រដ្ឋមន្ត្រីក្រសួងធនធានទឹក ដឹកនាំកិច្ចប្រជុំរៀបចំផែនការសកម្មភាពសម្រាប់គ្រប់គ្រង និងអភិវឌ្ឍវិស័យធនធានទឹក និងឧតុនិយមឆ្នាំ២០២៤

ភ្នំពេញ ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយមបានដឹកនាំកិច្ចប្រជុំ រៀបចំផែនការសកម្មភាពសម្រាប់គ្រប់គ្រង និងអភិវឌ្ឍវិស័យធនធានទឹក និងឧតុនិយមឆ្នាំ២០២៤ និងផែនការយុទ្ធសាស្ត្រ និងផែនការសកម្មភាពរយៈពេល ៣ ឆ្នាំ (២០២៥-២០២៧)នៅទីស្តីការក្រសួង នាព្រឹកថ្ងៃព្រហស្បតិ៍ ទី២ ខែវិច្ឆិកា ឆ្នាំ២០២៣។

សូមជម្រាបថា កិច្ចប្រជុំពិភាក្សារៀបចំផែនការនេះមានរយៈពេលពីរថ្ងៃ ចាប់ពីថ្ងៃទី២ ដល់ថ្ងៃទី៣ ខែវិច្ឆិកា ដោយមានការចូលរួមពីឯកឧត្តមរដ្ឋលេខាធិការប្រចាំ ឯកឧត្តម លោកជំទាវ ថ្នាក់ដឹកនាំ លោក លោកស្រីប្រធានមន្ទីរធនធានទឹក និងឧតុនិយមរាជធានី-ខេត្តទាំងអស់។

ថ្លែងក្នុងឱកាសបើកកិច្ចប្រជុំ ឯកឧត្តមរដ្ឋមន្រ្តីបានមានប្រសាសន៍ថា ចំពោះកិច្ចខិតខំប្រឹងប្រែងនាពេលកន្លងមករបស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ ក្រោមកិច្ចសហការល្អពីគ្រប់ភាគីពាក់ព័ន្ធ ស្របតាមយុទ្ធសាស្ត្រចតុកោណ ដំណាក់កាលទី៤ និងយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលនីតិកាលទី៧ នៃរដ្ឋសភា ដើម្បីកំណើន ការងារ សមធម៌ ប្រសិទ្ធភាព និងចីរភាព។ ក្នុងនោះទឹកជាវិស័យអាទិភាពមួយក្នុងចំណោមអាទិភាពគន្លឹះចំនួន៥ មនុស្យ ផ្លូវ ទឹក ភ្លើង និងបច្ចេកវិទ្យា ដែលរាជរដ្ឋាភិបាលយកចិត្តទុកដាក់។

ឯកឧត្តមរដ្ឋមន្ត្រីបានលើកឡើងថា កិច្ចប្រជុំរៀបចំផែនការសកម្មភាពនាពេលនេះ ត្រូវមានលក្ខណៈជាក់ស្តែង តបតាមការចង្អុលបង្ហាញដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលសម្តេចបានណែនាំឱ្យក្រសួង-ស្ថាប័នពាក់ព័ន្ធ ជាពិសេសក្រសួងធនធានទឹក និងឧតុនិយម និងគ្រប់មន្ទីររាជធានី-ខេត្តត្រូវយកចិត្តទុកដាក់រៀបចំផែនការ ទី១)តំបន់វាលទំនាបដែលទទួលរងការលិចទឹកជាប្រចាំដោយធម្មជាតិ ទី២)តំបន់រងគ្រោះទឹកជំនន់ ប៉ុន្តែអាចកាត់បន្ថយបានតាមរយ:ការកសាងហេដ្ឋារចនាសម្ព័ន្ធធារាសាស្រ្ត ឬអាងស្តុកទឹក ទី៣)តំបន់រងគ្រោះទឹកជំនន់ដែលបណ្តាលមកពីការអភិវឌ្ឍ និងត្រូវមានផែនការយុទ្ធសាស្រ្តជាដំណោះស្រាយ។

ឯកឧត្តមរដ្ឋមន្រ្តី ក៏បានណែនាំឱ្យពិនិត្យមើលឡើងវិញ នូវការបំពេញតួនាទីភារកិច្ចនាពេលកន្លងមក និងឆ្លុះបញ្ចាំងពីចំណុចខ្លាំង និងចំណុចខ្សោយ ក៏ដូចជាបញ្ហាប្រឈមចំពោះមុខ ដើម្បីរួមគ្នាគិតដោះស្រាយឱ្យបានទាន់ពេលវេលា ជាពិសេសធ្វើយ៉ាងណាឱ្យការរៀបចំផែនការសកម្មភាពឆ្នាំ២០២៤ និងផែនការយុទ្ធសាស្ត្រនិងផែនការសកម្មភាពរយៈពេលបីឆ្នាំ (២០២៥-២០២៧) ទទួលបានជោគជ័យ និងគ្រប់ជ្រុងជ្រោយ។

