មានករណី ផ្ទុះអាវុធ ច្រើនគ្រាប់ ក្នងករណី ជម្លោះ ដីធ្លីរវាង ប្រជាពលរដ្ឋ និង ក្រុមឧកញ៉ា នៅ ខេត្តព្រះសីហនុ
ព្រះសីហនុ ៖សមត្ថកិច្ចបានអោយដឹងថា មានករណីប៉ះទង្គិចគ្នារវាងក្រុមប្រជាពលរដ្ឋ និងក្រុមឧកញ៉ា ភឺន ផល្លា រឿងជម្លោះដីធ្លី រហូតដល់មានការផ្ទុះអាវុធច្រើនគ្រាប់បណ្តាលឱ្យខាងប្រជាពលរដ្ឋ មានអ្នករបួសជាច្រើននាក់។ ករណីនេះបានកើតឡើងនៅវេលារសៀល ថ្ងៃទី២០ ខែធ្នូ ឆ្នាំ២០២០ នៅភូមិអូរឧញ៉ាហេង ស្រុកព្រៃនប់ ខេត្តព្រះសីហនុ។
ភាគីខាងពលរដ្ឋ បានអះអាងថា ខ្មាន់កាំភ្លើងខាងក្រុមឧកញ៉ាមួយរូប មិនទាន់ស្គាល់អត្តសញ្ញាណនៅឡើយទេ ហើយប្រជាពលរដ្ឋក៏បានឡោមព័ទ្ធកាក់ទុករថយន្តមួយគ្រឿងរបស់ជនសង្ស័យមិនឱ្យទៅមុខ ហើយសមត្ថកិច្ចក៏កំពុងចុះទៅដល់ផងដែរ។ ក្នុងករណីនេះ ពលរដ្ឋបានអះអាងថា ក្រុមឧកញ៉ា បានទៅរំលោភយកដីធ្លីរបស់ពួកគេដែលបានរស់នៅច្រើនឆ្នាំមកហើយ បន្ទាប់មកប្រជាពលរដ្ឋច្រើននាក់បាននាំគ្នាតវ៉ារហូតដល់មានការផ្ទុះអាវុធនេះ។
លោក ឃាង ភារម្យ អ្នកនាំពាក្យសាលាខេត្តព្រះសីហនុ បានឱ្យដឹងថា ពិតជាមានករណីនេះកើតឡើងប្រាកដមែន ហើយអាជ្ញាធរ និងសមត្ថកិច្ចកំពុងធ្វើរបាយការណ៍អំពីករណីនេះ និងមិនទាន់អាចបញ្ជាក់លម្អិតអំពីករណីនេះបាននៅឡើយទេ៕
