ពិតជាសឿងមែន ខឹងម្ដាយស្ដីបន្ទោស កូនប្រុសគិតខ្លីលោតទឹកសម្លាប់ខ្លួន ពីលើស្ពានព្រះមុនីវង្សចាស់ យប់មិញ
ភ្នំពេញ៖ យុវជនម្នាក់កំពុងជិះម៉ូតូឌុបម្ដាយ គ្រាន់តែម្ដាយស្ដីបន្ទោសឲ្យមួយម៉ាត់ពីរម៉ាត់ បែរជាឈប់ម៉ូតូពាក់កណ្ដាលស្ពានព្រះមុនីវង្សចាស់ រួចលោតទឹកសម្លាប់ខ្លួនលិចចូលក្នុងទន្លេបាត់សូន្យឈឹង បន្សល់ទុកម្ដាយឈរស្រែកឆោឡោដល់អ្នកដំណើរ និងសមត្ថកិច្ច កាលពីវេលាម៉ោងជិត៨យប់ ថ្ងៃ ទី២៣ ខែធ្នូ ឆ្នាំ២០១៩ នេះស្ថិតក្នុងសង្កាត់ទន្លេបាសាក់ ខណ្ឌចំការមនរាជធានីភ្នំពេញ។
អ្នកឃើញហេតុការណ៍នោះនិយាយថា មុនពេលកើតហេតុ គេសង្កេតឃើញជនរងគ្រោះជិះម៉ូតូកូនទាមួយគ្រឿង ពណ៌ក្រហមលាយខ្មៅ ពាក់ផ្លាកលេខភ្នំពេញ 1CT 2532 ឌុបម្ដាយ ធ្វើដំណើរឡើងស្ពានព្រះមុនីវង្ស ទិសដៅពីកើតឡើងទៅលិច ។ ខណៈពេលចុះពីស្ពាន បានបន្តិច ក៏ឃើញជនរងគ្រោះ ឈប់ម៉ូតូអែបខាងស្ដាំដៃ ឈ្លោះគ្នាជាមួយម្តាយ ស្រែកខ្លាំងៗ និងដោះមួកសុវត្ថិភាពពាក់លើម៉ូតូ រួចស្ទុះឡើងលើបង្កាន់ដៃស្ពាន លោតទឹកសម្លាប់ខ្លួនពីលើស្ពាន លិចក្នុងទន្លេបាត់សូន្យឈឹងតែម្ដង។
យ៉ាងណាមិញ បើតាមសម្ដីស្ត្រីជាម្ដាយរបស់ជនរងគ្រោះ បានរៀបរាប់ប្រាប់យ៉ាងខ្លីថា កូនរបស់គាត់សម្រេចលោតទឹកសម្លាប់ខ្លួនបែបនេះ គឺគាត់បានស្ដីបន្ទោសឲ្យកូន ដោយមិនបានបញ្ជាក់ឲ្យច្បាស់លាស់នោះទេ ហើយកូនក៏ជិះម៉ូតូឌុបគាត់ចេញមក មិននឹកស្មានថា កូនគិតខ្លី មកលោតទឹកសម្លាប់ខ្លួន បែបនេះសោះឡើយ។
ក្រោយកើតហេតុ សមត្ថកិច្ចមូលដ្ឋានបាននាំម្តាយទៅប៉ុស្តិ៍នគរបាលរដ្ឋបាលទន្លេបាសាក់ ដើម្បីសួរនាំ៕