ឆ្លៀតក្នុងឱកាសនោះ ក្នុងនាមជាប្រធានគណៈកម្មការ ឯកឧត្តមរដ្ឋមន្ត្រីក៏បានប្រកាសពីសុពលភាពនៃគណៈកម្មការ និងអនុគណៈកម្មការរៀបចំតាក់តែង និងធ្វើបច្ចុប្បន្នកម្មច្បាប់ គោលនយោបាយ ផែនការមេ ផែនការយុទ្ធសាស្ត្រ និងលិខិតបទដ្ឋានគតិយុត្ត របស់ក្រសួងធនធានទឹក និងឧតុនិយម ដែលបានបង្កើតឡើងដោយសេចក្ដីសម្រេចលេខ១៤៨ សសរ.ធទឧ ចុះថ្ងៃទី៤ ខែតុលា ឆ្នាំ២០២៣។

សូមបញ្ជាក់ថា សេចក្ដីសម្រេចលេខ១៤៨ បានរៀបចំបែងចែកជាអនុគណៈកម្មការចំនួន ៥ ដើម្បីពិនិត្យនិងរៀបចំតាក់តែង និងធ្វើបច្ចុប្បន្នកម្មច្បាប់ គោលនយោបាយ ផែនការមេ ផែនការយុទ្ធសាស្ត្រ និងលិខិតបទដ្ឋានគតិយុត្តរបស់ក្រសួងធនធានទឹក និងឧតុនិយម ក្នុងគោលដៅពង្រឹងប្រសិទ្ធភាពការងារគតិយុត្តរបស់ក្រសួង។

ឯកឧត្តមរដ្ឋមន្ត្រីបានស្នើឱ្យ ឯកឧត្តមរដ្ឋលេខាធិការ ដែលជាប្រធានអនុគណៈកម្មការនីមួយៗ ចាត់ចែងរៀបចំប្រជុំអនុគណៈកម្មការរបស់ខ្លួន ឱ្យបានឆាប់ ដើម្បីអនុវត្តភារកិច្ចដូចមានកំណត់ក្នុងសេចក្តីសម្រេច។
ឯកឧត្តមរដ្ឋមន្ត្រីបានគូសបញ្ជាក់ថា ទិសដៅជាអាទិភាពគឺការរៀបចំសេចក្តីព្រាងអនុក្រឹត្យស្ដីពីការរៀបចំ និងការប្រព្រឹត្តទៅរបស់ក្រសួងធនធានទឹក និងឧតុនិយមឡើងវិញ ដោយពិនិត្យមើលលើមុខងារ និងភារកិច្ចរបស់ក្រសួង ដើម្បីឱ្យស្របទៅនឹងយុទ្ធសាស្ត្របញ្ចកោណ ដំណាក់កាលទី១។

នៅក្នុងកិច្ចប្រជុំនាព្រឹកនេះដែរ ក៏មានការធ្វើបទបង្ហាញជាបន្តបន្ទាប់របស់ថ្នាក់ដឹកនាំមន្ទីរធនធានទឹក និងឧតុនិយមមកពីបណ្តាខេត្តដូចជា ខេត្តកំពង់ឆ្នាំង ខេត្តរតនគិរី ខេត្តមណ្ឌលគិរី ខេត្តបាត់ដំបង ខេត្តប៉ៃលិន និងខេត្តតាកែវ។

ឯកឧត្តមរដ្ឋមន្ត្រីក៏បានផ្តាំផ្ញើដល់ឯកឧត្តមថ្នាក់ដឹកនាំ និងមន្ទីររាជធានី-ខេត្តទាំងអស់បន្តយកចិត្តទុកដាក់ អនុវត្តការងារឱ្យកាន់តែសកម្ម និងមានប្រសិទ្ធភាពថែមទៀត ដើម្បីនាំមកនូវជោគជ័យ និងសមិទ្ធផលថ្មីៗ បន្ថែមទៀត ជូនស្ថាប័នក៏ដូចជារាជរដ្ឋាភិបាល និងប្រទេសជាតិ និង ចូលរួមរៀបចំ និងពង្រឹងការងារគតិយុត្តរបស់ក្រសួងឱ្យស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា៕