កម្ពុជា ត្រៀមរៀបចំបើកការតាំងពិព័រណ៍យន្តហោះ និងបច្ចេកវិទ្យាថ្មីៗ នៅអាកាសយានដ្ឋានអន្ដរជាតិភ្នំពេញ ពាក់កណ្ដាលខែធ្នូនេះ
ភ្នំពេញ៖ ពិព័រណ៍យន្តហោះ និង បច្ចេកវិទ្យាថ្មីៗ គឺជាកម្មវិធីសង្គមមួយដែលត្រូវបានរៀបចំឡើងដោយ ក្រុមយុវជនកម្ពុជាមកពី សហភាពសហព័ន្ធយុវជនកម្ពុជា ខេត្តស្វាយរៀងដឹកនាំដោយ លោកកេន វិចិត្រ ប្រធានក្រុមយុវជនខេត្ដ ។ ក្រុមយុវជនគឺគាត់ស្រឡាញ់ និងចូលចិត្តយ៉ាងខ្លាំងនូវជំនាញ និងមុខវិជ្ជាអំពី យន្តហោះ អាកាសចរ បច្ចេកវិទ្យា ការសរសេរកូដ វិស្វកម្ម និងវិទ្យាសាស្ត្រជាដើម ។
នេះជាការរៀបចំលើកទី១ ដំបូងបំផុតនៅក្នុងប្រទេសកម្ពុជាដោយ សហភាពសហព័ន្ធយុវជនកម្ពុជា ខេត្តស្វាយរៀង ឱ្យមានពិព័រណ៍យន្តហោះ និងបច្ចេកវិទ្យា ឆ្នាំ២០១៨ ដែលមានរយៈពេលបីថ្ងៃ១៤ ,១៥ ,១៦ ខែធ្នូ ឆ្នាំ២០១៨ នៅមូលដ្ឋានទ័ពអាកាសពោធិ៍ចិនតុងខាងមុខនេះ។ នេះបើតាមការបញ្ជាក់ ឲ្យដឹងពីលោក កេន វិចិត្រ ប្រធានក្រុមយុវជនកម្ពុជាខេត្ដ ស្វាយរៀង កាលពីថ្ងៃព្រហស្បតិ៏ ១៤ រោចខែកត្ដិក ឆ្នាំចសំរឹទ្ធិស័កព.ស២៥៦២ត្រូវនិងថ្ងៃទី០៦ ធ្នូ ឆ្នាំ២០១៨ ។
លោកកេន វិចិត្រ បានបញ្ជាក់ថា៖ ពិព័រណ៍នេះ ផងដែរគឺ ទទួលបានការគាំទ្រយ៉ាងខ្លាំងពី កងទ័ពជើងអាកាស និង ក្រសួងអប់រំ យុវជន និងកីឡា ដោយ មានការគាំទ្រសហការរៀបចំពីក្រុមហ៊ុនHelistar(Cam bodia) និងអង្គការសែ្ទមកម្ពុជា ដោយក្នុងគោលបំណងផ្តល់ឱកាសដល់យុវជន សិស្សនិស្សិត កម្ពុជាទាំងអស់ និងសាធារណៈជន បានឃើញ និងចូលទស្សនាដោយសេរីតាមរយៈការដាក់បង្ហាញ យន្តហោះឯកជន (Private Jets) និងឧទ្ធម្ភាគចក្រ (Helicopters) ជាដើម ទាំងផ្នែកខាងក្រៅ និងក្នុងនៃយន្តហោះ ព្រមទាំងការតាំងបង្ហាញនូវស្នាដៃទេព កោសល្យកូនខ្មែរយើង ដែលបានផលិតឧបករណ៍អេឡិច ត្រូនិក គ្រឿងយន្ត បច្ចេកវិទ្យា និងការសរសេរកូដផ្សេងៗជាដើម។ ដូច្នេះគឺជា ឱកាសដ៏វិសេសមួយដែលប្រមូលផ្តុំនូវធនធានមនុស្ស យុវជនសិស្សនិស្សិតកម្ពុជា មកពីវិទ្យាល័យ សកលវិទ្យាល័យនានាទូទាំងប្រទេសកម្ពុជា ដែលមានជំនាញផ្នែក បច្ចេកវិទ្យា ការសរសេរកូដ វិស្វកម្ម វិទ្យាសាស្ត្រ និងព្រមទាំងស្រឡាញ់ចូលចិត្តចំណេះដឹងយន្តហោះ និងអាកាសចរ និងលើសពីនេះ យុវជន សិស្សនិស្សិត និងអ្នកចូលរួមទាំងអស់អាចសួរជាសំណួរចម្លើយ ទៅកាន់អ្នកបើកយន្តហោះដែលនៅទីនោះផ្ទាល់ ឯកទេស និងយុវជន សិស្សនិស្សិតនានា ដែលចូលរួមតាំងពិព័រណ័បង្ហាញអំពី យន្តហោះ អាកាសចរ បច្ចេកវិទ្យា ការសរសេរកូដ វិស្វកម្ម និងវិទ្យាសាស្ត្រជាដើម។
