តុលាការចេញដីកាឱ្យឃុំខ្លួន បុគ្គលនី ណាក់ ពូកែខាងប្រើវោហាស័ព្ទដៀមដាម
ភ្នំពេញ៖ ក្រោយពីទទួលបានពាក្យបណ្ដឹងរបស់ក្រសួងកសិកម្មទាក់ទងនឹងការជេរប្រមាថជាសាធារណៈ និងក្រោមការចង្អុលបង្ហាញពី ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ នាយកដ្ឋានប្រឆាំងបទល្មើសបច្ចេកវិទ្យា ក្រោមការដឹកនាំបញ្ជាផ្ទាល់ពី ឯកឧត្តម ឧត្តមសេនីយ៍ឯក ជា ពៅ បានធ្វើការស្រាវជ្រាវ រហូតដល់មានការឃាត់ខ្លួនបុរសម្នាក់ កាលពីថ្ងៃទី១០ ខែធ្នូ ឆ្នាំ២០២០ ដោយមាការសហការជាមួយអធិការដ្ឋានខណ្ឌមានជ័យ ព្រមទាំងមានការសម្របសម្រួលពី ឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ។
ជនសង្ស័យមានឈ្មោះ នី ណាក់ បានកំពុងប្រើប្រាស់គណនីហ្វេសប៊ុកផេក Iman-KH ដោយប្រើវោហាស័ព្ទដៀមដាមថ្នាក់ដឹកនាំមានដូចជា “ខ្ញុំបានត្រៀមឬព្រៀងលិខិតនិងឯកសាររួចរាល់អស់ហើយក្នុងការស្នើដាក់ទ្រុងមាន់របស់ខ្ញុំក្នុងភាពអាសន្ន ព្រោះមូលហេតុ មានមេរោគផ្តាសាយរលាកផ្លូវដង្ហើម កំពុងតែរាតត្បាតក្នុងកសិដ្ឋាន។ ខ្ញុំមិនចង់គិតដល់ចំណុចនេះទេ ព្រោះវាធ្វើអោយខូចខាតសេដ្ឋកិច្ចរបស់កូនមាន់យ៉ាងធ្ងន់ធ្ងរ ។ ខ្ញុំសង្ឃឹមថា កូនមាន់នឹងចេះពាក់ម៉ាស់គ្រប់គ្នាហើយដេកនៅក្នុងទ្រុង កុំចេញក្រៅអោយសោះបើគ្មានការចាំបាច់” ជាដើម។
បច្ចុប្បន្នជនសង្ស័យត្រូវបាន ចៅក្រមស៊ើបសួរ នៃសាលាដំបូងរាជធានីភ្នំពេញ ចេញដីកាបង្គាប់ឱ្យឃុំខ្លួនជាបណ្ដោះអាសន្នពីបទជេរប្រមាថជាសាធារណៈ និង ញុះញង់ឱ្យមានការរើសអើង ដើម្បីចាត់វិធានការតាមផ្លូវច្បាប់។ ជនជាប់ចោទនី ណាក់ អាយុ៤១ឆ្នាំ មុខរបរលក់ដូរសាច់ក្រកតាមអនឡាញ ទីកន្លែងកំណើតនៅឃុំតាប៉ុន ស្រុកសង្កែ ខេត្តបាត់ដំបង និងមានទីលំនៅបច្ចុប្បន្នស្នាក់នៅផ្ទះជួលគ្មានលេខ ផ្លូវ៨BT ក្រុមទី២ ភូមិសន្សំកុសល១ សង្កាត់បឹងទំពុនទី១ ខណ្ឌមានជ័យ រាជធានីភ្នំពេញ ។ ជននេះត្រូវដាក់ឲ្យស្ថិតក្រោមការពិនិត្យពីបទ ជេរប្រមាថជាសាធារណៈ និងញុះញង់ឲ្យមានការរើសអើង ប្រព្រត្តិនៅចំណុចរាជធានីភ្នំពេញ កាលពីថ្ងៃទី៧ ខែធ្នូ ឆ្នាំ២០២០ តាមបញ្ញតិ្តមាត្រា ៣០៧ , ៤៩៤ និងមាត្រា ៤៩៦ នៃក្រមព្រហ្មទណ្ឌ។
លោកចៅក្រមស៊ើបសួរ ហុង សុគុណ វឌ្ឍនា បានចេញដីកាបង្គាប់ឲ្យភ្នាក់ងារមានសមត្ថកិច្ចនៃកម្លាំងសាធារណៈ ធ្វើការឃុំខ្លួនជនត្រូវចោទឈ្មោះ នី ណាក់ ទៅមណ្ឌលអប់រំកែប្រែទី១ (ម១) ដោយអនុវត្តឲ្យបានត្រឹមត្រូវតាមច្បាប់។ និងបង្គាប់ឲ្យប្រធានពន្ធនាគារអប់រំកែប្រែទី(ម១) ទទួលនិងឃុំខ្លួនជននេះរហូតដល់មានបទបញ្ជាថ្មីសម្រេចផ្សេងពីនេះ។
ឯកឧត្តម ឧត្តមសេនីយ៍ឯក ប្រធាននាយកដ្ឋាន សូមក្រើនរំឭកដល់បងប្អូនប្រជាពលរដ្ឋ ឱ្យមានការទទួលខុសត្រូវ ក្នុងការប្រើប្រាស់ប្រព័ន្ធបណ្ដាញទំនាក់ទំនងសង្គម សូមកុំប្រើពាក្យពេចន៍ដែលធ្វើឱ្យប៉ះពាល់ដល់កិត្តិយសថ្លៃថ្នូររបស់អ្នកដទៃ មន្ត្រីរាជការ ឬថ្នាក់ដឹកនាំ ព្រោះលោកអ្នកអាចប្រឈមនឹងច្បាប់បាន៕
