គណនីហ្វេសប៊ុកមួយ បង្ហោះរូបភាព និងសរសេរខ្លឹមសារថា មន្រ្តីនគរបាលប៉ុស្តិ៍តាម៉ឺន ធ្វើទារុណ្ឌកម្មទៅលើក្មេងប្រុស នៅបរិវេណប៉ុស្តិ៍នគរបាលរដ្ឋបាលរបស់ខ្លួន
បាត់ដំបង ៖ ក្រុមការងារព័ត៌មាននិងប្រតិកម្មរហ័ស នៃស្នងការដ្ឋាននគរបាលខេត្តបាត់ដំបង នៅថ្ងៃទី២៧ខែកក្កដាឆ្នាំ ២០២៣ បានឲ្យដឹងថា នាប៉ុន្មានម៉ោងមុននេះ មានគណនីហ្វេសប៊ុកឈ្មោះ David jhon បានបង្ហោះរូបភាព និងសរសេរខ្លឹមសារចោទប្រកាន់ចំពោះមន្រ្តីនគរបាលប៉ុស្តិ៍តាម៉ឺន នៃអធិការដ្ឋាននគរបាលស្រុកថ្មគោល ថាបានធ្វើទារុណ្ឌកម្មទៅលើក្មេងប្រុស នៅបរិវេណប៉ុស្តិ៍នគបាលរដ្ឋបាលរបស់ខ្លួន កាលពីថ្ងៃទី២០ខែកក្កដាឆ្នាំ ២០២៣ កន្លងមក។
ពិនិត្យឃើញខ្លឹមសារនេះលោកឧត្តមសេនីយ៍ទោ សាត គឺមសាន ស្នងការនៃស្នងការដ្ឋាននគរបាលខេត្តបាត់ដំបង បានដាក់បទបញ្ជាភ្លាមៗ ដល់ក្រុមការងារប្រតិកម្មរហ័សនៃស្នងការដ្ឋាន ជាមួយការិយាល័យបុគ្គលិក ធ្វើការស្រាវជ្រាវស៊ើបអង្កេតជាបន្ទាន់លើបញ្ហាដែលម្ចាស់គណនីខាងលើបានសរសេរបង្ហោះ ។
ក្នុងករណីស្រាវជ្រាវរកឃើញថា មន្រ្តីនគរបាលដែលទទួលរងនូវការចោទប្រកាន់នោះបានប្រព្រឹត្តិដូច្នេះមែននោះមន្រ្តីនគរបាលរូបនោះនឹងទទួល ខុសត្រូវទាំងស្រុងចំពោះសកម្មភាពរបស់ខ្លួនចំពោះមុខច្បាប់ ចំពោះមុខវិន័យលេខ០០៦ របស់កងកម្លាំងនគរ បាលជាតិ ។ ហើយក្នុងករណីដែលសមត្ថកិច្ចស្រាវជ្រាវរកឃើញថា ករណីនេះពុំមែនជាការពិតទេនោះ ម្ចាស់គណនីខាងលើ ក៏ត្រូវប្រឈមនឹងការចោទប្រកាន់ចំពោះការផ្សព្វផ្សាយព័ត៌មានមិនពិត និងការចោទប្រកាន់ ទំលាក់កំហុសចំពោះ មន្រ្តីអ្នកអនុវត្តច្បាប់ដោយចេតនាទុច្ចរិតផងដែរ។
សូមជម្រាបជូនថា កាលពីថ្ងៃទី ២០ខែកក្កដាឆ្នាំ២០២៣ វេលាម៉ោង១៨និង៣០នាទី នៅចំណុចក្រុមទី២៥ ភូមិគោកត្រប់ ឃុំតាម៉ឺន ស្រុកថ្មគោលមានករណីហិង្សាដោយចេតនា(ប្រើប្រាស់កាំ-បិត)បង្កដោយក្រុម ក្មេងចំនួន០១ក្រុម(មិនស្គាល់អត្តសញ្ញាណ)ដេញកា-ប់មកលើមនុស្សមួយក្រុមដែលកំពុងអង្គុយលេង