លោកកឹម សុខា គាំទ្រកម្ពុជា ផ្តល់អាទិភាព ដើម្បីរួមគ្នា ប្រយុទ្ធប្រឆាំងជំងឺ Covid-19
ភ្នំពេញ៖ លោកមុត ចន្ថា នាយខុទ្ទកាល័យលោកកឹម សុខា នៅថ្ងៃទី៦ ខែមីនា ឆ្នាំ២០២០ បានលើកយកសាររបស់លោកប្រធាន កឹម សុខា អំពីមេរោគ Covid-19! មកផ្សព្វផ្សាយ លើបណ្តាញសង្គមហ្វេសប៊ុក ផ្លូវការ របស់លោក។
លោកមុត ចន្ថា បានស្រង់សម្តីលោកកឹម សុខា មកបញ្ជាក់ថា ពេលនេះពិភពលោក កំពុងតែប្រឈម នឹងការរីករាលដាល នៃជំងឺCovid-19 ដែលមិនត្រឹមតែ ប៉ះពាល់ដល់សុខភាព និងអាយុជីវិតមនុស្សលោកនោះទេ លើសពីនេះទៅទៀត វាអាចនាំឲ្យប៉ះពាល់ ដល់សេដ្ឋកិច្ចរបស់ប្រទេស និងជីវភាពរស់នៅ របស់មនុស្សជាច្រើនទៀតផង ក្នុងនោះក៏មានប្រទេសកម្ពុជា និងប្រជាពលរដ្ឋខ្មែរយើងផងដែរ។
លោកកឹម សុខា បានបញ្ជាក់ថា “ខ្ញុំយល់ឃើញថា ក្នុងកាលៈទេសៈនេះ យើងជាខ្មែរត្រូវរួបរួមគ្នា ដើម្បីទប់ស្កាត់បញ្ហា ប្រឈមទាំងពីរខាងលើ (ជំងឺនិងសេដ្ឋកិច្ច) ដែលប៉ះពាល់ ដល់ប្រទេសជាតិ និងប្រជាពលរដ្ឋយើង ដោយកុំប្រកាន់ និន្នាការនយោបាយ កុំប្រើប្រាស់បញ្ហានេះ បំផ្លើសបំភ្លៃ ដើម្បីកេងចំណេញនយោបាយ វាយប្រហារគ្នា ដោយអសីលធម៌”។
លោកថា “ខ្ញុំសូមគាំទ្រចំពោះកម្ពុជាយើង ដែលពេលនេះផ្តល់អាទិភាព ដើម្បីរួមគ្នាប្រយុទ្ធប្រឆាំងជំងឺ Covid-19 និងសូមលើកទឹកចិត្ត ដល់សមត្ថកិច្ចជំនាញ បំពេញបេសកកម្ម បានជោគជ័យជូនជាតិ និងប្រជាពលរដ្ឋខ្មែរ។ ជាពិសេស ខ្ញុំសូមអំពាវនាវ ដល់ប្រជាពលរដ្ឋខ្មែរទាំងអស់គ្នា សូមថែរក្សាអនាម័យ ការពារខ្លួនឲ្យបានខ្ជាប់ខ្ជួន ដោយប្រុងប្រយ័ត្ន ទប់ស្កាត់នូវជំងឺរាតត្បាតនេះ”។
ជាមួយគ្នានេះដែរ លោកកឹម សុខា សូមបួងសួង ដល់គុណបុណ្យព្រះរតនត្រៃ បារមីវត្ថុសក្តិសិទ្ធិ សូមឲ្យប្រជាពលរដ្ឋខ្មែរ មានសុខភាពល្អ ជាពិសេសចៀសផុតពីជំងឺ Covid-19 និងសូមឲ្យមាន ជីវភាពរស់នៅប្រសើរឡើង កុំឲ្យជួបប្រទះ នូវវិបត្តិសេដ្ឋកិច្ចឲ្យសោះ៕
