អភិបាលខេត្តពោធិ៍សាត់ក្រោយការផ្ទុះអាវុធនៅភាគីខាងថៃតែស្ថានភាពក្នុងខេត្តធម្មតាមិនមានការជម្លៀសប្រជាជនទេ 

ពោធិសាត់៖ក្រោយការផ្ទុះអាវុធនៅភាគីខាងថៃ នៅប្រមាណម៉ោង១១ព្រឹកថ្ងៃនេះឯកឧត្តម ខូយ រីដា អភិបាលខេត្តពោធិ៍សាត់បានថ្លែងថា គិតត្រឹមវេលាម៉ោង១២:៣០ថ្ងៃត្រង់ ថ្ងៃទី១៩ ខែវិច្ឆិកាដដែលនេះ ស្ថានភាពក្នុងខេត្តពោធិ៍សាត់មានសភាពធម្មតា។ ទន្ទឹមនឹងនេះ  មិនមានការជម្លៀសពលរដ្ឋក្នុងខេត្តពោធិ៍សាត់នោះទេ។

សូមបញ្ជាក់ថា យោងតាមក្រសួងការពារជាតិកម្ពុជានៅព្រឹកថ្ងៃទី១៩ ខែវិច្ឆិកា ឆ្នាំ២០២៥ នៅវេលាម៉ោង១១:០៨នាទីព្រឹក ក្រុមអ្នកសង្កេតការណ៍អាស៊ាន (AOT) ក្រោមការសម្របសម្រួលរបស់ក្រសួងការពារជាតិកម្ពុជា បានចុះទៅពិនិត្យនិងផ្ទៀងផ្ទាត់ការអនុវត្តបទឈប់បាញ់នៅច្រកច១ ឃុំថ្មដា ស្រុកវាលវែង ខេត្តពោធិ៍សាត់។ នៅអំឡុងពេលចុះពិនិត្យនោះ មានការផ្ទុះអាវុធនៅខាងភាគីថៃ។ ដើម្បីសុវត្ថិភាព ក្រុមអ្នកសង្កេតការណ៍អាស៊ានសម្រេចផ្អាកការចុះផ្ទៀងផ្ទាត់នៅតំបន់នោះ និងដកថយត្រឡប់វិញ៕

ដកស្រង់ពីព្រះខ័ន