អ្នកនាំពាក្យក្រសួងយុត្តិធម៌ បញ្ជាក់ថា លោកលោកមេធាវី ហ៊ាង ឫទ្ធី ពិតជាពុំទាន់មានសមត្ថភាព ក្នុងការវិភាគរឿង
ភ្នំពេញ៖ លោក គឹម សន្តិភាព អ្នកនាំពាក្យក្រសួងយុត្តិធម៌ នៅថ្ងៃទី១៤ ខែវិច្ឆិកា ឆ្នាំ២០១៨នេះ បានចេញមកបកស្រាយប្រាប់លោកមេធាវី ហ៊ាង ឫទ្ធី ដែលមិនយល់ច្បាស់អំពីច្បាប់ ពាក់ព័ន្ធនឹងនីតិវិធីតុលាការ ក្នុងការដាក់ជនត្រូវចោទ ឱ្យស្ថិតនៅក្រោមការត្រួតពិនិត្យ តាមផ្លូវតុលាការ។
បើតាមផេកហ្វេសប៊ុក កាលពីថ្ងៃទី១៤ខែវិច្ឆិកា លោក Kim Santepheap គឹម សន្តិភាព បានថ្លែងបញ្ជាក់ថា “សូមបញ្ជាក់ជូនRFA និងលោកបណ្ឌិតមេធាវី! បើសូម្បីតែខ្លឹមសារនៃមាត្រា២២៣ នៃក្រមនីតិវិធីព្រហ្មទណ្ឌ កំណត់អំពីអំណាចរបស់ចៅក្រមស៊ើបសួរ ក្នុងការសម្រេចដាក់ឲ្យជនត្រូវចោទ ស្ថិតក្រោមការត្រួតពិនិត្យ តាមផ្លូវតុលាការ សរសេរច្បាស់លាស់បែបនេះហើយ ក៏លោកបណ្ឌិតមេធាវីមើលមិនទាំងយល់ផង រីឯរវាងរបបឃុំខ្លួន និងរបបដាក់ក្រោមការត្រួតពិនិត្យតាមផ្លូវតុលាការ ក៏លោកបណ្ឌិតមេធាវីចែកមិនដាច់ផងនោះ គឺបង្ហាញច្បាស់ថា លោកបណ្ឌិតពិតជាពុំទាន់មានសមត្ថភាព ក្នុងការវិភាគរឿងផ្សេងទៀតឡើយ! សូមលោកបណ្ឌិតមេធាវី កុំតាំងខ្លួនតាមការបញ្ជារបស់ RFA ជាអ្នកវិភាគស្អីគេនោះ ឈប់បានឈប់ទៅ! ប្រសិនបើFRA ខ្វះអ្នកវិភាគផ្នែកច្បាប់ ឲ្យបានត្រឹមត្រូវបែបនេះ អាចទាក់ទងទៅគណៈមេធាវីនៃព្រះរាជាណាចក្រកម្ពុជា ដើម្បីស្នើមេធាវី ដែលមានសមត្ថភាពមកវិភាគផ្នែកច្បាប់ជូន!”។
អ្នកនាំពាក្យក្រសួងយុត្តិធម៌ លោកគឹម សន្តិភាព បានឆ្លើយតបបែបនេះ បានធ្វើឡើងបន្ទាប់ពីលោកមេធាវី ហ៊ាង ឫទ្ធី តាមរយៈកិច្ចសម្ភាសជាមួយ វិទ្យុអាស៊ីសេរី បានរិះគន់ចំពោះចំណាត់ការតុលាការ ក្នុងការដាក់ លោក កឹម សុខា ឱ្យស្ថិតនៅក្រោមការត្រួតពិនិត្យតាមផ្លូវតុលាការ ដែលធ្វើឱ្យលោកហាក់ជាប់ឃុំនៅក្នុងផ្ទះ។ លោក ហ៊ាង ឫទ្ធី បាននិយាយវិភាគថា៖ “ថ្វីត្បិតគ្រប់ជនជាប់ចោទមិនទាន់មានសាលក្រមស្ថាពរ គឺគាត់មិនទាន់មានទោសទេ គាត់នៅតែជាជនសង្ស័យអ៊ីចឹង ហើយការឃុំខ្លួនក្នុងផ្ទះក៏មិនមានច្បាប់ណាមួយឃុំខ្លួនក្នុងផ្ទះដែរ តែបើចៅក្រមដោះលែងនៅក្រៅឃុំបណ្ដោះអាសន្ន គឺគាត់ត្រូវមានសេរីភាព គ្រាន់តែត្រូវបង្ហាញមុខនៅចំពោះមុខតុលាការ១ខែតែម្ដង”៕
