កោះហៅពលរដ្ឋ២នាក់ រកស៊ីប៉ះម៉ូតូឡានចល័តមកធ្វើកិច្ចសន្យា ករណីធ្វើសកម្មភាពបាចដែកគោល វីស និងដែកកាំកង់ នៅលើស្ពានអ្នកលឿង

កណ្តាល ៖ មាន​គណនីហ្វេសប៊ុកបានបង្ហោះវីដេអូមានខ្លឹមសារថា ធ្លាយម៉ូតូ ធ្លាយឡានលើស្ពានអ្នកលឿង វីដេអូសង្ខេបសម្រាប់ឆក់ដែកគោល វីស ដែកកាំកង់លើស្ពានអ្នកលឿង។ ពាក់ព័ន្ធករណីខាងលើនេះ កម្លាំងប៉ុស្ដិ៍នគរបាលរដ្ឋបាលព្រែកទន្លាប់ និងកំពង់ភ្នំ បានស្រាវជ្រាវ កោះហៅប្រជាពលរដ្ឋ ដែលមានមុខរបររកស៊ីប៉ះម៉ូតូឡានចល័ត នៅតាមបណ្តោយផ្លូវជាតិលេខ១ ចំណុចស្ពានអ្នកលឿង មកសាកសួរ។

​ក្រោយពីទទួលបានព័ត៌មានខាងលើរួច​លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានដាក់បទបញ្ជាឲ្យលោកអធិការនគរបាលស្រុកលើកដែក ស្រាវជ្រាវករណីខាងលើជាបន្ទាន់ ។

ក្រុមការងារ​ព័ត៌មាន និងប្រតិកម្ម​រហ័ស ​នៃស្នងការដ្ឋាននគរបាលខេត្តកណ្តាល ជាលទ្ធផល​៖ នៅថ្ងៃ​ទី​០៤ ខែសីហា ឆ្នាំ២០២៣​ វេលាម៉ោង ​​០៩ និង ៣០នាទី​ព្រឹក លោកអធិការនគរបាលស្រុកលើកដែកបានបញ្ជាកម្លាំងជំនាញសណ្តាប់ធ្នាប់ស្រុក រួមជាមួយកម្លាំងប៉ុស្ដិ៍នគរបាលរដ្ឋបាលព្រែកទន្លាប់ និងកំពង់ភ្នំ បានស្រាវជ្រាវ កោះហៅប្រជាពលរដ្ឋ ដែលមានមុខរបររកស៊ីប៉ះម៉ូតូឡានចល័ត នៅតាមបណ្តោយផ្លូវជាតិលេខ១ ចំណុចស្ពានអ្នកលឿង មកសាកសួរបំភ្លឺរួមមាន៖
១-លោក គង់ វិបុល ភេទប្រុស អាយុ៤៤ឆ្នាំ រស់នៅភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល។
២-លោក ហុត ធូ ភេទប្រុស អាយុ៤៣ឆ្នាំ រស់នៅភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល។

អាជ្ញាធរស្រុកលើកដែកដែលមាន លោក ចាប ច័ន្ទវិទ្យា អភិបាល នៃគណៈអភិបាលស្រុក និងជាប្រធានគណៈបញ្ជាការឯកភាពស្រុក បានដាក់ផែនការដល់អាជ្ញាធរឃុំព្រែកទន្លាប់ និងឃុំកំពង់ភ្នំ​ និងកងកម្លាំងទាំង៣ ប្រភេទក្នុងស្រុក និងប្រជាការពារ សិក្សានុសិស្សវិទ្យាល័យកំពង់ភ្នំ ធ្វើការបោសសំអាតជាប្រចាំក្នុង ១សប្តាហ៍មាន២ថ្ងៃគឺនៅថ្ងៃព្រហស្បតិ៍ និងថ្ងៃសៅរ៍ និងបានធ្វើការអប់រំដល់បងប្អូនប្រជាពលរដ្ឋ ដែលរស់នៅតាមដងផ្លូវឲ្យចូលរួមថែរក្សា​ និងសំអាតបរិស្ថានចាប់ពីគល់ស្ពានរហូតដល់លើស្ពាន និងបានដាក់អំពូលសូឡាបំភ្លឺសងខាងផ្លូវ ចាប់ពីគល់ស្ពានអ្នកលឿងត្រើយខាងលិច រហូតដល់ព្រំប្រទល់ស្រុកកៀនស្វាយ ក្នុងការជួយសម្រួល និងកាត់បន្ថយគ្រោះថ្នាក់ដល់ពលរដ្ឋ ដែលបានធ្វើដំណើរឆ្លងកាត់ផ្លូវជាតិលេខ១ នេះ។

ផ្លូវជាតិលេខ១ មានលំហូរចរាចរណ៍ចេញ-ចូលច្រើន ជាក់ស្តែងរថយន្តដឹកទំនិញ ​ដឹករបស់របរអេតចាយ ឆ្លងកាត់ពីខេត្តមួយទៅខេត្តមួយ ដែលជាហេតុធ្វើឱ្យកម្ទេច កម្ទីដែកទាំងនោះធ្លាក់លើផ្លូវ ពិសេសចំណុចចង្អូរលកបន្ថយល្បឿន។​

ចំណាត់ការ៖
-ធ្វើកិច្ចសន្យាអប់រំលើកទី១ ដល់ពួកគាត់ទាំងពីរនាក់មិនឱ្យទៅប្រកបមុខរបរប៉ះម៉ូតូ ឡានចល័តនៅលើស្ពានអ្នកលឿងបន្តទៀតទេ។
-ករណីឃើញមានពួកកាត់ទៅប្រកបមុខរបរនេះនៅលើស្ពានទៀតសមត្ថកិច្ចនឹងធ្វើការដកហូតសម្ភាររកស៊ីនេះមកកន្លែងសមត្ថកិច្ចរហូតមិនប្រគល់ជូនពួកគាត់វិញឡើយ។
-ករណីឃើញពួកគាត់ទាំងពីរ និងប្រជាពលរដ្ឋផ្សេងទៀត ធ្វើសកម្មភាពបាចដែកគោល វីស និងដែកកាំកង់នៅលើស្ពាន គឺសមត្ថកិច្ចចាប់ឃាត់ខ្លួន និងកសាងឯកសារទៅតុលាការតាមនីតិវិធីច្បាប់។
-ចំពោះករណីខាងលើ កម្លាំងជំនាញស្រុកលើកដែក និងកម្លាំងប៉ុស្ដិ៍នគរបាលរដ្ឋបាលព្រែកទន្លាប់ និងកំពង់ភ្នំ និងបន្តស្រាវជ្រាវ រកអ្នកផ្សេងទៀតដែលប្រព្រឹត្តល្មើសច្បាប់ដើម្បីចាត់ការទៅតាមនីតិវិធី៕