កសិករភូមិព្រែកសាលាប្រកបមុខរបរត្បាញសំពត់សឹង អំពាវនាវឲ្យពលរដ្ឋជួយគាំទ្រទិញសំពត់ស៊ឹងយកទៅប្រើប្រាស់ ផលិតរបស់កូនខ្មែរ
កំពង់ឆ្នាំង៖ ប្រជាពលរដ្ឋមួយគ្រួសារមានបងន្អូន៥នាក់ មានទីលំនៅក្នុង ភូមិព្រែកសាលា ឃុំទឹកហូត ស្រុករលាប្អៀរ បានចាប់ដៃប្តីប្រពន្ធតស៊ូអំអត់ព្យាយាម ប្រកបមុខរបរតម្បាញសំពត់ ស៊ឹងលក់ បានទទួលជោគជ័យតែរយៈពេលជាង៣ខែប៉ុណ្តោះ ដោយពីដំបូងបានចាប់ផ្តើមមានតែកីតម្បាញតែមួយប៉ុណ្ណោះ និងបច្ចប្បន្ននេះមានកីតម្បាញ៥គ្រឿងហើយ ដោយកំពុងព្យាយាមពង្រីកបន្តទៀត នៅពេលមានថវិកាកើនឡើង ។
មុខរបរនេះគឺជាប្រជាពលរដ្ឋគ្រួសារទីមួយ នៅក្នុងខេត្តកំពង់ឆ្នាំង ដែលចាប់យកមុខរបរតម្បាញសំពត់ស៊ឹងជាស្នាដៃរបស់ខ្មែរបានជោគជ័យ ព្រោះកន្លងមកនៅក្នុងខេត្តគ្មានអ្នកណាប្រកបមុខរបរនេះឡើយ ។
ជួបជាមួយអ្នកព័ត៌មានយើង នៅរសៀលថ្ងៃពុធ៦រោច ខែកតិ្ដក ឆ្នាំចសំរឹទ្ធិស័កព.ស២៥៦២ត្រូវនិងថ្ងៃទី២៨ ខែវិច្ឆិកា ឆ្នាំ២០១៨ ស្ត្រី ឈ្មោះ ចាន់ ណារិន អាយុ ៣២ឆ្នាំ ជាជនពិការជើងមួយជំហៀងតាំងពីអាយុ៣ឆ្នាំបានមាននិយាយអោយដឹងថា៖ រូបគាត់ និងបងប្អូន ចំនួន៤នាក់ បានទៅរៀនត្បាញសំពត់ស៊ឹងនៅឯឃុំកោះដាច់ ស្រុកមុខកំពូល ខេត្តកណ្តាល តាំងពីនៅតូចៗមក និងក្រោយពីចេះត្បាញហើយ ពួកគាត់បានប្រកបមុខរបរត្បាញសំពត់ស៊ឹង នៅទីនោះទាំងអស់គ្នា រយៈ ពេល៦-៧ឆ្នាំ ។ ប៉ុន្តែក្រោយមកតម្លៃសំពត់ស៊ឹងបានចុះថោក តែវត្ថុធាតុដើមនៅតែថ្លៃដដែល ធ្វើឲ្យពួកគាត់មិនអាច ផលិតបានទៀតឡើយ ហើយក៏បាននាំគ្នាវិលត្រឡប់មកកាន់ស្រុកកំណើតនៅក្នុងខេត្តកំពង់ឆ្នាំងនេះវិញ ប្រកបរបរធ្វើស្រែចំការ។
ក្រោយមក ក្នុងរយៈពេល៣ទៅ៤ខែមុននេះ បងប្អូននៅកោះដាច់ បានប្រាប់ថា៖ សំពត់ស៊ឹងមានហាងឆេងវិញហើយ គាត់ក៏បានចងការប្រាក់ទិញបានកីតម្បាញមួយ និងយកវត្ថុធាតុដើម ពីខេត្តកណ្ដាល យកមកត្បាញ នៅក្នុងលំនៅដ្ឋាន និងជាង៣ខែនេះបងប្អូនបង្កើតគាត់៥នាក់ បានចាប់យកអាជីពមួយនេះ ដោយបាន ពង្រីកបានកីតម្បាញចំនួន ៥គ្រឿង និងមានការរីកចំរើនមកដល់សព្វថ្ងៃនេះ។ បច្ចុប្បន្នសំពត់សឹងត្រូវបានអតិថិជនកុម្ម៉ង់ទិញច្រើនផងដែរ ពិសេសក្នុងឱកាសបុណ្យកាន់បិណ្ឌភ្ជុំបិណ្ឌ ក្នុងឱកាសបុណ្យអុំទូក កន្លងមក រហូតមក ដល់ ពេលនេះជារដូវ លក់ដាច់ជាបន្តបន្ទាប់ផងដែរ ដោយបានយកទៅបោះដុំលក់នៅ ឯកោះដាច់ ស្រុកមុខកំពូល ខេត្ត កណ្តាល ដោយមិនមានលក់នៅទីផ្សារខេត្តកំពង់ឆ្នាំងឡើយ ។
ក្រុមគ្រួសារស្ត្រីខាងលើ ជាអ្នកត្បាញសំពត់ស៊ឹង បានអោយដឹងទៀតថា៖ មុខរបរនេះជាមធ្យមក្នុងកីតម្បាញនិមួយៗ អាចរកចំណូលបាន ពី៣ទៅ ៤រយដុល្លារ ក្នុង១ខែៗ ដែលចំណូលនេះគឺច្រើនជាកម្មករ តម្បាញតាមរោងចក្រ និងក៏អាចរស់នៅជួបជុំគ្រួសារមើលថែទាំកូនចៅ ឪពុកម្តាយចាស់ៗបានផងដែរ ។ ខាងមុខនេះពួកគាត់ចង់ពង្រីការតម្បាញសំពត់ស៊ឹងនេះជាសិប្បកម្មធំមួយនៅពេលមានថវិកាគ្រប់គ្រាន់ ។ ដូច្នេះពួកគាត់ បានសំណូមពរដល់ប្រជាពលរដ្ឋយើង សូមមេត្តាជួយគាំទ្រស្នាដៃតម្បាញសំពត់ស៊ឹង ដែលជាផលិតផល របស់កូនខ្មែរផង ដើម្បីអោយកូនខ្មែរ អាចពង្រីកមុខរបរនេះសំរាប់ ប្រជាពរដ្ឋនៅតាមទីជនបទមានការងារធ្វើនៅក្នុងភូមិ ស្រុក លើក ស្ទួយជីវភាពរស់នៅ កាត់បន្ថយការចំណាកស្រុក ទៅធ្វើការឆ្ងាយៗ ផង ព្រោះការធ្វើចំណាកស្រុកជាការប្រថុយប្រថាន ៕ ដោយ៖ សំរិត
