ចាប់ខ្លួននារីម្នាក់ ដែលដឹកជនដៃដល់ ទៅធ្វើសកម្មភាពកាច់កម៉ូតូ ហើយប្រើអាវុធបាញ់គំរាមសំលាប់
ខេត្តកំពង់ចាម ៖ ក្រោយពីបង្រ្កាបក្រុមចោរកាច់កម៉ូតូ មានអាវុធបាញ់គំរាម យ៉ាងសកម្មនៅក្នុងក្រុងកំពង់ចាម ដោយជោគជ័យថ្មីៗនេះ នគរបាលផែនការងារព្រហ្មទណ្ឌបានពន្លាតដែនសមត្ថកិច្ចរបស់ខ្លួន បន្តតាមចាប់ខ្លួនបក្ខពួករបស់ក្រុមចោរនេះ បន្តទៀត ខណះក្រោយធ្វើ សកម្មភាពបក្ខពួកជាស្រ្តីម្នាក់ បានរត់ទៅសម្ងំលាក់ខ្លួននៅខេត្តសៀមរាប ។
នៅថ្ងៃទី១៩ ខែឧសភា ឆ្នាំ២០២១នេះ លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានប្រាប់អោយដឹងថា រូបលោកបានចាត់អោយ កម្លាំងជំនាញ នៃផែនការងារនគរបាលព្រហ្មទណ្ឌ ដឹកនាំដោយលោកវរសេនីយ៍ឯក ចាន់ ហោ អនុប្រធានផែនការងារព្រហ្មទណ្ឌ សហការជាមួយ កម្លាំងនគរបាលព្រហ្មទណ្ឌកម្រិតធ្ងន់ នៃស្នងការដ្ឋានខេត្តសៀមរាប ។
ចុះអនុវត្តដីកានាំខ្លួនលេខ ៤២១ ចុះថ្ងៃទី១៨ ខែឧសភា ឆ្នាំ២០២១ ចេញដោយចៅក្រមស៊ើបសួរសាលាដំបូងខេត្តកំពង់ចាម នៅចំណុចសាលារៀនទឹកលិច ស្ថិតក្នុងឃុំទឹកលិច ស្រុកប្រាសាទបាគង ខេត្ដសៀមរាប ដែលបង្គាប់ឲ្យនាំខ្លួនឈ្មោះ គី ចន្ថា ហៅស្រីមុំ ភេទស្រី អាយុ២៥ឆ្នាំ ដែលមានទីលំនៅបច្ចុប្បន្នភូមិស្វាយជ័យ ឃុំត្រពាំងធំ ស្រុកប្រាសាទបាគង ខេត្តសៀមរាប ពីបទ លួចមានស្ថានទម្ងន់ទោស និងប្រើប្រាស់អាវុធដោយ គ្មានការអនុញ្ញាត ។
លោកឧត្តមសេនីយ៍ បានបញ្ជាក់អោយដឹងថា តាមចម្លើយសារភាពនារីរូបនេះ គឺជាអ្នកដឹកជនដៃដល់ អោយធ្វេីសកម្មភាព ប្រព្រឹត្តបទលើ្មសតាមរយះកាច់ក ម៉ូតូប្រើកាំភ្លើងបាញ់គំរាម នៅចំណុចភូមិបឹងកុក២ សង្កាត់បឹងកុក ក្រុងកំពង់ចាម ខេត្តកំពង់ចាម កាលពីថ្ងៃទី៩ ខែមេសា ឆ្នាំ២០២១ ។
សូមរំលឹកថា កាលពីថ្ងៃទី០៦ ខែឧសភា ឆ្នាំ២០២១កន្លងទៅថ្មីៗនេះ នគរបាលបានឃាត់ខ្លួន ជនសង្ស័យ៥នាក់ ក្នុងនោះ៣នាក់ពាក់ព័ន្ធនឹង ប្រេីអាវុធបាញ់គំរាមប្លន់ យកទ្រព្យសម្បត្តិជនរងគ្រោះ ដែលកន្លងមកក្រុមនេះ ធ្លាប់ធ្វើសកម្មភាពចំនួន១៥លើក ក្នុងភូមិសាស្ត្រខេត្តកំពង់ចាមហើយយកទៅលក់នៅរាជធានីភ្នំពេញ និង២នាក់ទៀតជាអ្នកចាំទទួល ទិញផលចោរកម្ម នៅចំណុចតាមផ្លូវវិមានឈ្នះឈ្នះ ស្ថិតនៅសង្កាត់ព្រែកព្នៅ ខ័ណ្ឌព្រែកព្នៅ រាជធានីភ្នំពេញ ដេីម្បីបញ្ជូនពួកគេទៅកាន់ សាលាដំបូងចាត់ការតាមច្បាប់ ។
កិច្ចសហការប្រតិបត្តិការនេះចូលរួម ដោយកម្លាំងជំនាញ ផែនការងារនគរបាលព្រហ្មទណ្ឌ ; កម្លាំងជំនាញ អធិការដ្ឋាននគរបាល ស្រុកកំពង់សៀម/ក្រុងកំពង់ចាម ដឹកនាំដោយ លោកឧត្ដមសេនីយ៍ត្រី ហេង វុទ្ឋី ស្នងការរងទទួលផែនការងារ នគរបាលព្រហ្មទណ្ឌ និងមានការដឹកនាំ សម្របសម្រួលផ្ទាល់ពីលោក សាន សុភះ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម ៕
