មកសុំច្បាប់សាងសង់បើក ភោជនីយដ្ឋាននិងលាងរថយន្ដ ពេលសង់ហើយបើកហាងឡាក់គី បង្កកកស្ទះចរាចរណ៍
ភ្នំពេញ៖ អភិបាលខណ្ឌជ្រោយចង្វា បានបញ្ជាក់ថា ម្ចាស់ហាងឡាក់គីមួយកន្លែង កាលពីដំបូងឡើយ មកសុំច្បាប់សាងសង់បើក ភោជនីយដ្ឋាននិងលាងរថយន្ដ ពេលសង់ហើយបើកហាងឡាក់គី ដែលមិនមានចំណតរថយន្តត្រឹមត្រូវ ដោយយកចិញ្ចើមរង្វង់មូលធ្វើចំណតធ្វើឲ្យកកស្ទះ រង្វង់មូលព្រហ្មមុខបួន។
លោក ឃ្លាំង ហួត អភិបាលខណ្ឌជ្រោយចង្វា បានសរសេរសារលើហ្វេសប៊ុកផ្លូវការ Khliang Huot នៅថ្ងៃទី៥ខែមីនានេះថា
“សុំច្បាប់សាងសង់បើក ភោជនីយដ្ឋាននិងលាងរថយន្ដ ពេលសង់ហើយបើកហាងឡាក់គី ដែលមិនមានចំណតរថយន្តត្រឹមត្រូវ ដោយយកចិញ្ចើមរង្វង់មូលធ្វើចំណតធ្វើឲ្យកកស្ទះ រង្វង់មូលព្រហ្មមុខបួន មានតួនាទីសំខាន់សម្រាប់លំហូរ យានយន្តគ្រប់ប្រភេទ ចូលមកខណ្ឌជ្រោយចង្វា ដូច្នេះសុំការយោគយល់ ដល់ម្ចាស់ហាងឡាក់គីផង អរគុណដល់ក្រុមហ៊ុនឡាក់គី ដែលផ្ដល់ទំនុកចិត្តមករកទទួល ទាននៅជ្រោយចង្វា ដោយបញ្ហាការកកស្ទះ សូមមេត្តាយោគយល់ រកទីតាំងសមស្រប មិនប៉ះពាល់ការធ្វើដំណើរ របស់ប្រជាជន ខ្ញុំត្រៀមខ្លួនសហការ និងជួយសម្រួលជានិច្ច ។ អរគុណដល់ការរិះគន់ តែសុំមើលច្បាប់និងហេតុផលផង” ។
លោក ឃ្លាំង ហួត អភិបាលខណ្ឌជ្រោយចង្វា បានបញ្ជាក់ប្រាប់ថា ចំពោះចំណាត់ការឱ្យម្ចាស់ផ្សារឡាក់គី សាខាជ្រោយចង្វាផ្លាស់ប្តូរទីតាំង ពីរង្វង់ជ្រោយចង្វា ដោយសារតែម្ចាស់ផ្សារខាងលើ បានធ្វើខុសចំពោះការស្នើសុំ ទៅអាជ្ញាធរខណ្ឌ ពេលដែលដាក់ពាក្យស្នើសុំច្បាប់នោះ គឺសាងសង់ជាអាហារដ្ឋាន និងកន្លែងលាងរថយន្ត ប៉ុន្តែពេលសាងសង់រួច ចេញជាផ្សារទៅវិញ ដែលបង្កឱ្យមានការកកស្ទះចរាចរណ៍យ៉ាងខ្លាំង ក៏ព្រោះតែគ្មានចំណតរថយន្ត។
មហាជនបានាចោទប្រកាន់នានា មកលើរូបលោកអភិបាលខណ្ឌ និងអាជ្ញាធរខណ្ឌ តាមបណ្តាញសង្គម ពីចំណាត់ការបែបនេះ ដោយអ្នកខ្លះថា សាងសង់អស់លុយរាប់ម៉ឺនដុល្លារ បែរជាឲ្យប្តូរទីតាំង ខណៈខ្លះទៀតថា ពេលសាងសង់ ហេតុដូចម្តេចមិនទៅហាមឃាត់?
សូមបញ្ជាក់ថា កាលពីថ្ងៃទី៣ ខែមីនា ឆ្នាំ២០២០ លោកឃ្លាំង ហួត អភិបាលខណ្ឌជ្រោយចង្វា បានជម្រាមជូនម្ចាស់ក្រុមហ៊ុនផ្សារឡាក់គីថា ទីតាំងផ្សារឡាក់គី សាខាខណ្ឌជ្រោយចង្វានេះ គឺមិនសមស្រប ក្នុងការបើកអាជីវកម្មផ្សារទំនើបឡើយ ដោយសារតែទីតាំង មានលក្ខណៈតូចចង្អៀត មិនមានចំណតគ្រប់គ្រាន់ និងប៉ះពាល់ដល់សណ្តាប់ធ្នាប់ របៀបរៀបរយសាធារណៈ បង្កឱ្យមានការកកស្ទះចរាចរណ៍ នៅរង្វង់មូលព្រហ្មបាយ័ន។ ដូច្នេះដើម្បីរក្សាបាននូវសន្តិសុខ សណ្តាប់ធ្នាប់ រដ្ឋបាលខណ្ឌ តម្រូវឱ្យម្ចាស់ផ្សាររកទីតាំងថ្មី ដែលសមស្របដោយទុកពេលឱ្យ ១ខែ ចាប់ពីថ្ងៃទទួលបានលិខិតជូនដំណឹង៕
