លោកទៀ សីហា បញ្ជាក់ថា មនុស្ស៤នាក់ មិនមែនជាអ្នកចម្លង ឬទាក់ទងផ្ទាល់ ជាមួយជនជាតិជប៉ុន និងជាប់ពាក់ព័ន្ធនឹង COVID-19នោះទេ
សៀមរាប៖ លោកទៀ សីហា អភិបាលខេត្តសៀមរាប នៅថ្ងៃទី៦ខែមីនា បានសរសេរសារលើហ្វេសប៊ុកថា “សូមពិនិត្យទៅលើព័ត៌មាន របស់ក្រសួងសុខាភិបាល ឲ្យបានល្អិតល្អន់ លើរូបភាពខាងក្រោម ជាថៅកែ និងបុគ្គលិក ៣នាក់ មិនមែនជាអ្នកចម្លង ឬទាក់ទងផ្ទាល់ ជាមួយជនជាតិជប៉ុន និងជាប់ពាក់ព័ន្ធនឹង COVID-19នោះទេ”។
លោកអភិបាលខេត្ត បានបញ្ជាក់ថា ទាំង៤នាក់នេះ បានសហការជាមួយមន្ទីរសុខាភិបាល ក្នុងការផ្តល់ចម្លើយ ស្របតាមយន្តការ របស់ក្រសួងសុខាភិបាល ក្នុងការចុះស៊ើបសួរ ទៅតាមទីកន្លែងមួយចំនួន ដែលសន្និដ្ឋាន និងត្រូវត្រួតពិនិត្យ។
ការតាមដានឬ ពិនិត្យទៅលើព័ត៌មានមិនពិត មិនច្បាស់លាស់ ឬមាននិន្នាការនយោបាយ នឹងធ្វើឲ្យមានភាពចលាចល នាំមកនូវមហន្តរាយ វិបត្តិសតិអារម្មណ៍ រើសអើង ប៉ះពាល់ដល់ជីវភាព កិត្តិយសបុគ្គល និងខេត្តសៀមរាបទាំងមូល។
នាយកដ្ឋានប្រយុទ្ធនឹងជំងឺឆ្លង CDC បានចេញប្រកាសព័ត៌មាន សូមជំរាបជូនសាធារណជន ឲ្យបានជ្រាបថា ក្រោយពីទទួលបាន ព័ត៌មានថា ជនជាតិជប៉ុន មានផ្ទុកមេរោគ Covid-19, ក្រុមមន្រ្តីសុខាភិបាលថ្នាក់ជាតិ ថ្នាក់ខេត្ត និងអាជ្ញាធរខេត្តសៀមរាប កំពុងធ្វើការលើករណីនេះ ដោយតម្លាភាពបំផុត និធ្វើការប្រកបដោយ ភាពត្រឹមត្រូវបំផុត ទៅតាមនីតិវិធី របស់អង្គការសុខភាពពិភពលោក មជ្ឈណ្ឌលប្រយុទ្ធនឹងជំងឺឆ្លងសហរដ្ឋអាមេរិក និងវិទ្យាស្ថានប៉ាស្ទ័រ ។ យើងបានរកឃើញអ្នកប៉ះពាល់ផ្ទាល់ ៤នាក់ និង ប្រមាណ ៤០នាក់ ប៉ះពាល់ប្រយោល ដែលតម្រូវឱ្យគាត់នៅ ដោយឡែកពីគេចំនួន ១៤ថ្ងៃ និងតាមដានសុខភាព បើមានចេញរោគសញ្ញា ត្រូវយកវត្ថុវិភាគជាបន្ទាន់ រហូតពេលនេះ ពួកគាត់ពុំទាន់ មានរោគសញ្ញានៅឡើយទេ ។
សូមបញ្ជាក់ថា ជនជាតិជប៉ុននេះ គាត់ជាអ្នកធុរកិច្ច គាត់ បានធ្វើដំណើរជាបន្តបន្ទាប់ ក្នុងរយៈពេលខ្លីពី ប្រទេសវៀតណាម ប្រទេសថៃ ប្រទេសហ្វីលីពីន ប្រទេសកម្ពុជា បន្ទាប់មកទៅវៀតណាម និងត្រឡប់ចូល្រទេសជប៉ុនវិញ ហើយ រកឃើញវិជ្ជមាន COVID-19 នៅទីនោះ ៕
