ទីផ្សារអចលនទ្រព្យកម្ពុជាឆ្នាំ២០២១ និងចក្ខុវិស័យឆ្នាំ២០២២
ភ្នំពេញ ៖ បន្ទាប់ពីការផ្ទុះឡើងនៃជំងឺកូវីដ១៩ ទ្រង់ទ្រាយធំនៅកម្ពុជាក្នុងឆ្នាំ ២០២០ និងឆ្នាំ ២០២១ វិស័យអចលនទ្រព្យស្ថិតក្នុងចំណោមវិស័យដែលងាយរងគ្រោះបំផុត ហើយឧស្សាហកម្មនៅតែបន្តរងការវាយប្រហារយ៉ាងធ្ងន់ធ្ងរដោយសារជំងឺដ៏កាចសាហាវរហូតមកដល់បច្ចុប្បន្ន។ទោះជាយ៉ាងណាក៏ដោយ រដ្ឋាភិបាលកម្ពុជាបានបើកប្រទេសឡើងវិញនៅក្នុងខែវិច្ឆិកាឆ្នាំនេះ ដើម្បីបន្ធូរបន្ថយផលប៉ះពាល់ ដោយសង្ឃឹមថាវិនិយោគគិនបរទេសនឹងត្រឡប់មកបណ្តាក់ទុន និងធ្វើឱ្យវិស័យនេះរីកចម្រើនម្តងទៀត។
អ្នកស្រី តាំង ហួរ អគ្គនាយិការក្រុមហ៊ុន Amatak Property Service Co.,Ltd. មានប្រសាសន៍ថា៖ «បន្ទាប់ពីការរីករាលដាលនៃជំងឺកូវីដ១៩ នៅប្រទេសកម្ពុជា រយៈពេល ២ឆ្នាំ ក្នុងឆ្នាំ២០២០ និងឆ្នាំ២០២១ វិស័យអចលនទ្រព្យបានបង្ហាញពីសញ្ញានៃការលក់យឺតស្ទើរតែគ្រប់ផ្នែកក្នុងវិស័យមួយនេះ ជាពិសេសខុនដូលំដាប់ខ្ពស់ ដែលត្រូវពឹងផ្អែកខ្លាំងលើអតិថិជនពីបរទេស »។
អ្នកស្រីបានបន្ថែមថា ទោះជាយ៉ាងណាក៏ដោយ អចលនទ្រព្យដីធ្លី និងលំនៅឋានតម្លៃសមរម្យដែលមានតម្លៃចន្លោះពី ៥០,០០០ ដុល្លារ ទៅ ៨០,០០០ ដុល្លារ នៅតែដំណើរការល្អក្នុងអំឡុងពេលមានវិបត្តិជំងឺកូវីដ១៩ ដោយសារតែអ្នកអភិវឌ្ឍន៍ផ្តោតលើអតិថិជនក្នុងស្រុកភាគច្រើន ដែលមានតម្រូវការអចលនទ្រព្យប្រភេទទាំងនេះ។
ទន្ទឹមនឹងនេះ ប្រជាជនកម្ពុជាបានទទួលវ៉ាក់សាំងបង្ការជំងឺកូវីដ១៩ស្ទើរតែទូទាំងប្រទេស ជាមួយការបើកប្រទេសឡើងវិញទៀតនោះ អ្នកស្រី តាំង ហួរ ជឿជាក់ថា អចលនទ្រព្យដីធ្លី និងលំនៅឋានតម្លៃសមរម្យនឹងបន្តដំណើរការល្អនៅឆ្នាំ២០២២។
លើសពីនេះ ដោយសារកិច្ចសហប្រតិបត្តិការរបស់អ្នកអភិវឌ្ឍន៍ជាមួយធនាគារភាគច្រើន បានផ្តល់រយៈពេលទូទាត់ដែលអាចបត់បែនបាន និងរយៈពេលទូទាត់យូរជាងមុនចំពោះ អតិថិជនក្នុងស្រុក។ ក្រៅពីនេះ គម្រោងខុនដូដែលមានតម្លៃសមរម្យដែលមានតម្លៃចន្លោះពី ៥ម៉ឺនដុល្លារ ទៅ ១០ម៉ឺនដុល្លារ ក៏នឹងមានឱកាសជោគជ័យខ្ពស់ក្នុងឆ្នាំ ២០២២ នេះផងដែរ។
ជាមួយគ្នានេះ លោក អ៊ា ចរិយា អគ្គនាយកក្រុមហ៊ុន AP Real Estate មានប្រសាសន៍ថា នៅឆ្នាំ២០២០ និង២០២១ អ្នកដែលបានទិញដីសង្ឃឹមថានឹងលក់បន្តបានប្រាក់ចំណេញ ទទួលរងខ្លាំងបំផុតពីផលប៉ះពាល់ដ៏អាក្រក់នៃជំងឺរាតត្បាតកូវីដ-១៩ ក៏ព្រោះយើងមិនអាចទស្សន៍ទាយដឹងមុនបានថានៅពេលណាសេដ្ឋកិច្ច និងវិស័យអចលនទ្រព្យត្រឡប់ទៅដូចដើមវិញមុនសម័យមានវិបត្តិជំងឺដ៏កាច់សាហាវនេះ។
អនាគតនៅតែមិនប្រាកដប្រជា ហើយវាអាស្រ័យលើស្ថានភាពកូវីដ នៅក្នុងប្រទេសកម្ពុជា និងជុំវិញពិភពលោកថាតើនឹងប្រសើរឡើងឬអត់។ លោកបានបន្ថែមថា ប្រសិនបើស្ថានការណ៍ប្រសើរឡើង វិនិយោគគិនបរទេសអាចនឹងត្រឡប់មកវិញ ហើយវិស័យខុនដូទំនងជាមានការលក់ច្រើនជាងនេះ។
