ចាប់ឃាតករ២នាក់ បាញ់សម្លាប់ បុរសជនជាតិចិនម្នាក់ រុញទម្លាក់ពីលើរថយន្ត
ក្រុងព្រះសីហនុ៖ មានសេចក្តីរាយការណ៍មកថា បុរសជនជាតិចិនម្នាក់បានស្លាប់ ដោយសារឃាតករដែលគេសង្សយ័ថាជាជនជាតិចិនដូចគ្នាបាញ់សម្លាប់។
វីដេអូ ថតចេញពីកាមេរ៉ាសុវត្ថិភាពរបស់សណ្ឋាគារ និងកាស៊ីណូខ្សាច់ស ស្ដីពីសកម្មភាពជនរងគ្រោះជាជនជាតិចិនម្នាក់ ត្រូវបានអ្នកជិះឡានជាមួយគ្នាបាញ់សម្លាប់ រួចរុញទម្លាក់ពីលើឡាន កាលពីរសៀលថ្ងៃទី៦ ខែឧសភា ឆ្នាំ២០១៩ នៅតាមបណ្ដោយផ្លូវ ខាងមុខសណ្ឋាគារ និងកាស៊ីណូខ្សាច់ស ស្ថិតក្នុងភូមិ៤ សង្កាត់៤ ក្រុងព្រះសីហនុ។
លោកឧត្តមសេនីយ៍ ជួន ណារិន្ទ ស្នងការនគរបាលខេត្តព្រះសីហនុ បានថ្លែងថា សមត្ថកិច្ច បានស្ទាក់ឃាត់ខ្លួនជនជាតិចិន២នាក់បានភ្លាមៗ ក្រោយបាញ់សម្លាប់ជនជាតិចិនដូចគ្នា ហើយទម្លាក់ពីរថយន្ត នៅចំណុចនៅមុខសណ្ឋាគាខ្សាច់ស ក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ នៅវេលាម៉ោង៣៖៣០នាទីរសៀល ថ្ងៃទី០៦ ខែឧសភា ឆ្នាំ២០១៩។
ជនជាតិចិនទាំងនេះ បានជិះរថយន្តម៉ាក Highlander ពាក់ស្លាកលេខភ្នំពេញ 2K-3970 ប៉ុន្តែទោះជាយ៉ាងណា សមត្ថកិច្ចមិនទាន់ដឹងមូលហេតុច្បាស់លាស់ នៃករណីឃាតកម្មនេះនៅឡើយទេ៕
