ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ អនុញ្ញត្តឲ្យលោក ជា លាង វិលត្រឡប់ទៅលំនៅដ្ឋានវិញ ក្រោយទទួលស្គាល់កំហុស
ភ្នំពេញ៖ បន្ទាប់ពីបានទទួលស្គាល់ និងសារភាពកំហុសជាសាធារណ: និងអនុវត្តតាមបញ្ជារបស់លោក ស៊ិត វណ្ណ: ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក ជា លាង ភេទប្រុស អាយុ៤២ឆ្នាំ ជនជាតិខ្មែរ ត្រូវបានដោះលែង និងបានអនុញ្ញត្តឲ្យវិលត្រឡប់ទៅលំនៅដ្ឋានវិញ នៅវេលាម៉ោង១២:០០នាទី ដោយមានអ្នកធានាត្រឹមត្រូវ ក្រោយពីធ្វើការសាកសួរចប់នៅតំណាងអយ្យការអមសាលាដំបូងរាជធានីភ្នំពេញ។
សូមបញ្ជាក់ថា បុរសក្នុងវ័យ៤២ឆ្នាំម្នាក់ត្រូវបានត្រូវអាជ្ញាធរខណ្ឌទួលគោកធ្វើការឃាត់ខ្លួនហើយវាយខ្នោះភ្លាមៗដោយចោទពីបទ «ប្រឆាំងនឹងអ្នករាជការសារធារណ:» ខណៈដែលបុរសម្នាក់ បើករថយន្តមកចតចំកណ្ដាលទ្រូងផ្លូវមិនអាចឱ្យប្រជាពលរដ្ឋធ្វើដំណើរ ហើយនៅពេលក្រុមប្រតិបត្តិការធ្វើការណែនាំឲ្យបើករថយន្តចេញពីទ្រូងផ្លូវ បែរជាបដិសេធ ហើយពេលក្រុមប្រតិបត្តិការយកខ្នោះចាក់កង់រថយន្ត និងត្រៀមលក្ខណៈស្ទូចរថយន្ត ចេញពីលើទ្រូងផ្លូវ ក៏ដណ្ដើមយកខ្នោះពីសមត្ថកិច្ច ដោយរារាំងមិនឲ្យចាក់កង់រថយន្ត ហើយយកខ្នោះកំទេចចោលហើយបោះចូលទៅក្នុងផ្ទះរបស់ខ្លួន ទើបសមត្ថកិច្ចធ្វើការឃាត់ខ្លួនតែម្តង។
អាជ្ញាធរខណ្ឌទួលគោកបានបញ្ជាក់ថា៖ ករណីឃាត់ខ្លួននេះ ធ្វើឡើងនៅម៉ោងប្រហែល៤និង៣០នាទីរសៀលថ្ងៃទី១៧ ខែវិច្ឆិកា ឆ្នាំ២០២០កម្លាំងរបស់អធិការដ្ឋាននគរបាលខណ្ឌទួលគោក ដោយមានការអនុញ្ញាតនិងបញ្ជាផ្ទាល់មាត់ពីលោក ឯក ឃុនដឿន អភិបាលខណ្ឌទួលគោក និងដឹកនាំផ្ទាល់ពីលោក ទាវ សំអឿន អភិបាលរងខណ្ឌទួលគោកនិង ដោយមានកិច្ចសម្របសម្រួលពីលោកស្រី សុង ឆវ័ន្ត ព្រះរាជអាជ្ញារងសាលាដំបូងរាជធានីភ្នំពេញ ក្រុមប្រតិបត្តិការបានធ្វើការឃាត់ខ្លួនជនសង្ស័យម្នាក់ជាក់ស្ដែងពីបទ «ប្រឆាំងនឹងអ្នករាជការសារធារណ:» នៅចំណុចមុខផ្ទះលេខ២០៣ ផ្លូវលេខ១៣២ ក្រុមទី២៣ ភូមិ៧ សង្កាត់ទឹកល្អក់ទី១ ខណ្ឌទួលគោក។
