គ្រួសារសពអតីតយុទ្ធជន ជានិវត្តជននិងជនពិការ ចំនួន ៣០ គ្រួសារបានទទួលប្រគល់ប្រាក់ធានារ៉ាប់រងសង្គមនិងប្រាក់បូជាសពជាលើកដំបូង
ភ្នំពេញ៖កាលពីថ្ងៃទី៣០ ខែ ធ្នូ ឆ្នាំ ២០២០នៅមន្ទីរសង្គមកិច្ចអតីតយុទ្ធជន និងយុវនីតិសម្បទា រាជធានីភ្នំពេញ បានសហការជាមួយ បេឡាជាតិអតីតយុទ្ធជនថ្នាក់កណ្ដាល និងសមាគមអតីតយុទ្ធជនកម្ពុជារាជធានីភ្នំពេញ បានរៀបចំកម្មវិធីប្រគល់ប្រាក់ធានារ៉ាប់រងសង្គម និងប្រាក់បូជាសពមួយលើកដំបូង ជូនគ្រួសារសពអតីតយុទ្ធជន ជានិវត្តជននិងជនពិការ ចំនួន ៣០ គ្រួសារ ក្រោមអធិបតីភាពលោកស្រីមុំចាន់ដានី ប្រធានមន្ទីរ ស អ យ រាជធានីភ្នំពេញ ,អនុប្រធានសមាគមអតីតយុទ្ធជនកម្ពុជារាជធានីភ្នំពេញ។
ក្នុងពិធីនោះក៏មានការអញ្ជើញចូលរួម ពីតំណាងបជអ,តំណាងសមាគមអតីត និងក្រុមគ្រួសារនៃយុទ្ធជនដែលបានទទួលមរណៈភាព។
ក្នុងឱកាសនោះលោកស្រីមុំចាន់ដានី ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទា រាជធានីភ្នំពេញ និងជាអនុប្រធានសមាគមអតីតយុទ្ធជនកម្ពុជារាជធានីភ្នំពេញ បានលើកឡើងថា៖ការផ្ដល់ខាងលើនេះ គឺជាការយកចិត្តទុកដាក់ ចំពោះគ្រួសារសពអតីតយុទ្ធជន ជានិវត្តជននិងជនពិការ ចំនួន ៣០ គ្រួសារពីរាជរដ្ឋាភិបាលកម្ពុជា ដែលមានសម្ដេចតេជោហ៊ុនសែនជាប្រមុខ។
លោកស្រី មុំ ចាន់ដានី បានអោយដឹងថា អនុវត្តតាមគោលនយោបាយរបស់រាជរដ្ឋាភិបាល ថ្ងៃនេះ មន្ទីរសង្គមកិច្ចរាជធានី បានរៀនបំពិធីជួបជុំសំណេះសំណាលជាមួយគ្រួសារ អតីតយុទ្ឋជន និងនាំយកថវិកា ផ្តល់ជូនដល់គ្រួសារអតីតយុទ្ឋជន ចំនួន៣០គ្រួសារ មកពីតាមខណ្ឌចំនួន១១ខណ្ឌ ក្នុងរាជធានី ។
លោកស្រីប្រធាន បញ្ជាក់ថា នេះគឺជាលើកទី១៧ហើយ កាលមុនៗក្រុមការងារបានចុះផ្ទាល់ដល់លំនៅឋានបងប្អូន ដើម្បីបានដឹងសុខទុក្ខផ្ទាល់អំពីជីវភាពរស់នៅរបស់គ្រួសារអតីតយុទ្ឋជន និវត្តន៍ជនផងដែរ ។ ដោយឡែកលើកទី១៦នេះ យោងតាមការណែនាំរបស់លោករដ្ឋមន្ត្រី វង្ស សូត បានណែនាំអោយមន្ទីរសង្គមកិច្ចខេត្ត រាជធានី ធ្វើយ៉ាងអោយមន្ទីរផ្តល់សេវាតម្រូវការ ព្រមទាំងខិតខំធ្វើរបបគោលនយោបាយផ្តល់អោយដល់គ្រួសារអតីតយុទ្ឋជន ។ ពាក់ព័ន្ឋនឹងអនុសាសន៍របស់ថ្នាក់ដឹកនាំ គឺធ្វើយ៉ាងណា ត្រូវយកចិត្តទុក្ខដាក់ដល់បងប្អូន ពោលរាជរដ្ឋាភិបាលមិនបោះបងប្អូនគ្រួសារអតីតយុទ្ឋជន ដែលលោកមានគុណបំណាច់ចំពោះជាតិ ចឹងទេ តាមរយៈក្រសួងសង្គមកិច្ចអតីតយុទ្ឋជន ដោយបានដោះស្រាយរបបគោលនយោបាយប្រចាំខែ របបគោលនយបាយសំរាប់សមាជិកអតីតយុទ្ឋជនដែលបានចូលនិវត្តន៍ រហូតដល់ពេលសមាជិកអតីតយុទ្ឋជនម្នាក់ៗមាន ពិសេសដល់សមាជិកអតីតយុទ្ឋជនទទួលមរណភាព គឺមានការរៀបចំគោលការណ៍របបសំរាប់ឧបត្ថម្ភដល់គ្រួសារ ។ ជាក់ស្តែងដូចថ្ងៃនេះ មន្ទីរបានរៀបចំគោលនយោបាយជូនទៅតាមឋាន្តរស័ក្តកំរឹត តាមអនុក្រឹត និងប្រកាសណែនាំ ។ ពិសេសតាមការណែនាំរបស់លោករដ្ឋមន្ត្រី គឺធ្វើអោយលឿន រហ័ស ប្រកបដោយប្រសិទ្ឋិភាព ។
ជំនួសមុខឲ្យរដ្ឋមន្ត្រីក្រសួងសង្គមកិច្ច, លោកស្រី មុំ ចាន់ដានី បានសម្ដែងនូវការចូលរួមរំលែកនូវមរណៈទុក្ខ ដ៏ក្រៀមក្រំចំពោះការបាត់បង់សមាជិកគ្រួសារ ដែលបានទទួលមរណភាព ដែលជាអតីតយុទ្ធជនយើង ធ្លាប់បានចូលរួមចំណែកលះបង់សាច់ស្រស់ឈាមស្រស់ ក្នុងបុព្វហេតុរំដោះ ការពារបូរណភាពទឹកដី រហូតទទួលបានជោគជ័យកន្លងមក។
លោកស្រី មុំ ចាន់ដានី បានគូសបញ្ជាក់ថា គំរូវីរភាពដ៏អង់អាចក្លាហានរបស់អតីតយុទ្ធជនកម្ពុជា ពិតជាបានចារនៅក្នុងប្រវត្តិសាស្ត្រ កូនខ្មែរជំនាន់ក្រោយ ដើម្បីជាការដឹងគុណ ដល់អ្នកជំនាន់មុន។
ជាមួយគ្នានោះ លោកស្រីប្រធាន បានបួងសួងដល់ដួងវិញ្ញាណក្ខន្ធ នៃបុព្វបុរសខ្មែរ ដែលបានពលីកម្មក្នុងបុព្វហេតុជាតិមាតុភូមិ សូមបានទៅកាន់សុគតិភពកុំបីឃ្លាងឃ្លៀតឡើយ៕
