រថយន្តមួយគ្រឿងឆេះនៅលើស្ពានព្រះមុនីចាស់ សន្ធោសន្ធៅនាកណ្ដាលអធ្រាត្រ
ភ្នំពេញ៖ បុរសម្នាក់សង្ស័យគាត់ស្រវឹងជោគជាំបានបើករថយន្តកាមរីបាឡែនមួយគ្រឿងលឿនដូចហោះមិនប្រុងប្រយត្ន័ជ្រុលទៅបុកគូទ រថយន្តកុងទីន័រមួយគ្រឿងពីក្រោយពេញទំហឹង បណ្ដាលឲ្យឆ្លងចរន្តភ្លើង ឆាបឆេះយ៉ាងសន្ធោសន្ធៅ ហើយរថយន្តកុងតឺន័របើកបន្តទៅមុខបាត់ស្រមោល។
ករណីនេះបានកាលពីម៉ោង១រំលងអធ្រាត្រ ឈានចូលថ្ងៃទី២៧ ខែឧសភា ឆ្នាំ២០១៩ នៅត្រង់ចំណុចលើស្ពានមុនីវង្សចាស់ សង្កាត់ទន្លេបាសាក់ខណ្ឌចំការមនក្រុងភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថានាមុនពេលកើតហេតុខាងលើគេឃើញរថយន្តកាមរីបាឡែនពណ៌សមួយគ្រឿងដែកបើកដោយបុរសម្នាក់សង្ស័យគាត់ស្រវឹងធ្លាក់ភ្នែក។ដោយធ្វើដំណើពីខាងផ្លូវជាតិលេខ១ ទិសដៅពីកើតទៅលិច ក្នុងល្បឿនយ៉ាងលឿនដូចហោះឆ្ពោះឡើងស្ពានព្រះមុនីវង្សចាស់ ខណៈមកដល់ចំនុចកើតហេតុខាងលើបានជ្រុលទៅបុកគូទ រថយន្តកុងទីន័រមិនចាំស្លាកលេខពីក្រោយពេញទំហឹងបណ្ដាលឲ្យរថយន្តខ្ទេចមួយកំណាត់មុខយ៉ាងដំណំ។ចំណែករថយន្តកុងទីន័រមិនបានឈប់ទេក៏បើកបន្តដំណើរទៅមុខ បាត់តែម្ដង។
ពេលនោះគេឃើញម្ចាស់រថយន្តចុះមកមើលរថយន្តរួចបានឡើងចូលក្នុងរថយន្តវិញដើម្បីបញ្ឆេះស្រាប់តែឆ្លងចរន្តភ្លើងក៏ឆាបឆេះយ៉ាងសន្ធោសន្ធៅតែម្ដង។ ឃើញដូចច្នោះម្ចាស់បានដើរចេញពីរថយន្តគេចខ្លួនបាត់ ដោយបន្សល់ទុកឲ្យរថយន្តឆេះ យ៉ាងសន្ធោសន្ធៅធ្វើអោយភ្ញាក់ផ្អើលដល់ប្រជាជនធ្វើដំណើរតាមផ្លូវឈប់មើលនិងក្រុមសមត្ថកិច្ចអាជ្ញាធរ។
ក្រុមសមត្ថកិច្ចមូលដ្ឋានបានចុះមកចំនុចកើតហេតុនិងបានទាក់ទងទៅកម្លាំងរថយន្តពន្លត់អគ្គីភ័យ ចេញមកមួយគ្រឿងអន្តរាគមន៍បាញ់បន្លត់ទើបរលត់ទាំងស្រុងនៅវាលាម៉ោងជាង២យប់ថ្ងៃខែឆ្នាំដដែល។តែអ្វីគួរឲ្យស្ដោកស្ដាយនោះគឺ រថយន្តបានឆេះហ្មត់នៅតែគ្រោងឆ្អឹងតែប៉ុណ្ណោះតែសំណាងដែរមិនបង្កគ្រោះថ្នាក់អ្វីឡើយ។ក្រោយមករថយន្តដែលឆេះត្រូវបានសមត្ថកិច្ចស្ទួចយកទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ ៕
