ប្រធានមន្ទីរសាធារណការរាជធានី ចុះពិនិត្យមើលរូបចម្លាក់តោជំនាន់បុរាណ ក្រោយពីប្រទះឃើញពេលជីកកាយដីសាងសង់អាងស្តុកទឹកក្រោមដី
ភ្នំពេញ៖ ប្រធានមន្ទីរសាធារណការ និងដឹកជញ្ជូនរាជធានីភ្នំពេញលោក សាំ ពិសិដ្ឋ កាលពីល្ងាចថ្ងៃទី០៤ ខែកញ្ញា ឆ្នាំ២០២០នេះ បានចុះពិនិត្យមើលរូបចម្លាក់តោជំនាន់បុរាណ ដែលក្រុមការងារជីកកាយដី ដើម្បីសាងសង់អាងស្តុកទឹកក្រោមដីនិងសាងសង់ស្ថានីយ៍បូមទឹកទី៦ របស់រាជធានីភ្នំពេញហើយបានប្រទះឃើញក្នុងជម្រៅ៤ម៉ែត្រ ក្រោមដី។
លោក សាំ ពិសិដ្ឋ បានអះអាងថា រូបចម្លាក់តោថ្មបុរាណនេះ ត្រូវបានក្រុមការងារជីកកាយដី ដើម្បីសាងសង់អាងស្តុកទឹកក្រោមដីនិងសាងសង់ស្ថានីយ៍បូមទឹកទី៦ របស់រាជធានីភ្នំពេញ នៅក្រោមសួនច្បារមុខCDD ជម្រៅ៤ម៉ែត្រ ដែលគាំទ្រដោយទីភ្នាក់ងារសហប្រតិបត្តិការអន្តរជាតិជប៉ុន (JICA) ។
លោកបញ្ជាក់ថា រូបសំណាកមានកម្ពស់ជាង ២.៥ម៉ែត្រ ទំហំដងខ្លួនជាង១ម៉ែត្រធ្វើអំពីថ្មភ្នំ ។ រូបនេះ រដ្ឋបាលរាជធានីភ្នំពេញ បានប្រគល់បន្តទៅអោយក្រសួងវប្បធម៌និងវិចិត្រសិល្បៈ ។
លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា(CMAC) បានបញ្ជាក់ថា កម្លាំងមន្ត្រីជំនាញស៊ីម៉ាក់សហការជាមួយអាជ្ញាធររាជធានីភ្នំពេញដោយបានជីកកាយដីដើម្បីរៀបចំប្រព័ន្ធលូចម្រុះទឹកនៅបរិវេណវត្តភ្នំ ក៏ប្រទះឃើញរូបចម្លាក់តោថ្មបុរាណដ៏ធំមួយតែម្តង ។ នៅល្ងាចនេះនៅថ្ងៃទី០៤ ខែកញ្ញា ឆ្នាំ២០២០នេះ នៅទីតាំងបោសសំអាតគ្រាប់ដេីម្បីអនុវត្តគំរោងអភិវឌ្ឍនៃការដ្ឋានសាងសង់អាងស្តុកទឹកក្រោមដីនិងសាងសង់ស្ថានីយ៍បូមទឹកទី៦ របស់រាជធានីភ្នំពេញដែលគាំទ្រដោយទីភ្នាក់ងារសហប្រតិបត្តិការអន្តរជាតិជប៉ុន (JICA) (នៅខាងមុខក្រុមប្រឹក្សាអភិវឌ្ឍន៍កម្ពុជាជាប់មាត់ទន្ល) កំលាំងសុីម៉ាក់បានជីកដីប៉ះចំរូបចម្លាក់តោថ្មបុរាណដែលមានកំពស់ជាង២.៥ម៉ែត្រទំហំដងខ្លួនជាង១ម៉ែត្រ! កំលាំងសុីម៉ាក់បានប្រគល់តោថ្មនេះ ជូនទៅសាលារាជធានីភ្នំពេញក្នុងការគ្រប់គ្រងបន្ត ហើយត្រូវបានរដ្ឋបាលរាជធានីភ្នំពេញ ប្រគល់បន្តទៅអោយក្រសួងវប្បធម៌និងវិចិត្រសិល្បៈ ៕