ខេត្តសៀមរាបទទួលបានភ្ញៀវទេសចរជាតិ និងអន្តរជាតិប្រមាណជាង៣៣ម៉ឺននាក់ កើនឡើងប្រមាណ១៨,៥៨ភាគរយ បើធៀបនឹងឆ្នាំ២០១៧
សៀមរាប៖ លោក ឃឹម ប៊ុនសុង អភិបាលខេត្តសៀមរាប បានបញ្ជាក់ថា នៅក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ខេត្តសៀមរាបទទួលបានភ្ញៀវទេសជាតិ និងអន្តរជាតិប្រមាណជាង៣៣ម៉ឺននាក់ កើនឡើងប្រមាណ១៨,៥៨ភាគរយ បើធៀបនឹងឆ្នាំ២០១៧ ក្នុងនោះ ភ្ញៀវទេសចរជាតិប្រមាណជាង២៩ម៉ឺននាក់ កើនឡើង១៩,០៦ភាគរយ និងភ្ញៀងអន្តរជាតិប្រមាណជាង៣ម៉ឺននាក់ កើនឡើង២,៩៩ភាគរយ។ លោកបានលើកឡើងបែបនេះខណៈជួបសំណេះសំណាលជាមួយប្រជាពលរដ្ឋ កាលពីថ្ងៃ២៣ វិច្ឆិកា ឆ្នាំនេះថា៖ ភ្ញៀវទេសចរទំាងនេះបានទៅទស្សនាការប្រណំាងទូកនៅតាមបណ្តោយស្ទឹងសៀមរាប និងទៅកម្សាន្តនៅតាមរមណីយដ្ឋាននានាក្នុងខេត្តសៀមរាប។
លោកបន្ដថា៖ ចំពោះថ្លៃម្ហូបអាហារគឺមានការឡើងថ្លៃតិចតួចដែរ ប៉ុន្តែសម្រាប់បន្ទប់ស្នាក់នៅគឺអត់មានការខ្វះខាតទេ ដោយសារភ្ញៀវទេសចរដែល មកទស្សនា ខេត្តសៀមរាប នៅក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលភាគច្រើនជាភ្ញៀវជាតិ ហើយមានអ្នកខ្លះទៅស្នាក់នៅផ្ទះបងប្អូន។ ចំពោះ ការងារសន្តិសុខ សណ្តាប់ធ្នាប់ របៀបរៀបរយសាធារណៈបានប្រព្រឹត្តទៅក្នុងលក្ខខណ្ឌល្អ ប្រសើរ ដោយគ្មានគ្រោះថ្នាក់ចរាចរណ៍ គ្មានការប៉ះទង្គិចដោយអំពើហិង្សា អំពើឆក់ប្លន់ និងបាតុភាព គួរឱ្យកត់សម្គាល់ឡើយ។
ជាមួយគ្នានេះដែរ សម្រាប់ស្ថានភាពអនាម័យ បរិស្ថាន ក៏មានសភាពល្អប្រសើរលើស ពីពេលមុនៗ ដោយនៅទីសាធារណៈ និងជុំវិញទីតាំងប្រារព្ធពិធី ក៏ដូចជាតាមបណ្តោយស្ទឹងសៀមរាបមានការថយចុះនូវការបោះចោលសំរាមនិងកាកសំណល់ផ្សេងៗពីបងប្អូនប្រជាពលរដ្ឋអ្នកទេសចរដោយសារពួកគាត់មានការយល់ដឹងពីផលប្រយោជន៍នៃការថែរក្សាបរិស្ថាន អនាម័យច្រើនជាងមុន។
លោក ឃឹម ប៊ុនសុង បានបន្ថែមទៀតថា៖ ការរៀបចំព្រះរាជពិធីបុណ្យអុំទូកបណ្តែតប្រទីប និងសំពះព្រះខែ អកអំបុកគឺបានរៀបចំធ្វើទៅតាមប្រពៃណី ទំនៀមទម្លាប់របស់ខ្មែរ ក៏ដូចជាផ្តល់ឱកាសមួយដល់ប្រជាពលរដ្ឋខ្មែរបានជួបជុំគ្នាសប្បាយជាពិសេសគឺចង់បង្ហាញឱ្យភ្ញៀវទេសចរអន្តរជាតិបានឃើញនិងឈ្វេងយល់អំពីវប្បធម៌ខ្មែរផងដែរ។ ភ្ញៀវទេសចរសម្រុកមកទស្សនាខេត្តសៀមរាបច្រើន ដោយសារតែខេត្តសៀមរាបមានរមណីដ្ឋានកម្សាន្តច្រើន ហើយខេត្ដក៏មានរៀបចំប្រណំាងទូក បណ្តែតប្រទីប និងសំពះព្រះខែ អកអំបុក ដូចនៅរាជធានីភ្នំពេញដែរ៕ ដោយ៖ សំរិត