យុវជនម្នាក់ជិះម៉ូតូលឿនជ្រុលបុករថយន្តសាំយ៉ុងចំពីមុខពេញទំហឹង បណ្តាលបោកក្បាលស្លាប់ភ្លាមៗ
ភ្នំពេញ ៖ យុវជនម្នាក់បានបែកក្បាលស្លាប់ក្នុងថ្លុកឈាម ខណៈជិះម៉ូតូលឿនជ្រុលបុកចំក្បាលរថយន្តដែលកំពុងបើកឆ្លងផ្លូវ នៅចំណុចផ្លូវបេតុង ភូមិភា សង្កាត់ប្រទះឡាង ខណ្ឌដង្កោ រាជធានីភ្នំពេញ កាលពីរសៀលថ្ងៃទី ០៥ ខែ ធ្នូ ឆ្នាំ២០១៨ ។
តាមសម្តីប្រជាពលរដ្ឋដែលឃើញហេតុការណ៍បានអោយដឹងថា យុវជនរងគ្រោះបានជិះម៉ូតូមួយគ្រឿង ពណ៌ក្រហម ធ្វើដំណើរក្នុងល្បឿនយ៉ាងលឿន តាមបណ្តោយផ្លូវបេតុងឆ្ពោះឡើងទៅផ្លូវជាតិលេខ៣ ទិសដៅពីលិចទៅកើត ខណៈដល់ចំណុចកើតហេតុស្របពេលដែលមានរថយន្តសាំយ៉ុង មួយគ្រឿងកំពុងបើកធ្វើដំណើរបញ្រ្ចាសទិសគ្នា ហើយពេលនោះរថយន្តបានបត់ឆ្វេងដៃចូលទៅផ្លូវបំបែក ក៏បណ្តាលអោយយុវជនខាងលើ ជាន់ហ្វ្រាំងម៉ូតូមិនទាន់ជ្រុលបុកចំក្បាលរថយន្តយ៉ាងពេញទំហឹង បណ្តាលអោយយុវជនខាងលើ ផ្លោងបោកផ្ទប់នឹងកញ្ចក់រថយន្តស្លាប់ភ្លាមៗនៅកន្លែងកើតហេតុ ចំណែកម៉ូតូនឹងរថយន្តត្រូវរង់ការខូចខាតយ៉ាងដំណំ ។
សមត្ថកិច្ចបានអោយដឹងថា សពយុវជនមានឈ្មោះ បូណាត់ សុផាណិត ភេទប្រុស អាយុ១៥ឆ្នាំ មុខរបរសិស្ស ស្នាក់នៅក្បែរទីតាំងកើតហេតុ ចំណែកតៃកុងរថយន្តឈ្មោះ ឡេង វិបុល ភេទប្រុស ២៣ ឆ្នាំ ស្នាក់នៅភូមិអង្គ សង្កាត់ប្រទះឡាង ចណ្ឌដង្កោ ។ បច្ចប្បន្នសមត្ថកិច្ចមូលដ្ឋានបានសហការជាមួយ សមត្ថកិច្ចជំនាញចុះវាស់វែងអូសយករថយន្តនឹង ម៉ូតូទៅរក្សាទុកនៅការិយាល័យចរាចរជើងគោក នៃស្នងការដ្ឋាននគរបាលរាជធានីភ្នំពេញរ ង់ចាំដោះស្រាយតាមផ្លូវច្បាប់ ចំណែកសពប្រគល់អោយក្រុមគ្រួសារដឹកយកទៅធ្វើបុណ្យតាមប្រពៃណី ៕