លោកបន្ដថា៖ អ្វីដែលពិសេសនោះគឺ មានការប្រកួតធ្វើ និងបង្ហោះយន្តហោះកៅស៊ូ! យន្តហោះកៅស៊ូ? ស្តាប់ លឺ និងនិយាយ គឺប្រហែលជាស្រួលធ្វើ និងបង្ហោះហើយ! នេះជាអ្វីដែលចង់បង្ហាញដោយមានគោលដៅ និងទិសដៅរៀបចំឡើងដោយក្រុមយុវជន ស.ស.យ.ក ខេត្តស្វាយរៀង នូវពិព័រណ៍នេះដើម្បីទាក់ទាញចំណាប់អារម្មណ៍ និងបណ្តុះគំនិតទៅដល់ យុវជន សិស្សនិស្សិតកម្ពុជាទាំងអស់ដែលចូលរួមទស្សនា និងដាក់ពាក្យចូលរួមប្រកួតធ្វើយន្តហោះកៅស៊ូ នេះមានឱកាសធ្វើ និងប្រកួតបង្ហោះយន្តហោះកៅស៊ូផងដែរ។
នេះគឺជា ចំនុចចាប់ផ្តើម! ការធ្វើយន្តហោះកៅស៊ូនេះមិនមែនស្រួលដូចគិត និងនិយាយទេ! គឺយើងត្រូវតែគិតវាឱ្យបានល្អិតល្អន់កំឡុងពេលធ្វើអំពី វត្ថុឧបករណ៍ដែលត្រូវយកមកប្រើ និងធ្វើឡើង រួមទាំងទំងន់ ស្លាប ទំហំ កង្ហារចក្រ ការរចនាមូដ និងការធ្វើបទបង្ហាញ ព្រោះការវាយតម្លៃនឹងត្រូវធ្វើឡើងតាមលក្ខខ័ណ្ឌ៥ចំនុច។ ចំនុចទាំង៥នោះគឺ ផ្តោតលើថេរៈវេលាយូរ ឬឆាប់នៃការហោះ កំពស់ខ្ពស់ ឬទាប រយៈចម្ងាយវែង ឬខ្លី ការរចនាមូដនៃយន្តហោះ និងការធ្វើបទបង្ហាញអំពីផលិតផល ជៀសវាងការទៅទិញផលិតផលអ្នកដ៏ទៃ មកចូលរួមប្រកួត។
ក្រុមទាំងអស់ដែលបានដាក់ពាក្យចូលរួមប្រកួតទាំងអស់មាន ១៤ក្រុម ដោយក្នុងមួយក្រុមមានសមាជិក២នាក់។ ក្រុមទាំង១៤ ជាសិស្សនិស្សិតមកពីវិទ្យាល័យ និងសកលវិទ្យាល័យ ដូចជាវិទ្យាល័យព្រះស៊ីសុវត្តិជំនាន់ថ្មី សកលវិទ្យាល័យវិស្វកម្ម និងបច្ចេកវិទ្យា ជាដើម។ កំឡុងពេលពិព័រណ៍នេះផងដែរ គឺមានសាលសិក្ខាសាលាដែលបង្កើតឱកាសបន្ថែម ទៅដល់អ្នកចូលរួមមកទស្សនាចូលស្តាប់ សួរនិងឆ្លើយ ផ្លាស់ប្តូរបទពិសោធន៍រវាងវាគ្មិន សាស្ត្រាចារ្យ អ្នកជំនាញ រៀមច្បង និងសិស្សនិស្សិតរវាងគ្នា។ ហើយក៏មានស្តង់លក់ម្ហូប និងភេសជ្ជៈសម្រាប់អ្នកចូលរួមទស្សនាទទួលទាន និងសម្រាកកម្សាន្តផងដែរ។
នេះជាឱកាសដ៏ពិសេសបំផុត សម្រាប់យុវជនសិស្សនិស្សិតកម្ពុជាទាំងអស់គួរតែចូលរួមឱ្យបានទាំងអស់គ្នាដើម្បីទទួលបានបទពិសោធន៍ និងចំណេះដឹងអំពី យន្តហោះ អាកាសចរ បច្ចេកវិទ្យា ការសរសេរកូដ វិស្វកម្ម និងវិទ្យាសាស្ត្រ ដើម្បីអភិវឌ្ឍន៍ប្រទេសជាតិក្នុងវិស័យនេះ និងឱ្យវិស័យយន្តហោះ និងបច្ចេកវិទ្យានៅកម្ពុជាមានការរីកចម្រើន៕
