បុរសម្នាក់ ខឹងគេទារលុយជំពាក់ថ្លៃលក់ដំឡូង ទាញដំបង វាយបែកក្បាលម្ចាស់បំណុល ដេរ៥ថ្នេរ ត្រូវសមត្ថកិច្ចឃាត់ខ្លួន
បាត់ដំបង ៖ កម្លាំងអធិការដ្ឋាននគរបាលស្រុកគាស់ក្រឡ បានធ្វើការបង្ក្រាបឃាត់ខ្លួនជនសង្ស័យ ១នាក់ ក្នុងករណីហិង្សាដោយចេតនាមានស្ថានទម្ងន់ទោស ដោយវាយ១ដំបងចំក្បាលបណ្តាលអោយបែកចំនួន៥ថ្នេរ ។
ករណីនេះកើតឡើងនៅថ្ងៃទី២៩ ខែមីនា ឆ្នាំ២០២១ វេលាម៉ោង០០និង២០នាទីរំលងអធ្រាត្រ ត្រង់ចំណុចភូមិសំរោង ឃុំឆ្នាល់មាន់ ស្រុកគាស់ក្រឡ ។
ជនសង្ស័យ ឈ្មោះ ស៊ុន សុខា ភេទប្រុស អាយុ៤៤ឆ្នាំ រស់នៅភូមិបឹងរាំង សង្កាត់អូរមាល់ ក្រុង-ខេត្តបាត់ដំបង មកស្នាក់នៅស៊ីឈ្នួលចាំចំការដាំដំឡូងមី ភូមិ-ឃុំខាងលើ បានយកដំបងឈើវាយទៅលើជនរងគ្រោះ១នាក់ឈ្មោះ សៀង ម៉េង ភេទប្រុស អាយុ ៤៨ឆ្នាំ រស់នៅភូមិស្ពានកណ្តាល ឃុំបវេល ស្រុកបវេល ខេត្តបាត់ដំបង មកស្នាក់នៅបណ្តោះអាសន្ននៅចំណុចខាងលើ។ ជនសង្ស័យបានយកដំបង១ដើមវាយចំក្បាលជនរងគ្រោះ បណ្តាលអោយបែកក្បាលដេរចំនួន៥ថ្នេរ ព្រោះមូលហេតុទំនាស់ពាក្យសំដីនឹងគ្នា (ជនរងគ្រោះជំពាក់លុយថ្លៃលក់ដំឡូងហើយមិនព្រមសង)។
ក្រោយពេលធ្វើការឃាត់ខ្លួន ជនសង្ស័យឈ្មោះ ស៊ុន សុខា បានសារភាពថា ខ្លួនពិតជាបានធ្វើសកម្មភាពវាយនឹងដំបងទៅលើជនរងគ្រោះពិតប្រាកដមែន ។
បច្ចុប្បន្ន ជនសង្ស័យរួមនឹងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី ៕
