មន្ទីរប្រឆាំងគ្រឿងញៀន ក៨+ក៣ បេីកប្រតិបត្តិការរួមគ្នា បង្ក្រាបគ្រឿងញៀន នៅក្នុងខារ៉ាអូខេ PRO KTV ម្ដុំបឹងត្របែក ឃាត់ជនសង្ស័យប្រុសស្រី ៥៨នាក់
រាជធានីភ្នំពេញ ៖ កម្លាំងសមត្ថកិច្ចជំនាញ (ក៨)និង(ក៣) នៃមន្ទីរប្រឆាំងគ្រឿងញៀន នៅរាត្រីថ្ងៃទី១៨ ខែមករា ឆ្នាំ២០១៩ ម៉ោង១២ និង១៥នាទី ឈានចូលថ្ងៃទី១៩ ខែមករា ឆ្នាំ២០១៩នេះ បានបើកកិច្ចប្រតិបត្តិការ បង្ក្រាបករណីជួញដូរគ្រឿងញៀន និងផ្តល់ទីតាំងអោយជួញដូរ និងប្រើប្រាស់គ្រឿងញៀន នៅចំណុចខារ៉ាអូខេ PRO KTV (ក្លឹបប្រូ) ផ្ទះលេខ៧៥៧ និង៧៥៨ ផ្លូវព្រះមុន្នីវង្ស ស្ថិតនៅក្រុម២៦ ភូមិ៧ សង្កាត់បឹងត្របែក ខណ្ឌចំការមន រាជធានីភ្នំពេញ ។
ក្នុងប្រតិបត្តិការបង្ក្រាបគ្រឿងញៀនក្នុងខារ៉ាអូខេ PRO KTV នេះ កម្លាំងបានធ្វេីការឃាត់ខ្លួនជនសង្ស័យ បានចំនួន ៥៨នាក់ (ស្រី២៤) ក្នុងនោះមានជនជាតិចិន ២៩នាក់ (ស្រី៥នាក់) និងជនជាតិវៀតណាម ២៣នាក់ (ស្រី១៥នាក់) និងជនជាតិថៃ ២នាក់ (ស្រី)និងជនជាតិខ្មែរ ០៣នាក់ (ស្រី២នាក់) និងជនជាតិកូរ៉េ ០១នាក់ (ប្រុស) រួចធ្វើតេស្តទឹកម៉ូត រកសារធាតុញៀន ក្នុងនោះ វិជ្ជមាន ៥២នាក់ និង អវិជ្ជមាន ០៦នាក់។
ប្រភេទជនសង្ស័យដែលសមត្ថកិច្ចឃាត់ខ្លួនមាន ៖ ១. ឈ្មោះ 차청민 Chea Cheong Min ជនជាតិកូរ៉េ ជាម្ចាស់ទីតាំង និងជាអនុប្រធានក្រុមហ៊ុន ។ ២. មេការធំឈ្មោះ Nguyen Tuan Nah ភេទប្រុស ជនជាតិវៀតណាម និងមេការតូចឈ្មោះ ហ៊ត ជឿង ភេទប្រុស ជនជាតិខ្មែរ ជាអ្នកចាត់ចែង។ ចំណែកឯអ្នកប្រើប្រាស់ ចំនួន ៥៣នាក់ និងអ្នកកំដរ ចំនួន ០២នាក់។
ចាប់យកវត្ថុតាង : អ៊ិចស្តាស៊ីគ្រាប់ ទម្ងន់២,០៥ក្រាម និងម្សៅគេតាមីន ៦,៥៨ក្រាម និងម្សៅកាហ្វេអ៊ិចស្តាស៊ី ៩៧,០៨ ក្រាម។
សមត្ថកិច្ចបានបញ្ជាក់ថា : វត្ថុតាងខាងលើនេះ មិនទាន់មានអ្នកទទួលខុសត្រូវទេ ដោយថ្នាំទាំងនេះរាយបាយលើតុ ជ្រុះដី ខណៈពួកគេបដិសេធន៍ទាំងអស់គ្នា ។
បច្ចុប្បន្នជនសង្ស័យ ព្រមទាំងវត្ថុតាងខាងលើ បានបញ្ជូនទៅមន្ទីរប្រឆាំងគ្រឿងញៀន ដើម្បីកសាងសំណុំរឿងបញ្ជូនទៅតុលាការតាមនីតិវិធី ។
សូមជម្រាបជូនថា កាលពីថ្មីៗនេះ ឯកឧត្តម ឃួង ស្រេង អភិបាលរាជធានីភ្នំពេញ បានចេញបញ្ជាឲ្យអាជ្ញាធរខណ្ឌទាំង១២ ត្រូវបន្តពង្រឹងការងារសន្តិសុខសណ្តាប់ធ្នាប់២៤ម៉ោងលើ២៤ម៉ោង ជូនប្រជាពលរដ្ឋឲ្យបានល្អជាប្រចាំជាពិសេសត្រូវលុបបំបាត់ឲ្យបានចំពោះអ្នកជូញដូរ និងប្រើប្រាស់គ្រឿងញៀននៅក្នុងទឹកដីរាជធានី ដើម្បីជាការឆ្លើយតបទៅវិញ បន្ទាប់ពីប្រជាពលរដ្ឋបានបោះឆ្នោត ជូនគណបក្សប្រជាជនកម្ពុជា (CPP)។
ឯកឧត្តម ឃួង ស្រេង អភិបាលរាជធានីភ្នំពេញ លើកឡើងក្នុងកិច្ចប្រជុំបញ្ជាការឯកភាពរាជធានីភ្នំពេញ កាលពីល្ងាចថ្ងៃទី១២ ខែកញ្ញា ២០១៨កន្លងទៅ នៅសាលារាជធានីភ្នំពេញ ថា “សន្តិសុខគឺជាសេចក្តីត្រូវការរួមរបស់ប្រជាពលរដ្ឋគ្រប់រូប មិនអាចខ្វះបាន មិនថាអ្នកមាន ឬអ្នកក្រនោះទេ គឺសុទ្ធតែត្រូវការសន្តិសុខទាំងអស់។
ឯកឧត្តមអភិបាលបន្តថា ការដែលពង្រឹងសន្តិសុខសណ្តាប់ធ្នាប់ និងការផ្តល់សេវាសាធារណៈជូនប្រជាពលរដ្ឋនេះ គឺជាការឆ្លើយតបមួយដ៏ចាំបាច់ ក្រោយពីប្រជាពលរដ្ឋទូទាំងប្រទេស ក៏ដូចជានៅរាជធានីភ្នំពេញ បានបោះឆ្នោតទុកចិត្តលើគណបក្សប្រជាជនកម្ពុជា ដើម្បីបន្តដឹកនាំរដ្ឋាភិបាលនីតិកាលទី៦នេះ។ ដូច្នេះហើយ អាជ្ញាធរខណ្ឌទាំង១២ និងសង្កាត់ទាំង១០៥ ត្រូវធ្វើយ៉ាងណាផ្តល់សេវាកម្មអោយបានល្អជូន ប្រជាពលរដ្ឋមានភាពកក់ក្តៅ រក្សាបានសន្តិសុខ សុវត្ថិភាពសណ្តាប់ធ្នាប់របៀបរៀបរយសាធារណៈបានល្អ”៕