ស្ទូចតម្លើងគ្រោងដែក តួស្ពានថ្មើរជើងផ្សារដើមគរនៅយប់ថ្ងៃទី១៩ខែកុម្ភៈ
ភ្នំពេញ៖ រដ្ឋបាលរាជធានីភ្នំពេញ បានឲ្យដឹងថាស្ពានថ្មើរជើងផ្សារដើមគរលទ្ឋផលសម្រេចបាន៨៥% និងអាចរួចរាល់នៅថ្ងៃទី៥ខែមិនាខាងមុខ។
ការដ្ឋាននឹងត្រូវស្ទូចតម្លើងគ្រោងដែកតួស្ពាននៅថ្ងៃទី១៩ខែកុម្ភៈឆ្នាំ២០២០វេលាយប់ចាប់ពីម៉ោង២០:០០ដល់ម៉ោង៦:០០ព្រឹក។
សូមបងប្អូនប្រជាពលរដ្ឋមេត្តាពង្វាងចរាចរនៅទីតាំងការដ្ឋានតាមពេលវេលាខាងលើនៅស្តុបផ្សារដើមគរប្រសព្វរវាងមហាវិថីម៉ៅសេទុងនិងផ្លូវលេខ៣៣៦ក្នុងខណ្ឌទួលគោកដោយសេចក្តីអនុគ្រោះ។
ក្នុងឱកាសនោះ មានលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ លោកឯក ឃុនឌឿន អភិបាលខណ្ឌទួលគោក និងលោកប្រធានក្រុមហ៊ុន បានចូលរួមផងដែរ។
ក្នុងឱកាសនោះដែរ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ការសង់សង់ស្ពានអាកាសថ្មើរជើងផ្សារដើមគរ ដែលមានបណ្ដោយប្រវែង២៧ម៉ែត្រ និងទទឹងប្រវែង៣ម៉ែត្រ គិតមកដល់ពេលនេះលទ្ធផលសម្រេចបាន ៨៥% ។
លោក សាំ ពិសិដ្ឋ បន្ថែមថា ដើម្បីសុវត្ថិភាព និងបង្ការក្រែងមានគ្រោះថ្នាក់ ដល់អ្នកដំណើរជាយថាហេតុ ការដ្ឋានបានបិទចរាចរណ៍ ឆ្លងកាត់មួយរយៈកាលពីយប់មិញ នៅស្តុបផ្សារដើមគ ប្រសព្វរវាងមហាវិថីម៉ៅសេទុង និងផ្លូវលេខ ៣៣៦ ក្នុងខណ្ឌទួលគោក។
លោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ បានថ្លែងថា មន្ទីរសាធារណការនិងដឹកជញ្ជូនរាជធានីភ្នំពេញ ដែលជាសេនាធិការរបស់រដ្ឋបាលរាជធានីភ្នំពេញ បាននិងកំពុងលើកដែកផ្លូវថ្មើរជើង ឆ្លងកាត់ផ្លូវក្បែរផ្សារដើមគ ដើម្បីរៀបចំជាសមិទ្ធផលការងាររបស់យើង ដែលយើងខិតខំធ្វើនាពេលកន្លងមក និងធ្វើយ៉ាងម៉េចឲ្យបានលឿន និងបញ្ចប់ការស្ថាបនាផ្លូវអាកាសថ្មើរជើងនេះ ឲ្យមុនថ្ងៃទី៨ខែមីនា ៕
