ទស្សនកិច្ចផ្លូវការរដ្ឋរបស់ប្រធានាធិបតីកូរ៉េ មកកាន់កម្ពុជា មិនត្រឹមតែស្ថិតនៅក្នុងទម្រង់ទំនាក់ទំនងល្អ និងសហប្រតិបត្តិការណ៍នោះទេ ក៏ប៉ុន្ដែមានកិច្ចចុះហត្ថលេខាលើអនុស្សរណៈ មួយចំនួន

ភ្នំពេញ: ការិយាល័យអ្នកនាំពាក្យរាជរដ្ឋាភិបាល បានឲ្យដឹងថា ទស្សនកិច្ចផ្លូវការរដ្ឋរបស់ប្រធានាធិបតីសាធារណរដ្ឋកូរ៉េ មកកាន់ព្រះរាជាណាចក្រកម្ពុជា មិនត្រឹមតែស្ថិតនៅក្នុងទម្រង់ទំនាក់ទំនងល្អ និងសហប្រតិបត្តិការណ៍នោះទេ ក៏ប៉ុន្ដែមានកិច្ចចុះហត្ថលេខាលើអនុស្សរណៈ មួយចំនួនពាក់ព័ន្ធនឹងកិច្ចសហប្រតិបត្តិ ក្នុងវិស័យសេដ្ឋកិច្ច ក៏ដូចជាសហអភិវឌ្ឍរវាងកម្ពុជានឹងសាធារណរដ្ឋកូរ៉េ។ ដំណើរការនៃកិច្ចចុះហត្ថលេខានេះ គឺមានវត្តមាន លោកប្រធានាធិបតីសាធារណរដ្ឋកូរ៉េ និងសម្ដេចតេជោ នាយករដ្ឋមន្រ្តី ជាអ្នកតំណាងដោយអំណាចច្បាប់ និងអធិបតេយ្យនៃប្រជាជាតិនីមួយៗ។

លោក មូន ចេអ៉ិន (Moon Jae-in) ប្រធានាធិបតីនៃសាធារណរដ្ឋកូរ៉េ (កូរ៉េខាងត្បូង) និងលោកជំទាវ បានអញ្ជើញមកដល់ប្រទេសកម្ពុជាហើយ នាវេលាម៉ោង៣៖១០នាទីរសៀល ថ្ងៃទី១៤ ខែមីនា ឆ្នាំ២០១៩នេះ ដើម្បីបំពេញទស្សនកិច្ចផ្លូវរដ្ឋជាលើកដំបូងរបស់លោកក្នុងប្រទេសនេះ រយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមីនា ឆ្នាំ២០១៩។

ការមកដល់ប្រទេសកម្ពុជានៅថ្ងៃនេះ លោកប្រធានាធបិតីកូរ៉េខាងត្បូង មានកម្មវិធីតែ២ប៉ុណ្ណោះ នោះគឺជួបសំណេះសំណាលជាមួយសហគមន៍កូរ៉េនៅកម្ពុជា និង ពិសារបាយពេលល្ងាចជាមួយ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅសណ្ឋាគារ The Great Duke។

តាមការប្រកាសរបស់ក្រសួងការបរទេស គឺក្នុងអំឡុងពេលទស្សនកិច្ចនេះ លោក មូន ចេអ៉ិន នឹងចូលគាល់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រះបរមរាជវាំង ហើយនិងជួបជាមួយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។
លោកប្រធានាធិបតី មូន ចេអ៉ិន និងសម្តេចតេជោ ហ៊ុន សែន នឹងពិភាក្សាអំពីការជំរុញទំនាក់ទំនងទ្វេភាគី និងការពង្រីកកិច្ចសហប្រតិបត្តិការលើវិស័យនានាបន្ថែមទៀត ហើយក៏ផ្លាស់ប្តូរយោបល់គ្នាលើបញ្ហាតំបន់ និងអន្តរជាតិដែលជាកង្វល់ និងផលប្រយោជន៍រួម។ បន្ទាប់ពីបញ្ចប់ជំនួប ថ្នាក់ដឹកនាំទាំងពីរនឹងអញ្ជើញធ្វើជាសាក្សីក្នុង ពិធីចុះហត្ថលេខាលើកិច្ចព្រមព្រៀងមួយចំនួន និងធ្វើសេចកី្តប្រកាសព័ត៌មានរួមគ្នា។
លោកប្រធានាធិបតី មូន ចេអ៉ិន និងសម្តេចតេជោនាយករដ្ឋមន្រ្តី ហ៊ុន សែន ក៏រំពឹងថានឹងអញ្ជើញថ្លែងសុន្ទរកថា ក្នុងវេទិកាធុរកិច្ចកម្ពុជា-សាធារណរដ្ឋកូរ៉េ ដើម្បីលើកទឹកចិត្តឲ្យមានការវិនិយោគ ការផ្លាស់ប្តូរសេដ្ឋកិច្ច និងពាណិជ្ជកម្មកាន់តែច្រើនឡើង រវាងប្រទេសទាំងពីរ។
ទស្សនកិច្ចលើកដំបូងមកកាន់កម្ពុជា របស់លោកប្រធានាធិបតីមូន ចេអ៊ីន គឺជាព្រឹតិ្តការណ៍ ដ៏សំខាន់ក្នុងទំនាក់ទំនងកម្ពុជា-សាធារណរដ្ឋកូរ៉េ ដែលនឹងពង្រឹងមិត្តភាព ហើយនឹងធ្វើឲ្យកិច្ចសហប្រតិបត្តិការរវាងប្រទេសទាំងពីរកាន់តែមានវិសាលភាពទូលំទូលាយ និងស៊ីជម្រៅ៕