បញ្ជូនជនសង្ស័យ២នាក់ ទៅតុលាការ ករណីរំលោភលើទំនុកចិត្ត ខ្ចីម៉ូតូគេជិះ តែមិនយកឲ្យម្ចាស់គេវិញចង់ស៊ីដាច់
បាត់ដំបង ៖ កម្លាំងនគរបាលព្រហ្មទណ្ឌនៃអធិការដ្ឋាននគរបាលក្រុងបាត់ដំបង បានឃាត់ខ្លួនជនសង្ស័យ២នាក់ ពាក់ព័ន្ធករណីរំលោភលើទំនុកចិត្ត ខ្ចីម៉ូតូម៉ាកហុងដាឌ្រីមធុនសេ១២៥ ស៊េរីឆ្នាំ២០២០ របស់ជនរងគ្រោះ យកទៅប្រើប្រាស់តែមិនយកមកសងខ្លួនវិញ ហើយសមត្ថកិច្ចបានបញ្ជូនជនសង្ស័យទាំង២នាក់ទៅកាន់សាលាដំបូងខេត្តបាត់ដំបង។
លោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានឲ្យដឹងថា កម្លាំងនគរបាលព្រហ្មទណ្ឌ នៃអធិការដ្ឋាននគរបាលក្រុងបាត់ដំបង បានទទួលបណ្តឹងពីឈ្មោះ ចាន់ ណាក់ ភេទប្រុស អាយុ២០ឆ្នាំ មានទីលំនៅ ភូមិតាហែន២ ឃុំរកា ស្រុកសង្កែ ខេត្តបាត់ដំបង ពាក់ព័ន្ធករណីរំលោភលើទំនុកចិត្ត ប្រព្រឹត្តនៅថ្ងៃទី១៤ ខែមិថុនា ឆ្នាំ២០២១ វេលាម៉ោង១៤និង០៥នាទី ត្រង់ចំណុចក្រុមទី៥ ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ។
តាមពាក្យបណ្តឹងរបស់ជនរងគ្រោះខាងលើ សម្ភារបាត់បង់ រួមមាន ម៉ូតូម៉ាកហុងដាឌ្រីមធុនសេ១២៥ ស៊េរីឆ្នាំ២០២០ ពណ៌ខ្មៅ ចំនួន១គ្រឿង ពាក់ផ្លាកលេខ បាត់ដំបង 1AI-0952 ដែលជនសង្ស័យចំនួន២នាក់ ខ្ចីយកទៅប្រើប្រាស់តែមិនយកមកសងខ្លួនវិញ។ កម្លាំងនគរបាលក្រុង បានធ្វើការស៊ើបអង្កេតស្រាវជ្រាវ និងមានការអនុញ្ញាត ឃាត់ខ្លួនតាមបញ្ជារបស់ឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្ត នៅថ្ងៃដដែល វេលាម៉ោង២១និង៣០នាទី ឃាត់ខ្លួនជនសង្ស័យចំនួន ២នាក់ ត្រង់ចំណុចក្រុមទី៣២ ភូមិវត្តលៀប សង្កាត់ចំការសំរោង ក្រុងបាត់ដំបង ខេត្តបាត់ដំបង។
ជនសង្ស័យ ទី១.ឈ្មោះ សាន សុធា (ហៅ ឆែប) ភេទប្រុស អាយុ ២១ឆ្នាំ មានទីលំនៅមិនពិតប្រាកដ និងទី២.ឈ្មោះ ឈឿ សុភាព (ហៅ ញ៉ាញ់) ភេទប្រុស អាយុ ១៨ឆ្នាំ មានទីលំនៅស្ថិតនៅភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង ។
នៅចំពោះមុខសមត្ថកិច្ច ជនសង្ស័យ បានសារភាពថា ពួកខ្លួនពិតជាបានយកម៉ូតូរបស់ជនរងគ្រោះឈ្មោះ ចាន់ ណាក់ ពិតប្រាកដមែន ក្នុងនោះសម្ភារៈដកហូតរួមមាន ម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០២០ ពណ៌ខ្មៅ ចំនួន១គ្រឿង ពាក់ផ្លាកលេខ បាត់ដំបង 1AI-0952 ជារបស់ជនរងគ្រោះ ហើយសមត្ថកិច្ចបានប្រគល់ជូនម្ចាស់ដើមវិញ។
ករណីនេះ កម្លាំងសមត្ថកិច្ច បានបញ្ជូនជនសង្ស័យទាំង២នាក់ទៅកាន់សាលាដំបូងខេត្ត ដើម្បីអនុវត្តបន្តតាមផ្លូវច្បាប់ ៕ 