អាផាតមិននៅបឹងកេងកង និងទួលទំពូង រក្សាកំណើន នៃការជួលខ្ពស់ទោះវិបត្តិកូវីដ១៩
អស់រយៈពេលជាងពីរឆ្នាំនៃការរាតត្បាតនៃជំងឺកូវីដ-១៩ វិស័យអចលនទ្រព្យនៅប្រទេសកម្ពុជាបានរងនូវផលប៉ះពាល់យ៉ាងខ្លាំង ជាពិសេសនៅពេលដែលមានការរឹតបន្តឹងការធ្វើដំណើរ ដែលបណ្ដាលឱ្យអតិថិជនបរទេសជួលអាផាតមិនធ្លាក់ចុះ។
ទីផ្សារអចលនទ្រព្យដូចជាអាផាតមិន ដែលពឹងផ្អែកខ្លាំងលើអតិថិជនបរទេសបានជួបប្រទះនឹងអត្រាជួលធ្លាក់ចុះ ប៉ុន្តែខណៈពេលដែលអាផាតមិនមួយចំនួនកំពុងជួបការលំបាកក្នុងការស្វែងរកអ្នកជួល គម្រោងសំខាន់ៗផ្សេងទៀតដែលមានទីតាំងល្អ និងការគ្រប់គ្រងគុណភាពល្អត្រូវបានគេមើលឃើញថានៅតែមានអត្រាជួលខ្ពស់ ទោះបីជាមានការរីករាលដាលនៃជំងឺរាតត្បាតក៏ដោយ។
យោងតាមរបាយការណ៍ CBRE Cambodia ត្រីមាសទី 4 ឆ្នាំ 2021 បានបង្ហាញថា ទោះបីជាមានផលប៉ះពាល់អវិជ្ជមាននៃការរាតត្បាត Covid-19 មកលើវិស័យអចលនទ្រព្យរបស់កម្ពុជាក៏ដោយ ក៏អាផាតមិនមួយចំនួន ជាពិសេសគម្រោងដែលមានទីតាំងនៅកណ្ដាលក្រុងដូចជានៅក្នុងតំបន់បឹងកេងកង និងទួលទំពូងនៅតែរក្សាបាននូវអត្រាជួលខ្ពស់។
របាយការណ៍ដដែលបានបន្តថា ភាពជោគជ័យនៃគម្រោងអាផាតមិនសំខាន់ៗត្រូវបានជំរុញដោយ ភ្ញៀវជនបរទេសប្រាក់ខែខ្ពស់ដែលស្វែងរកសុវត្ថិភាពនៅក្នុងគម្រោង ដែលមានទីតាំងល្អក្នុងអំឡុងពេលជំងឺរាតត្បាតកូវីដ១៩។
ទីផ្សារអាផាតមិននៅតែមានស្ថេរភាពល្អពេញមួយឆមាសចុងក្រោយនៃឆ្នាំ២០២១។ ក្នុងត្រីមាសចុងក្រោយនៃឆ្នាំ 2021 ទីផ្សារបានស្វាគមន៍គម្រោងថ្មីចំនួន 3 គឺ Sophea Apartment, Baramii និង Amata ។ ត្រីមាសទី 4 មានការប្រកាសគម្រោងថ្មីតែមួយគត់ ដែលជាការធ្លាក់ចុះនៃការផ្គត់ផ្គង់ បង្ហាញពីឱកាសសម្រាប់ស្ថេរភាពបន្ថែមទៀតនៃអត្រាជួលអាផាតមិន។
ទោះជាយ៉ាងណាក៏ដោយ ដោយសារការថយចុះចំនួនអ្នកទេសចរនៅក្នុងប្រទេសកម្ពុជា ទីផ្សារអាផាតមិនទាំងមូលមានកំណើនអវិជ្ជមាន។ អាផាតមិនលំដាប់ A និងថ្នាក់ B បានបន្តធ្លាក់ថ្លៃជួលចន្លោះពី -2.5% និង -4.8% រៀងគ្នា ធៀបនឹងឆមាសដូចគ្នាកាលពីឆ្នាំមុន។ ជាមធ្យម អាផាតមិនថ្នាក់ A ត្រូវបានគេស្រង់តម្លៃប្រហែល ២១ ដុល្លារក្នុងមួយម៉ែត្រការ៉េក្នុងមួយខែ ខណៈអផាតមិនថ្នាក់ B មានតម្លៃលើសពី ១៤ ដុល្លារក្នុងមួយម៉ែត្រការ៉េ។
របាយការណ៍បានកត់សម្គាល់ថា ដើម្បីទាក់ទាញអ្នកជួល និងរក្សាការប្រកួតប្រជែងក្នុងទីផ្សារ ប្រតិបត្តិករបានផ្តល់នូវការបញ្ចុះតម្លៃ និងខិតខំប្រឹងប្រែងក្នុងការរចនា ផ្ដល់បរិក្ខារបន្ថែម ជាមួយនឹងការកែលម្អការគ្រប់គ្រង និងសេវាកម្មអតិថិជនដល់ភ្ញៀវ។
អំពីសេវាកម្ម ឬចម្ងល់ផ្សេងៗសូមទំនាក់ទំនងយើងខ្ញុំតាមរយៈ៖
Hotline: 096 7876 902 (Telegram)/ 066 886633
WeChat: HB066886633