នគរបាលអន្តោប្រវេសន៍ នឹងអនុវត្តដីកាចាប់ខ្លួន ទណ្ឌិត សម រង្ស៊ី នៅពេលត្រឡប់ចូប្រទេសវិញ
បាត់ដំបង៖ លោកសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ បានប្រកាសថា នគរបាលអន្តោប្រវេសន៍តាមច្រកទ្វារព្រំដែនទាំងអស់បានត្រៀមរួចរាល់ហើយ ដើម្បីចាប់ខ្លួន ទណ្ឌិត សម រង្ស៊ី តាមដីកាតុលាការ នៅពេលចូលក្នុងទឹកដីកម្ពុជាវិញ ។ នេះបើតាមការផ្សាយរបស់អគ្គនាយកដ្ឋានអន្តោប្រវេសន៍ – General Department of Immigration – GDI កាលពីថ្ងៃទី២៨ខែមករាឆ្នាំ២០១៩ ។
អគ្គនាយកដ្ឋានអន្តោប្រវេសន៍ បានបន្ថែមថា មានប្រសាសន៍ក្នុងពិធីជួបជុំជាមួយនឹង មន្ត្រីនាយនគរបាល និងថ្នាក់ដឹកនាំ នៃអគ្គនាយកដ្ឋានអន្តោប្រវេសន៍ នៅខេត្តបាត់ដំបង នាព្រឹកថ្ងៃទី២៧ ខែមករា ឆ្នាំ២០១៩ ។ លោក សន្តិបណ្ឌិត សុខ ផល បញ្ជាក់ប្រាប់ដល់មន្ត្រីនគរបាលទាំងអស់ ជាអ្នកអនុវត្តច្បាប់ នឹងជាតួនាទី របស់កងកម្លាំង ដែលត្រូវទទួលបញ្ជា និងអនុវត្តតាមដីកាតុលាការ ។
គួរបញ្ជាក់ថាលោក សម រង្ស៊ី ត្រូវបានសាលាដំបូងរាធានីភ្នំពេញ ចេញដីកាបង្គាប់ឲ្យចាប់ខ្លួន នៅថ្ងៃទី៩ ខែធ្នូ ឆ្នាំ២០១៥ ចោទប្រកាន់ពីបទ សមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់ បង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម ៕
