆិកា យើងបានដឹងទាំងអស់គ្នាហើយ។ប៉ុន្ដែទន្ទឹមនឹងនេះ យើងមិនត្រូវភ្លេចខ្លួន ពីព្រោះថា សកម្មភាពបដិវត្តន៍ពណ៌នេះ គឺគេតែងតែធ្វើអាជីវកម្ម លើចំណុចខ្សោយ របស់យើង» ។
សម្ដេចបញ្ជាក់ថា «បើគេរកចំណុចខ្សោយយើងមិនឃើញ គេក៏គ្មានលេស គ្មានហេតុផល ដើម្បីនឹងចលនាគៀងគរប្រជាជន ឬកម្លាំងចូលរួមក្នុងការ បដិវត្តន៍ពណ៌នេះដែលក្នុងន័យនេះ ខ្ញុំស្នើថា រដ្ឋបាលគ្រប់ថ្នាក់របស់យើង យកចិត្តទុកដាក់ ដោះស្រាយនូវកង្វល់សំណើរ ក៏ដូចជាជម្លោះនានាដែលកើតមានឡើងតាំងពីតូច កុំឲ្យបញ្ហាវាកក កុំឲ្យក្លាយបញ្ហាទៅជាធំ ដែលគេយកធ្វើលេស ដើម្បីធ្វើចលនាប្រឆាំងរាជរដ្ឋាភិបាល នេះតាមបទពិសោធន៍ បណ្ដាប្រទេសក្នុងតំបន់ ក៏ដូចជា ក្នុងសកលលោកនេះ ដែលឆ្លងកាត់បដិវត្តន៍ពណ៌ដែលបានប្រើប្រាស់ បញ្ហាទាំងនោះ»។
ឆ្លៀតក្នុងឱកាសនោះដែរ រដ្ឋមន្ដ្រីក្រសួងមហាផ្ទៃ លើកឡើងថា ភាគីពាក់ព័ន្ធត្រូវបន្ដជំរុញបំផុសចលនាប្រជាជនចូលរួមក្នុងការអនុវត្តគោលនយោបាយ ភូមិ-ឃុំ មានសុវត្ថិភាព ឲ្យបានជាប់ជាប្រចាំនៅគ្រប់មូលដ្ឋាន ដើម្បីបង្ការទប់ស្កាត់ និងបង្ក្រាបបទល្មើសនានា នៅតាមមូលដ្ឋានរបស់ខ្លួន ដូចជា សកម្មភាព លួច ឆក់ ប្លន់ បទល្មើសគ្រឿងញៀនខុសច្បាប់ ល្បែងស៊ីសងខុសច្បាប់ ការជួញដូរមនុស្ស និងសកម្មភាពក្មេងទំនើងជាដើម។
សម្ដេចបន្ថែមថា ត្រូវខិតខំពង្រឹងសមត្ថភាពជំនាញវិជ្ជាជីវៈរបស់កងកម្លាំងនគរបាលនៅតាមមូលដ្ឋាន និងលើកកម្ពស់ការប្រាស្រ័យ ទាក់ទងរវាងអាជ្ញាធរ កម្លាំងនគរបាល និងកម្លាំងមានសមត្ថកិច្ចនានា ជាមួយប្រជាពលរដ្ឋ តាមរយៈការលើកកម្ពស់ប្រសិទ្ធភាព ក្នុងការផ្ដល់សេវាអត្តសញ្ញាណ បណ្ណសញ្ជាតិខ្មែរ សៀវភៅគ្រួសារ សៀវភៅស្នាក់នៅ និងលិខិតស្នាមនានា ព្រមទាំងការចុះជួយដោះស្រាយការលំបាកនានា របស់ប្រជាពលរដ្ឋនៅពេលជួបគ្រោះធម្មជាតិ ឬគ្រោះថ្នាក់នានា និងនៅពេលប្រជាពលរដ្ឋ ជួបទុកលំបាកខ្វះខាត ក្នុងជីវភាព ពិសេសជនក្រីក្រ ជនងាយរងគ្រោះ សំដៅជំរុញលើកទឹកចិត្តប្រជាពលរដ្ឋ ឲ្យចូលរួមចលនា គោលនយោបាយ ភូមិ-ឃុំ មានសុវត្ថិភាព ៕