បុរសម្នាក់ស្លាប់ ដោយជាន់ខ្សែលួសឆក់កណ្ដុរ នៅ ស្រុកខ្សាច់កណ្ដាល

កណ្ដាលៈ នគរបាលជំនាញស្រុកខ្សាច់កណ្ដាល ធ្វើការពិនិត្យសាកសព បុរសម្នាក់ ដែលបានស្លាប់ ដោយសារជាន់ខ្សែលួស ឆក់កណ្ដុល របស់ពលរដ្ឋរាយតាមភ្លឺស្រែ ។ ហេតុការណ៍នេះ បង្កការភ្ញាក់ផ្អើលឡើង នៅវេលាម៉ោង ៥ព្រឹក ថ្ងៃទី១៧ ខែមិថុនា ឆ្នាំ២០១៩ ស្ថិតក្នុងភូមិវិហារសួគ៌ជើង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ។
មន្ត្រីនគរបាលផ្នែកោសល្យវិច័យស្រុកខ្សាច់កណ្ដាល បានឲ្យដឹងថា ជនរងគ្រោះឈ្មោះ ផាច តូច ភេទប្រុស អាយុ២៤ឆ្នាំ ជនជាតិខ្មែរ មុខរបរ បើករថយន្តដឹកដី មានទីលំនៅភូមិតាលាក់ផែ ឃុំបួរ ស្រុកភ្នំព្រឹក ខេត្តបាត់ដំបង រីឯជនសង្ស័យ ជាអ្នករាយខ្សែលួសឆក់កណ្ដុរឈ្មោះ ផេង ផៃ ភេទប្រុស អាយុ៥៧ឆ្នាំ ជនជាតិខ្មែរ មុខរបរ កសិករ មានទីលំនៅភូមិ-ឃុំ-កើតហេតុ (គេចខ្លួន)។ ចំណែកវត្ថុតាងចាប់យក៖ ១.អាគុយ ០១គ្រឿង ម៉ាក Heng Seng កម្លាំង ៥០អំពែ ២.ខ្សែលួស ០១ដុំ និង៣.អាំងដុចទ័រចំនួន ០១។
ប្រភពដដែលបន្តថា រយៈពេលជិតមួយខែមកហើយ ជនរងគ្រោះឈ្មោះ ផាច តូច បានមកធ្វើការជាកម្មករ បើករថយន្តដឹកដីឲ្យក្រុមហ៊ុន 7NG នៅភូមិវិហារសួគ៌ជើង ឃុំវិហារសួគ៌ ស្រុកខ្សាច់កណ្តាល លុះមកដល់ថ្ងៃទី ១៦ ខែមិថុនា ឆ្នាំ២០១៩ វេលាម៉ោងប្រមាណ២០ ក្រោយពីហូបបាយនៅក្នុងការដ្ឋានរួច ជនរងគ្រោះបានឡើងដេក នៅលើរថយន្តរបស់ខ្លួនតែម្នាក់ឯង ឯតៃកុងរថយន្តផ្សេងទៀត ក៏ដេកនៅលើរថយន្តរៀងៗខ្លួនដែរ ។ រហូតដល់ម៉ោងប្រមាណ៥ព្រឹក ថ្ងៃទី ១៧ ខែមិថុនា ឆ្នាំ២០១៩ ស្រាប់តែមានគេប្រទះឃើញ ជនរងគ្រោះដេកស្លាប់ នៅលើភ្លឺស្រែ ក៏ផ្អើលឆោឡោដល់ប្រជាពលរដ្ឋ និងសមត្ថកិច្ច ចុះធ្វើការពិនិត្យ ឃើញថា សាកសពមានស្នាមរោលខ្លោច រយះដាច់ស្បែកលើក្បាលជង្គង់ស្តាំ ១កន្លែង លើភ្លៅខាងស្តាំមានស្នាមខ្លោច ០១កន្លែង និងកំភួនដៃខាងស្តាំ ០១កន្លែង។ ក្រោយពីពិនិត្យរួច សមត្ថកិច្ចជំនាញសន្និដ្ឋានថា ជនរងគ្រោះស្លាប់ ដោយសារឆក់ចរន្តអគ្គិសនី ប្រាកដមែន ។ ចំណែកជនសង្ស័យ ដែលរត់គេចខ្លួន ត្រូវបាននគរបាលកសាងសំណុំរឿង ស្រាវជ្រាចាត់ការ តាមនីតិវិធីច្បាប់ រីឯ សាកសព ត្រូវបានសមត្ថកិច្ច ប្រគល់ទៅឲ្យក្រុមគ្រួសារចាត់ចែង ធ្វើបុណ្យតាមប្រពៃណី ៕