គ្រោះថ្នាក់ចរាចរណ៍ដ៏រន្ធត់ ជិតឆ្លងឆ្នាំសកល ២០២០ ស្លាប់ ៨ នាក់ របួសធ្ងន់ ៩នាក់
កំពង់ស្ពឺ៖ ករណីគ្រោះថ្នាក់ចរាចរណ៍ដ៏រន្ធត់លើកំណាត់ផ្លូវជាតិលេខ៤១ ចន្លោះគីឡូម៉ែត្រ ២៧-២៨ ស្ថិតនៅចំណុចភូមិអណ្ដូងច្រុះ ឃុំស្នំក្រពើរ ស្រុកគងពិសី ខេត្តកំពង់ស្ពឺ កាលពីវេលាម៉ោង១១:៤២នាទី នាថៃ្ងទី៣១ ខែធ្នូ ឆ្នាំ២០១៩ ជិតឆ្លងឆ្នាំសកល ២០២០ ស្លាប់ ៨ នាក់ របួសធ្ងន់ ៩នាក់ ។
ករណីគ្រោះថ្នាក់ចរាចរណ៍បង្កឡើងដោយរថយន្តទេសចរណ៍ ប្រភេទសាំយ៉ុង ផ្លាកលេខភ្នំពេញ 2AF-2506 អ្នកបើកបរ ស្លាប់ រថយន្ដបើកបរពីទិសខាងជើងទៅត្បូង រួចបានរេចង្កូតចូលគន្លងផ្លូវផ្នែកខាងឆ្វេងដៃនៃ រថយន្តដឹកទំនិញស៊ីម៉ងត៍ ម៉ាក HINO ពាក់ផ្លាកលេខភ្នំពេញ 3A-5849 ធ្វើដំណើរពីទិសខាងត្បូងទៅខាងជើង អ្នកបើកបរគេចខ្លួន ។
ក្នុងហេតុការណ៍នោះដែរ បណ្តាលឲ្យរងរបួសធ្ងន់ ៩នាក់ស្រី ១នាក់ របួសស្រាល ១នាក់ ស្លាប់បាត់អាយុជីវិតមនុស្ស ៨ នាក់ ស្រី ៥ (អ្នកពោះធំ ២នាក់ )។
តាមការបញ្ជាក់ឲ្យដឹងពីលោកវរសេនីយ៍ឯក ឃឹម សុផាន់រ៉ា អធិការស្រុកគងពិសី មូលហេតុនៃគ្រោះថ្នាក់ចរាចរណ៍ខាងលើ គឺបណ្ដាលមកពីអ្នកបើករថយន្ដសាំយ៉ុង ឆ្វេសប្រហែសបានរេចង្កូត ចូលទៅផ្នែកខាងឆ្វេងដៃ ទៅរកគន្លងផ្លូវ នៃផ្នែកខាងឆ្វេងរថយន្ដដឹកស៊ីម៉ងត៍ កំពុងបើកបញ្រ្ចាសទិសគ្នា បណ្តាលឲ្យបុកពេញទំហឹងតែម្ដង។
អ្នករងគ្រោះត្រូវបានកម្លាំងនគរបាល ជួយសម្រួលយកចេញពីក្នុងរថយន្ដ បញ្ជូនសង្រ្គោះទៅកាន់មន្ទីរពេទ្យបង្អែកស្រុកគងពិសី មន្ទីរពេទ្យខេត្តកំពង់ស្ពឺ និងទៅរាជធានីភ្នំពេញ។
លោកវរសេនីយ៍ឯក បានបញ្ជាក់ថា មកដល់ម៉ោង ២:០០នាទី នាថ្ងៃទី១ ខែមករា ឆ្នាំ២០២០ នេះក្រុមគ្រួសារសពបានមកទទួលយកទៅធ្វើបុណ្យតាមគន្លងប្រពៃណី នៅគេហដ្ឋានរៀងៗខ្លួន ក្នុងនាមកងកម្លាំងនគរបាល សូមចូលរួមសោកស្ដាយបំផុតជាមួយក្រុមគ្រួសារនៃអ្នករងគ្រោះទាំងអស់ ដែលបានស្លាប់ក្នុងហេតុការគ្រោះថ្នាក់ចរាចរណ៍ខាងលើនេះ ។
សូមចូលរួមគោរពច្បាប់ចរាចរណ៍ទាំងអស់គ្នា ៕
