ចាប់បុគ្គលិកក្រុមហ៊ុន OISHI ២នាក់ កឹបកេងលុយក្រុមហ៊ុនជាង២លានដុល្លារ
ភ្នំពេញ ៖ បុរស២នាក់ដែលជាបុគ្គលិករបស់ក្រុមហ៊ុន HSC Beverages Co.,Ltd (OISHI) ត្រូវបានកម្លាំងប៉ូលិសនាយកដ្ឋានព្រហ្មទណ្ឌ នៃអគ្គស្នងការដ្ឋាននគរបាលជាតិ ចាប់ខ្លួនជាបន្ដបន្ទាប់នៅថ្ងៃទី២០ ខែសីហា ឆ្នាំ២០១៩ ក្រោយពីបានទទួលពាក្យបណ្ដឹងរបស់ក្រុមហ៊ុនថា បានកឹបកេងលុយក្រុមហ៊ុនអស់ជាង ២លានដុល្លារសហរដ្ឋអាមេរិក ។
ជនសង្ស័យឈ្មោះ សុង សាក់លី តួនាទីជាអ្នកគ្រប់គ្រងទូទៅចាប់ខ្លួននៅថ្ងៃទី២០ ខែសីហា ឆ្នាំ២០១៩ និងឈ្មោះសម រតនៈ តួនាទីជាប្រធានគណនេយ្យ ត្រូវបានចាប់ខ្លួនកាលថ្ងៃទី១១ ខែសីហា ឆ្នាំ២០១៩កន្លងទៅ។ ការចាប់ខ្លួនបុរសទាំងពីររូបខាងលើនេះបានធ្វើឡើងតាមពាក្យបណ្ដឹងរបស់នាយកក្រុមហ៊ុន HSC Beverages Co.,Ltd ដែលក្រុមហ៊ុនសង្ស័យនិងរកឃើញថា ចាប់តាំងពីឆ្នាំ២០១៧ មកក្រុមហ៊ុនបានបាត់បង់ប្រាក់ចំណូលប្រមាណជាង២លានដុល្លារអាមេរិក ។
ប៉ូលិសបន្តថា មុនឈានដល់ការដាក់ពាក្យបណ្ដឹង កាលពីថ្ងៃទី២១ ខែមិថុនា ឆ្នាំ២០១៩កន្លងទៅ បុគ្គលឈ្មោះ សុង សាក់លី និងឈ្មោះ សម រតនៈ ព្រមទាំងអ្នកផ្សេងទៀតផងដែរ ដែលពាក់ព័ន្ធក៏បានធ្វើកិច្ចព្រមព្រៀងជាមួយក្រុមហ៊ុន ដើម្បីធ្វើសវនកម្មផ្ទៃក្នុង ។ ប៉ុន្ដែក្រោយធ្វើកិច្ចសន្យារួចមកបុគ្គលទាំងពីរនាក់នេះ បានព្យាយាមគេចវេះមិនព្រមចូលខ្លួនធ្វើសវនកម្មផ្ទៃក្នុងនោះឡើយ។
បច្ចុប្បន្នជនសង្ស័យទាំងពីរនាក់ ត្រូវបានប៉ូលិសសួរនាំ នៅនាយកដ្ឋានប៉ូលិសព្រហ្មទណ្ឌ ដើម្បីកសាងសំណុំរឿងចាត់ការបន្ដតាមនីតិវិធី៕ដោយ៖បញ្ញាស័ក្តិ