អាជ្ញាធរខណ្ឌកំបូល ចុះបិទទីតាំងកត់កន្ទុយលេខ មួយកន្លែងជាលើកទីពីរ នៅភូមិត្រពាំងគល់ សង្កាត់កន្ទោកឃាត់ខ្លួន២នាក់
ភ្នំពេញ៖ដោយទទួលបានបទបញ្ជាពីលោក ឃឹម ស៊ុនសូដា អភិបាលខណ្ឌកំបូល និងជាប្រធានគណៈបញ្ជាការរដ្ឋបាលខណ្ឌ ព្រមទាំងមានការសម្របសំរួលពីរលោក មុត ដារ៉ា ព្រះរាជអាជ្ញារងអមសាលាដំបូងរាជធានីភ្នំពេញ កាលពីរសៀលថ្ងៃ ទី២៧ ខែវិច្ឆិកា ឆ្នាំ២០២០ លោក ហោ វាសនា អភិបាលរងខណ្ឌកំបូល រួមជាមួយលោក គន់ ចាន់សុភារីនាយករងរដ្ឋបាល បានដឹកនាំមន្រ្តីការិយាល័យសេដ្ឋកិច្ច និងអភិវឌ្ឍន៍សហគមន៍ ដោយមានការចូលរួមសហការពីនគរបាល អាវុធហត្ថខណ្ឌ និងមន្ត្រីសណ្តាប់ធ្នាប់ខណ្ឌ ចុះបិទទីតាំងកត់កន្ទុយលេខ មួយកន្លែងជាលើកទីពីរ ស្ថិតនៅផ្ទះលេខ១៥ ផ្លូវលេខ៦(បុរីពិភពថ្មីកំបូល១) ភូមិត្រពាំងគល់ សង្កាត់កន្ទោក ខណ្ឌកំបូល ។
មន្ត្រីសាលាខណ្ឌឱ្យដឹងថា៖ក្នុងពេលចុះទៅដល់ទីតាំង ក្រុមការងារចុះពិនិត្យជាក់ស្ដែងឃើញថា ទីតាំងខាងលើនេះ បានបន្តបើកលក់កន្ទុយលេខដោយខុសច្បាប់ ក្នុងនោះក្រុមការងារបានសម្រេចដកហូតវត្ថុតាងមួយចំនួនមករក្សាទុក និងបានឃាត់ខ្លួនមនុស្សចំនួនពីរនាក់ បញ្ជូនមកអធិការដ្ឋាននគបាលខណ្ឌ ដេីម្បីចាត់ការបន្តនីតិវិធីច្បាប់៕