នៅឆ្នាំ២០២២នេះ លោកជឿជាក់ថាទីផ្សារលំនៅឋាននៅជាយក្រុងភ្នំពេញនឹងមានតម្រូវការខ្ពស់ដោយសារតែការពង្រីកទីក្រុងរួមជាមួយនឹងការអភិវឌ្ឍន៍ហេដ្ឋារចនាសម្ព័ន្ធ ជាពិសេសផ្លូវជាតិ និងផ្លូវក្រវ៉ាត់ក្រុង។ នាពេលអនាគត ចំពោះគ្រួសារដែលមានចំណូលទាប និងមធ្យមភាគច្រើនមិនអាចមានលទ្ធភាពទិញផ្ទះថ្លៃៗនៅកណ្តាលទីក្រុងទៀតទេ។
នៅក្នុងបទសម្ភាសន៍ជាមួយសារព័ត៌មានក្នុងស្រុករវាង Construction & Property និងលោកបណ្ឌិត គីម ហ៊ាង អគ្គនាយកក្រុមហ៊ុន KW Cambodia មិនបានរំពឹងថាទីផ្សារនឹងងើបឡើងវិញដល់កម្រិតឆ្នាំ២០១៩ នៅឡើយទេ។ លោកបណ្ឌិត គីម ហ៊ាង បានមានប្រសាសន៍ថា នៅក្នុងឆ្នាំ២០២២ និងតទៅមុខទៀត ថាតើទីផ្សារអចលនទ្រព្យនឹងងើបឡើងវិញឬអត់ គឺអាស្រ័យលើកត្តាសំខាន់ៗចំនួនបី ជាមួយនឹងភាពមិនប្រាកដប្រជា។
«សម្រាប់ពេលអនាគតមិនទាន់មានភាពប្រាកដប្រជាអ្វីទាំងអស់។ ហើយការបើកប្រទេសឡើងវិញគឺជាសញ្ញាល្អ។ យ៉ាងណាមិញ ប្រសិនបើវិនិយោគិនបរទេស ដែលជាកត្តាសំខាន់ទី១ មិនត្រឡប់មកវិញនោះទេ ទីផ្សារនឹងនៅទ្រឹងដូចបច្ចុប្បន្ន ដោយសារទីផ្សារក្នុងស្រុកមានទំហំតូចនៅឡើយ»។
«ខ្ញុំមិនរំពឹងច្រើនក្នុងឆ្នាំ២០២២ នេះទេ ហើយខ្ញុំក៏មិនរំពឹងថានឹងមានវិនិយោគគិនថ្មីមកនោះដែរ។ គ្រាន់តែធ្វើឱ្យអ្នកដែលបានវិនិយោគដែលបានចាកចេញក្នុងអំឡុងពេលមានជំងឺរាតត្បាតត្រឡប់មកវិញ គឺជាអ្វីដែលល្អបំផុតដែលយើងអាចធ្វើបាន »។
ក្រៅពីវិនិយោគិនបរទេស ប្រភពដើមទុនពីរផ្សេងទៀតដែលនឹងជួយចាប់ផ្តើមទីផ្សារពិតប្រាកដ គឺអ្នកមានខ្មែរនៅក្រៅប្រទេស និងសេដ្ឋីក្នុងស្រុក។
«ក្នុងពេលលំបាកបែបនេះ ខ្ញុំចង់ឲ្យប្រជាជនខ្មែរដែលរស់នៅក្រៅប្រទេសដែលធូរធារអាចពិចារណាដាក់ទុនវិនិយោគនៅក្នុងប្រទេសកម្ពុជាយើង។ ប្រសិនបើពួកគាត់មកវិនិយោគនៅក្នុងស្រុក ទីផ្សារនឹងមានការរីកចម្រើនយ៉ាងខ្លាំងនៅឆ្នាំក្រោយ ដោយសារតែយើងនឹងមានលំហូរសាច់ប្រាក់ក្នុងស្រុកឡើងវិញ»។
ទន្ទឹមនឹងនេះ អ្នកមានក្នុងស្រុកក៏គួរបន្តវិនិយោគបន្ថែមទៀតដើម្បីរក្សាតុល្យភាពទីផ្សារមួយនេះនៅបន្តទៅមុខ។ លោកបានបន្ថែម ដោយបានថ្លែងអំណរអរគុណចំពោះការអភិវឌ្ឍន៍ក្នុងស្រុក នៃអនុវិស័យអចលនទ្រព្យដូចជាដីធ្លី និងបុរី ដែលបានដំណើរការយ៉ាងល្អ ទោះបីជាក្នុងអំឡុងពេលនៃការរីករាលដាលជំងឺកូវីដក៏ដោយ»។
តាមដានព័ត៌មានផ្សេងៗទាក់ទងនឹងការអភិវឌ្ឍន៍ ជាពិសេសវិស័យអចលនទ្រព្យ សូមចូលទៅកាន់គេហទំព័រ Harbor property និងកម្មវិធីទូរសព្ទដៃដោយសរី៕
អំពីសេវាកម្ម ឬចម្ងល់ផ្សេងៗសូមទំនាក់ទំនងយើងខ្ញុំតាមរយៈ 096 7876 902 (Telegram)/ 066 886633
WeChat: HB066886633