នៅស្រះទឹកម្តុំបត់កងតែត្រូវបានអ្នកអង្គុយឃើញទាន់ក៏រត់គេចខ្លួន នៅសល់តែស្រីៗហើយត្រូវបានក្រុមនោះគំរាមកំហែងរកកា-ប់ស-ម្លា-ប់លើជនរងគ្រោះឈ្មោះ លោម លីដា ភេទស្រី អាយុ១៦ឆ្នាំ រស់នៅភូមិគោកក្តួច ឃុំតាពូង ស្រុកថ្មគោល ខេត្តបាត់ដំបង ដោយយកកាំ-បិ-ត-ខ្វែវ អូសពីលើជើងជនរងគ្រោះបណ្តាលឱ្យរងរបួស ។
ពេលបន្ទាប់ភាគីបង្កបានជិះម៉ូតរត់គេចខ្លួន ប៉ុន្តែភ្លាមៗព័ត៌មាននេះត្រូវបានកម្លាំងប៉ុស្តិ៍នគរបាលរដ្ឋបាលតាម៉ឺន នៃអធិការដ្ឋាននគរបាលស្រុកថ្មគោលដេញតាមចាប់ ខណៈភ័យស្លន់ជនបង្កជិះម៉ូតូដួលដោយខ្លួនឯង ក៏ត្រូវបានកម្លាំងប៉ុស្តិ៍នគរបាលរដ្ឋបាលឃាត់ខ្លួនបានចំនួន០៣នាក់គឺ៖
១-ឈ្មោះ រឿង ចន្ថា ហៅ វ៉ិត ភេទប្រុស អាយុ២១ឆ្នាំរស់នៅភូមិតាមាឃ ឃុំគោកឃ្មុំ ស្រុកថ្មគោល (រងរបួសដួលម៉ូតូខ្លួនឯង)
២-ឈ្មោះជា រតនា ភេទប្រុស អាយុ១៥ឆ្នាំរស់នៅភូមិកៀនកែស២ ឃុំគោកឃ្មុំ ស្រុកថ្មគោល (រងរបួសដួល ម៉ូតូ ខ្លួនឯង)
៣-ឈ្មោះ ខុម សុឃីត ភេទប្រុស អាយុ១៧ឆ្នាំរស់នៅភូមិច្រនៀង ឃុំគោកឃ្មុំ ស្រុកថ្មគោល(រង របួសដួល ម៉ូតូ ខ្លួនឯង) ។
-*សមត្ថកិច្ចដកហូតសម្ភារៈតាងរួមមាន៖
-ម៉ូតូចំនួន០១គ្រឿងម៉ាកហុងដាឌ្រីម ស៊េរី២០២២ ពណ៌ខ្មៅ ពាក់ស្លាកលេខបាត់ដំបង1AS.5349
-កាំ-បិ-តខ្វែវផ្លែដែកដងដែកប្រវែង៧៩សង់ទីម៉ែត្រចំនួន០១ដើម ។
ចំពោះមូលហេតុគឺជនបង្កបានសារភាពថា មុនពេលកើតហេតុនេះគឺមានក្រុមក្មេងមួយក្រុមគប់ដុំថ្មមកលើពួកខ្លួន ទើបពួកខ្លួនប្រើប្រាស់កាំបិតខ្វែវ ដើរ ស្វែងរកក្រុមនោះ តែមកជួបអ្នកអង្គុយជុំគ្នានេះ ពួកខ្លួនស្មានតែ ជាក្រុមដែលគប់មកលើខ្លួនក៏ធ្វើសកម្ម ភាពបែបនេះទៅ ខណៈដែលពួកប្រុសៗរត់គេចអស់នៅសល់ស្រីៗ ខ្លួនក៏មានសកម្មភាពលើស្រីៗនោះដែលតាមពិតក្រុមនេះ មិនមែនជាក្រុមដែលបង្កការគប់ដុំថ្មមកលើខ្លួនឡើយ។ លុះដល់ថ្ងៃទី២២ ខែកក្កដា ឆ្នាំ ២០២៣ សមត្ថកិច្ចបាននគរបាលបានបញ្ជូនសំណុំរឿងនិងជនសង័្សយទាំង០៣ នាក់ខាងលើ ទៅកាន់អយ្យការអមសាលាដំបូងខេត្តបាត់ដំបង អនុវត្តទោសទៅតាមផ្លូវច្បាប់រួចហើយ៕
