បង្ក្រាបមុខសញ្ញាសង្ស័យ០២នាក់ ករណីជួញដូរ និងប្រើប្រាស់សារធាតុញៀន
បាត់ដំបង ៖ ដើម្បីភូមិ-ឃុំមានសុវត្ថិភាព នៅវេលាម៉ោង០៨និង៣០នាទីព្រឹក ថ្ងៃទី០៩ ខែតុលា ឆ្នាំ២០២១ កម្លាំងប៉ុស្តិ៍នគរបាលប៉ោយចារ ដើរល្បាតទៅភូមិកូនខ្លែង បានជួបមុខសញ្ញាម្នាក់សង្ស័យប្រើប្រាស់គ្រឿងញៀន ឈ្មោះ ធឿន ឡិ ភេទប្រុស អាយុ១៦ឆ្នាំ រស់នៅភូមិកូនខ្លែង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ នៅចំណុចលូតាកើស(ផ្លូវលំពីភូមិកុងសៀមទៅភូមិកូនខ្លែង) ក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ។ ក្រោយពីឃាត់ខ្លួន សមត្ថកិច្ចបានធ្វើតេស្តរកសារធាតុញៀន លទ្ធផល វិជ្ជមាន រួចបាននាំយកសាកសួរបន្តនៅប៉ុស្តិ៍ដើម្បីស្រាវជ្រាវរកមុខសញ្ញាពាក់ព័ន្ធបន្ថែម ។
នគរបាលបានឲ្យដឹងថា តាមចម្លើយសារភាពរបស់ឈ្មោះ ធឿន ឡិ ថ្នាំញៀនដែលគេទិញមកប្រើប្រាស់ជាប្រភេទម៉ាទឹកកក ពីមនុស្សម្នាក់ មិនស្គាល់ឈ្មោះ អាយុប្រហែល៣១ឆ្នាំ នៅភូមិព្រះអណ្ដូង ឃុំប៉ោយចារ ស្រុកភ្នំស្រុក ដោយទិញបានចំនួន០២ដង ក្នុងម្តងតម្លៃ២០,០០០រៀល នៅពេលទិញជួនណាត់គ្នាមកចំណុចលូតាកើស(ផ្លូវលំពីភូមិកុងសៀមទៅភូមិកូនខ្លែង) ជួនទៅទិញនៅផ្ទះតែម្តង ។
នគរបាលបានបញ្ជាក់ថា ក្រោយពីទទួលបានព័ត៌មាន កម្លាំងនគរបាលប៉ុស្តិ៍រដ្ឋបាលប៉ោយចារនិងកម្លាំងជំនាញផ្នែកប្រឆាំងគ្រឿងញៀននៃអធិការដ្ឋាននគរបាលស្រុកភ្នំស្រុក បានធ្វើការស្រាវជ្រាវឈានទៅឃាត់ខ្លួនមុខសញ្ញាសង្ស័យឈ្មោះ យស់ ក្រឹម ភេទប្រុសអាយុ៣១ឆ្នាំ នៅភូមិព្រះអណ្ដូង ឃុំប៉ោយចារ នៅចំណុចភូមិកុងសៀម ឃុំណាំតៅ ស្រុកភ្នំស្រុកខេត្តបន្ទាយមានជ័យ ។
ក្នុងនោះរកឃើញមានវត្ថុតាង ៖ ១-ម្ស៉ៅក្រាមពណ៌សថ្លាសង្ស័យជាសារធាតុញៀនចំនួន២ថង់តូច និង៤កំណាត់ទុយោបំពង់ជ័រតូច, ២-ទូរស័ព្ទដៃចំនួន១គ្រឿងម៉ាក Vivo ពណ៌ខ្មៅ, ៣-កាបូបដាក់ប្រាក់១, ៤-ប្រាក់រៀលចំនួន២៥០០០រៀល, ៥-ដែកកេះ ២, ៦-ម៉ូតូចាស់១គ្រឿង ។
បច្ចុប្បន្ន ជនសង្ស័យទាំង០២នាក់ និងវត្ថុតាងកម្លាំងជំនាញបញ្ជូនមកអធិការដ្ឋាន ដើម្បីរៀបចំសំណុំរឿងតាមនីតិវិធី ៕