ពិនិត្យវឌ្ឍនភាព និងបញ្ហាប្រឈម នៃការអនុវត្តផែនការសកម្មភាពកម្មវិធីអភិវឌ្ឍន៍ប្រចាំប្រទេសកម្ពុជា
ភ្នំពេញ៖ រាជរដ្ឋាភិបាល និងអង្គការមូលនិធិសហប្រជាជាតិសម្រាប់ប្រជាជន (UNFPA) បានបើកកិច្ចប្រជុំ ដើម្បីពិនិត្យប្រចាំឆ្នាំ នៃការអនុវត្តផែនការសកម្មភាពកម្មវិធីអភិវឌ្ឍន៍ប្រចាំប្រទេស ឆ្នាំ២០១៩-២០២៣ (Country Programme Action Plan-equivalent 2019-2023) នាព្រឹកថ្ងៃចន្ទ ទី២៣ ខែធ្នូ ឆ្នាំ២០១៩ នៅសណ្ឋាគារកាំបូឌីយ៉ាណា ។
ក្រុមប្រឹក្សាអភិវឌ្ឍន៍កម្ពុជា The Council for the Development of Cambodia នៅថ្ងៃទី២៤ខែធ្នូនេះថា កិច្ចប្រជុំនេះ ដឹកនាំរួមគ្នាដោយលោក រ៉ិត វុទ្ធី អគ្គលេខាធិការរង គ.ជ.នា/ក.អ.ក និងលោក Daniel Alemu តំណាងស្តីទីនៃមូលនិធិសហប្រជាជាតិសម្រាប់ប្រជាជន (UNFPA) ប្រចាំកម្ពុជា ក្រោមអធិបតីភាពដ៏ខ្ពង់ខ្ពស់របស់លោកស្រី អ៊ឺង កន្ថាផាវី រដ្ឋមន្រ្តីក្រសួងកិច្ចការនារី។ កិច្ចប្រជុំនេះក៏មានការចូលរួមពីតំណាងជាន់ខ្ពស់ និងមន្រ្តីជំនាញតាមបណ្តាក្រសួង/ស្ថាប័ន រាជរដ្ឋាភិបាល ទីប្រឹក្សា មន្រ្តីជំនាញរបស់ UNFPA ប្រចាំកម្ពុជា ផងដែរ ។ គោលដៅចម្បងនៃកិច្ចប្រជុំដើម្បីពិនិត្យវឌ្ឍនភាព និងបញ្ហាប្រឈម នៃការអនុវត្តផែនការសកម្មភាពកម្មវិធីអភិវឌ្ឍន៍ប្រចាំប្រទេសក្នុងឆ្នាំ ២០១៩ និងកំណត់អាទិភាពសម្រាប់ឆ្នាំ ២០២០។
គួររំលឹកផងដែរ ផែនការសកម្មភាពកម្មវិធីអភិវឌ្ឍន៍ប្រចាំប្រទេស ឆ្នាំ២០១៩-២០២៣ របស់ UNFPA ត្រូវបានផ្តល់សុពលភាព និងដាក់ឱ្យអនុវត្តជាផ្លូវការ កាលពីថ្ងៃទី២២ ខែកុម្ភៈ ឆ្នាំ ២០១៩ ដោយបានកំណត់នូវOutcome ចំនួន ៣ ដូចជា ៖ ១. ការបន្តពូជ និងសុខភាពសាធារណៈ ២. ការអប់រំក្មេងជំទង់ និងយុវជន ៣. ការធ្វើប្រជាសាស្ត្រ និងបញ្ហាអន្តរវិស័យ (យេនឌ័រ) ។ ហិរញ្ញប្បទានសរុបចំនួន ១៣ លានដុល្លារអាមេរិក ក្នុងនោះហិរញ្ញប្បទានចំនួន ៨,៣ លានដុល្លារ (៦៤% នៃតម្រូវការថវិកាសរុប) ជាហិរញ្ញប្បទានផ្ទាល់ (RegularResources) និង ៤,៧ លានដុល្លារ ជាហិរញ្ញប្បទានដែលនឹងត្រូវកៀរគរបន្ថែម ត្រូវបានគ្រោងវិភាជន៍សម្រាប់រយៈពេល ៥ ឆ្នាំ ។
ចំពោះការអនុវត្តផែនការសកម្មភាព កម្មវិធីអភិវឌ្ឍន៍ប្រចាំប្រទេស ឆ្នាំ២០១៩-២០២៣ នៅក្នុងឆ្នាំ២០១៩
នេះសរុបជារួមបានបង្ហាញឱ្យឃើញថា ការអនុវត្តរបស់ក្រសួងទទួលអនុវត្តតម្រោងដូចជា ក្រសួងសុខាភិបាល
ក្រសួងអប់រំ យុវជន និងកីឡា ក្រសួងផែនការ និងក្រសួងកិច្ចការនារី សម្រេចបាននូវលទ្ធផលដែលបានគ្រោង
ទុកតាមផែនការដែលបានដាក់ចេញ និងបានកំណត់ទិសដៅសម្រាប់ឆ្នាំ២០២០ ផងដែរ ៕
