តើត្រូវសិក្សាលើចំណុចអ្វីខ្លះ ដើម្បីជៀសវាងកុំឲ្យទិញប៉ះចំដីដែលមានជម្លោះ ឬវិវាទ?
ភ្នំពេញ ៖ តើកន្លងមកអ្នកធ្លាប់ទិញប៉ះចំដីធ្លីដែលមានជម្លោះ ឬវិវាទដែរឬទេ? នៅកម្ពុជាយើង ការចុះបញ្ជីអចលនទ្រព្យប្រភេទដីធ្លីនៅតែមានបញ្ហាច្រើន ដោយប្រជាពលរដ្ឋមួយចំនួនកាន់កាប់ដីធ្លីដោយគ្មានលិខិតបញ្ជាក់កម្មសិទ្ធិ និងខ្លះទៀតកាន់កាប់ដោយខុសច្បាប់។ ក៏ព្រោះតែភាពមិនច្បាស់លាស់ តែងតែបង្កឱ្យមានរឿងក្ដីក្ដាំង ឬវិវាទរវាងអ្នកទិញ និងលក់អចលនទ្រព្យ ដូច្នេះហើយដើម្បីជៀសវាងកុំឲ្យទិញប៉ះចំដីដែលមានជម្លោះ ឬវិវាទ អ្នកទិញគួរតែប្រុងប្រយ័ត្នមុននឹងចុះកិច្ចសន្យាជាមួយអ្នកលក់។
មុននឹងចាប់ផ្តើមចុះកិច្ចសន្យា តើត្រូវពិចារណាលើចំណុចណាខ្លះ ដើម្បីជៀសវាងការទិញដីដែលមានជម្លោះ ឬវិវាទ? ខាងក្រោមនេះជាចំណុចសំខាន់ចំនួន៤ ដែលត្រូវពិចារណាមុននឹងចុះកិច្ចសន្យាទិញដី។
ប្រភេទបណ្ណកាន់កាប់របស់ម្ចាស់ដី
អ្នកទិញត្រូវពិនិត្យមើលថាតើបណ្ណកម្មសិទ្ធិកាន់កាប់ដីរបស់ម្ចាស់ដីគឺជាប្លង់ទន់ ឬរឹង។ បើជាប្លង់រឹង មានន័យថា ម្ចាស់ដីមានកម្មសិទ្ធិពេញលេញលើដីដែលមានការទទួលស្គាល់ពីថ្នាក់ជាតិដោយស្របច្បាប់។ ការមានបណ្ណកាន់កាប់ដីប្រភេទនេះ កាន់តែមានភាពជឿជាក់សម្រាប់អ្នកទិញ ព្រោះអ្នកអាចដឹងពីទំហំដី ទីតាំងដី និងឈ្មោះម្ចាស់ដី។
តែបើជាប្លង់ទន់ មានន័យថា ម្ចាស់ដីគ្រាន់តែកាន់កាប់ដីស្របច្បាប់ មានសិទ្ធិលក់ ប៉ុន្តែមិនមានកម្មសិទ្ធិពេញលេញលើដីនោះទេ។ ដីនេះត្រូវបានទទួលស្គាល់ត្រឹមថ្នាក់ឃុំ ឬសង្កាត់ប៉ុណ្ណោះ។ ក្នុងករណីនេះ អ្នកទិញគួរប្រយ័ត្នឲ្យបានច្រើនមុននឹងទិញដី។
ស្ថានភាពដីធ្លី
បន្ទាប់ពីបានដឹងច្បាស់អំពីប្រភេទបណ្ណកាន់កាប់ដីថាជាប្លង់ទន់ ឬរឹង អ្នកទិញគួរតែមើលជុំវិញដីធ្លីនោះ ដើម្បីពិនិត្យមើលថាតើមានដីផ្សេងទៀតដែលមានរបង ឬព្រំប្រទល់ច្បាស់លាស់នៅជាប់ដីដែរឬទេ។ បើឃើញថាដីនោះគ្មានព្រំដែនទេ ចាំបាច់ត្រូវវាស់ដីកំណត់ព្រំដែនឲ្យច្បាស់លាស់មុននឹងចុះកិច្ចសន្យា។ ហើយការវាស់វែងដីត្រូវធ្វើដោយមានវត្តមានអាជ្ញាធរសុរិយោដី។
បន្ទុកលើដីធ្លី
ត្រង់ចំណុចនេះ អ្នកត្រូវពិនិត្យមើលថាតើដីធ្លីនោះត្រូវបានដាក់ជាអចលនទ្រព្យបញ្ចាំធានាបំណុល ឬដីនោះគឺជាកម្មវត្ថុជាប់បណ្តឹងតុលាការដែលត្រូវរឹបអូសឬទេ។ ប្រសិនបើបែបនេះ មុនអ្នកសម្រេចចិត្តទិញ អ្នកគួរតែទាមទារឱ្យមាននីតិវិធីតាមផ្លូវច្បាប់មួយ ដើម្បីធ្វើការដោះស្រាយឱ្យបានដាច់ស្រេច មុនឈានដល់ការចុះកិច្ចសន្យាទិញលក់។
ដីជាចំណីផ្លូវ ឬប្រើសម្រាប់អភិវឌ្ឍន៍
ដោយសារកម្ពុជាគឺជាប្រទេសកំពុងអភិវឌ្ឍន៍ ដូចនេះហើយទើបការអភិវឌ្ឍន៍ហេដ្ឋារចនាសម្ព័ន្ធគឺជាអាទិភាពចម្បងគេ។ ដូច្នេះមុននឹងទិញដី អ្នកត្រូវពិនិត្យមើលថាតើវានឹងត្រូវកាត់សម្រាប់គម្រោងរបស់រដ្ឋាភិបាល នៃការអភិវឌ្ឍផ្លូវនាពេលអនាគតឬទេ។ បើកាត់ដីសម្រាប់អភិវឌ្ឍផ្លូវ តើដីនោះនឹងប៉ះពាល់ដល់កម្រិតណា?
បន្ទាប់ពីអ្នកវិភាគយ៉ាងល្អិតល្អន់អំពីចំណុចទាំងបួនខាងលើ អ្នកនឹងមិនមានកំហុសឆ្គង ឬមានមានអារម្មណ៍សោកស្តាយ ក្រោយពេលចុះកិច្ចសន្យាទិញដីដែលអ្នកពេញចិត្តនោះទេ។
តាមដានព័ត៌មានផ្សេងៗទាក់ទងនឹងការអភិវឌ្ឍន៍ ជាពិសេសវិស័យអចលនទ្រព្យ សូមចូលទៅកាន់គេហទំព័រ Harbor property និងកម្មវិធីទូរសព្ទដៃដោយសរី៕
អំពីសេវាកម្ម ឬចម្ងល់ផ្សេងៗសូមទំនាក់ទំនងយើងខ្ញុំតាមរយៈ 096 7876 902 (Telegram)/ 066 886633
WeChat: HB066886633