សម្ដេចម៉ែន សំអន៖ គ្រប់គណបក្សនយោបាយ ដែលកំពុងឃោសនា រកការគាំទ្រគណបក្សរបស់ខ្លួន គឺប្រព្រឹត្តទៅបានក្រោមម្លប់ នៃសុខសន្តិភាពរបស់គណបក្សប្រជាជនកម្ពុជា

ស្វាយរៀង៖ សម្ដេចកិត្ដិសង្គហបណ្ឌិត ម៉ែន សំអន បានបន្ដ ចុះឃោសនារកសម្លេងឆ្នោត នៅខេត្ដស្វាយរៀង ក្នុងឱកាស នៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រអណត្តិទី៧ សម្ដេចកិត្តិសង្គហបណ្ឌិត អនុប្រធានគណបក្សប្រ ជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា បានចុះជួបសំណេះសំណាលជាមួយសមាជិក សមាជិកា គណបក្សប្រជាជនកម្ពុជានិងបង្រៀនគូសសន្លឹកឆ្នោត ដល់សមាជិកបក្ស១.២០០នាក់ នៅឃុំពងទឹក ស្រុករំដួល និង ឃុំក្រោលគោ ស្រុកស្វាយជ្រំ ខេត្តស្វាយរៀង នាព្រឹកថ្ងៃទី១៦ ខែកក្កដា ឆ្នាំ២០២៣។
សម្តេចបណ្ឌិត ម៉ែន សំអន បានថ្លែងគូសបញ្ជាក់ថា សមាជិក សមាជិកា ត្រូវជឿជាក់លើគណបក្សប្រជាជន និងបន្តបោះឆ្នោតជូនគណបក្សប្រជាជន គឺបន្តអភិវឌ្ឍន៍ប្រទេស។  ចំណែកឯគណបក្សនយោបាយទាំង ១៨ ដែលកំពុងធ្វើការឃោសនារកសម្លេងឆ្នោត ដើម្បីទទួលបានការគាំទ្រគណបក្សរបស់ខ្លួន គឺប្រព្រឹត្តទៅបានក្រោមម្លប់នៃសុខសន្តិភាពរបស់គណបក្សប្រជាជនកម្ពុជា ។
សម្តេចកិត្តិសង្គហបណ្ឌិតម៉ែន សំអន បានបន្តថា៖ រយៈ កាលជាង ៤៤ឆ្នាំមកនេះ គណបក្ស ប្រជាជនកម្ពុជា បានខិតខំថែរក្សា និងការពារសុខសន្តិភាព ដែលរកបានមកយ៉ាងលំបាក ហើយបានបន្តជម្រុញការអភិវឌ្ឍប្រទេសជាតិ ក្រោម ការដឹកនាំប្រកបដោយគតិបណ្ឌិត និងមានចក្ខុវិស័យវែងឆ្ងាយ របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានធ្វើឲ្យប្រទេសជាតិ មានសុខសន្តិភាព និងការអភិវឌ្ឍន៍លើគ្រប់វិស័យ ព្រមទាំងជាប្រទេសដែលប្រកាន់យកនូវលទ្ធិប្រជាធិបតេយ្យ សេរីពហុបក្ស ។
សម្តេចកិត្តិសង្គហបណ្ឌិតម៉ែន សំអន ក៏បានអំពាវនាវឲ្យប្រជាពលរដ្ឋទាំងអស់គ្នា សូមអញ្ជើញទៅបោះឆ្នោតនៅថ្ងៃទី ២៣ ខែកក្កដា ឆ្នាំ២០២៣ ឱ្យបានគ្រប់គ្នា ពិសេស គឺត្រូវបោះឆ្នោតជូនគណបក្សប្រជាជនកម្ពុជា ដែលមានរូបសញ្ញា «ទេវតាបាចផ្កា» ដែលមានលេខរៀងទី ១៨ ក្នុងសន្លឹកឆ្នោត និងបានអំពាវនាវដល់ប្រជាពលរដ្ឋដែលមានសិទ្ធបោះឆ្នោត ត្រូវគូសលើសន្លឹកឆ្នោតឲ្យបានត្រឹមត្រូវ ដើម្បីរក្សាតម្លៃនៃសន្លឹកឆ្នោត ស្របតាមទិសស្លោក សន្លឹកឆ្នោតមួយសន្លឹក ជាការគាំទ្រគណបក្សប្រជាជនមួយសម្លេង និងបានចូលរួមចំណែកក្នុងការអភិវឌ្ឍប្រទេសជាតិ ។
សូមបញ្ជាក់ថា សម្តេចកិត្តិសង្គហបណ្ឌិត និងក្រុមការងារ ក៏បានបង្រៀន សមាជិក សមាជិកាបក្សឲ្យចេះគូសសន្លឹកឆ្នោត និងបោះឆ្នោត នៅថ្ងៃទី២៣ កក្ដដា២០២៣នេះ ផងដែរ ៕. សំរិត