មន្ត្រីអាជ្ញាធរបានឲ្យដឹងថា៖ ជនសង្ស័យមានឈ្មោះ ជា លាង អាយុ៤២ឆ្នាំ ជនជាតិខ្មែរ មុខរបរ មើលការខុសត្រូវផ្ទះជួល ស្នាក់នៅផ្ទះលេខ២០៣ ផ្លូវលេខ១៣២ ក្រុមទី២៣ ភូមិ៧ សង្កាត់ទឹកល្អក់ទី១ ខណ្ឌទួលគោក ។
ក្នុងកិច្ចប្រតិបត្តិការនោះ រឹបអូសរថយន្តចំនួន០២គ្រឿងម៉ាក VISTO កូរ៉េ ពណ៌ទឹកប្រាក់ ពាក់ស្លាកលេខ ភ្នំពេញ 2Q-8050 និងរថយន្តម៉ាក Camry ស៊េរី 2007 ពណ៌ស ពាក់ស្លាកលេខ ភ្នំពេញ 2Z-6830 (ចាប់យកនៅកន្លែងកើតហេតុ)។
មន្ត្រីអាជ្ញាធររៀបរាប់ដំណើររឿងមុនឈានដល់ការឃាត់ខ្លួនជនសង្ស័យដូច្នេះថា៖ នៅថ្ងៃទី១៧ ខែ វិច្ឆិកា ឆ្នាំ២០២០ ម៉ោងប្រហែល៤៖០០នាទីរសៀលថ្ងៃទី១៧វិច្ឆិកានេះ បុរសម្នាក់ឈ្មោះ ជា លាង អាយុ៤២ឆ្នាំ ជនជាតិខ្មែរ បានបើករថយន្តម៉ាក VISTO កូរ៉េ ពណ៌ទឹកប្រាក់ ពាក់ស្លាកលេខ ភ្នំពេញ 2Q-8050 និងរថយន្តម៉ាក Camry ស៊េរី 2007 ពណ៌ស ពាក់ស្លាកលេខ ភ្នំពេញ 2Z-6830 មកចតចំកណ្ដាលទ្រូងផ្លូវលេខ១៣២ ក្រុមទី២៣ ភូមិ៧ សង្កាត់ទឹកល្អក់ទី១ ខណ្ឌទួលគោក ដោយបានរំខាន និងរារាំងប្រជាពលរដ្ឋ ធ្វើដំណើរតាមផ្លូវមិនអាចធ្វើដំណើរបាន ក្រុមប្រតិបត្តិការបានធ្វើការណែនាំឲ្យម្ចាស់រថយន្តឈ្មោះ ជា លាង បើករថយន្តចេញពីទ្រូងផ្លូវ ដើម្បីឲ្យប្រជាពលរដ្ឋធ្វើដំណើរបាន ប៉ុន្តែឈ្មោះ ជា លាង បានបដិសេធមិនព្រមបើកឡានចេញទេ ពេលនោះក្រុមប្រតិបត្តិការបានយកខ្នោះចាក់កង់រថយន្ត ដើម្បីចាក់កង់រថយន្តត្រៀមលក្ខណៈស្ទូចរថយន្ត ចេញពីលើទ្រូងផ្លូវ តែត្រូវបានម្ចាស់រថយន្តឈ្មោះ ជា លាង ដណ្ដើមយកខ្នោះពីសមត្ថកិច្ច ដោយរារាំងមិនឲ្យចាក់កង់រថយន្ត ហើយយកខ្នោះកំទេចចោលបោះចូលទៅក្នុងផ្ទះរបស់ខ្លួន ពេលនោះសមត្ថកិច្ចក៏បានទៅហៅឈ្មោះ ជា លាង មកសួរនាំ ប៉ុន្តែត្រូវបានឈ្មោះ ជា លាង បានរុញច្រានសមត្ថកិច្ច ភ្លាមនោះសមត្ថកិច្ចក៏បានធ្វើការឃាត់ខ្លួន ឈ្មោះ ជា លាង ក្នុងបទល្មើសជាក់ស្ដែង និងចាប់យករថយន្តចំនួន០២គ្រឿងខាងលើ រួចបញ្ជូនមកកាន់អធិការដ្ឋាននគរបាលខណ្ឌទួលគោក ដើម្បីចាត់ការតាមនីតិវិធីច្បាប់តែម្ដង៕
