ប្រទេសចំនួន ៤៤ប្រទេស នៅជុំវិញពិភពលោក រួមទាំងកូរ៉េខាងជើង ត្រូវការជំនួយជាបន្ទាន់

អង្គការកសិកម្ម និងស្បៀងអាហារ (Food and Agriculture Organization) ដែលហៅកាត់ថា ហ្វាវ (FAO) បានចេញរបាយការណ៍មួយ នៅថ្ងៃ ទី៦ មីនានេះ ស្តីពីប្រទេសចំនួន ៤៤ប្រទេស នៅជុំវិញពិភពលោក រួមទាំងកូរ៉េខាងជើងផងដែរ ដែលត្រូវការជំនួយជាបន្ទាន់ ដែលនេះបើតាមការចុះផ្សាយ របស់ទីភ្នាក់ងារព័ត៌មាន យ៉ុនហាប់ (Yonhap News Agency) ។

អង្គការ FAO បានឲ្យដឹងថា ៤០% នៃចំនួនប្រជាពលរដ្ឋកូរ៉េខាងជើង សរុបជាង ២៥លាននាក់ កំពុងជួបប្រទះនូវគ្រោះទុរភិក្ស ដោយមិនមានអាហារ ទទួលទានគ្រប់គ្រាន់ប្រចាំឆ្នាំ ខណៈដែលប្រទេសឯកោមួយនេះ បានជួបប្រទះនូវគ្រោះរាំងស្ងួត អស់រយៈពេលជាង ០៣ឆ្នាំជាប់គ្នា។

កង្វះអាហារទទួលទានប្រចាំឆ្នាំ បានធ្វើឲ្យប៉ះពាល់យ៉ាងខ្លាំងដល់សុខភាព របស់ប្រជាពលរដ្ឋកូរ៉េខាងជើង ដោយធ្លាក់ខ្លួនឈឺ ហើយប្រសិនបើពិភពលោក មិនផ្តល់ជំនួយដល់ប្រទេសនេះ ឲ្យទាន់ពេលវេលាទេ ការបាត់បង់ជីវិតមនុស្ស និងជំងឺរាតត្បាតកាន់ខ្លាំង នៅក្នុងប្រទេសនេះ៕