នគរបាលខេត្តសៀមរាបចាប់ខ្លួនប្តី សម្លាប់ប្រពន្ធ រួចយកទៅដុតចោល
ខេត្តសៀមរាប ៖ នៅថ្ងៃទី៣០ ខែមេសា ឆ្នាំ២០២១ សមត្ថកិច្ចនគរបាលបានឃាត់ខ្លួនជនសង្ស័យម្នាក់ជាប្តីដែលបាន សម្លាប់ប្រពន្ធ រួចយកទៅដុតចោលនៅចំណុចដីចំការរបស់ខ្លួន។
ជនសង្ស័យឈ្មោះ អេង អឿន ភេទប្រុស អាយុ៥២ឆ្នាំ ជាប្តី មានទីលំនៅភូមិខ្នារក្រៅ(ត្រពាំងត្បាល់ ) ឃុំកន្ទួត ស្រុកស្វាយលើ ខេត្តសៀមរាប ។
តាមរបាយការណ៍បានឲ្យដឹងថា សង្ស័យបានប្រព្រឹត្តករណីឃាតកម្ម កាលពីថ្ងៃទី២៧ ខែមេសា ឆ្នាំ២០២១ វេលាម៉ោង១១និង១០នាទី នៅចំណុចផ្ទះរបស់ខ្លួនភូមិខ្នាក្រៅ ឃុំកន្ទួតស្រុក ស្វាយលើ ខេត្តសៀមរាប។
ជនរងគ្រោះឈ្មោះ លី កូលាប (ត្រូវជាប្រពន្ធ) អាយុ៣៦ឆ្នាំ រស់នៅភូមិ ឃុំខាងលើ។
នៅចំពោះមុខសមត្ថកិច្ចជំនាញ ជនសង្ស័យបានឆ្លើយសារភាពថា ខ្លួនពិតជាបានប្រព្រឹត្តអំពើមនុស្សឃាតលើប្រពន្ធខ្លួនឯងពិតប្រាកដមែន។ ជនសង្ស័យបានបញ្ជាក់បន្ថែមថា ខ្លួនបានច្របាច់កជនរងគ្រោះរហូតដល់ដាច់ខ្យល់ស្លាប់ ហើយអូសសពទៅដាក់ក្បែរទ្រុងជ្រូក ដោយយកកៅស៊ូតង់ពណ៌ខៀវគ្របពីលើសាកសព មិនឲ្យអ្នកណាដឹងនោះឡើយ។ លុះដល់វេលាម៉ោង០៤និង០០នាទីទៀបភ្លឺ ថ្ងៃទី២៩ ខែមេសា ឆ្នាំ២០២១ បានដឹកសាកសពដោយគោយន្តកន្ត្រៃ យកទៅដុតចោលនៅចំណុចដីចំការរបស់ខ្លួន។
មូលហេតុ គឺបណ្តាលមកពីឈ្លោះប្រកែកគ្នា ដោយហាមប្រពន្ធមិនឲ្យលក់ដី និងខ្លាចប្រពន្ធយកលុយទៅលេងល្បែងអស់។
សមត្ថកិច្ចនៃស្នងការដ្ឋាននគរបាលខេត្តសៀមរាប បានកសាងសំណុំរឿងបញ្ជូនជនសង្ស័យទៅសាលាដំបូងខេត្តសៀមរាប ដើម្បីផ្តន្ទាទោសតាមច្បាប់៕