បិទសាលា CIS សាខាកោះពេជ្រ ក្រោយរកឃើញជនជាតិកាណាដា ឆ្លងជំងឺ COVID-19
ភ្នំពេញ៖ បន្ទាប់ពីការរកឃើញបុរសជនជាតិកាណាដាម្នាក់ ដែលជាគ្រូបង្រៀននៅសាលា CIS ឆ្លងជំងឺរលាកផ្លូវដង្ហើមកូរ៉ូណា( COVID-19) មកនោះ នៅថ្ងៃទី១៤ខែមីនាឆ្នាំ២០២០នេះ ក្រសួងសុខាភិបាល សម្រេចឲ្យបិទសាលា CIS សាខាកោះពេជ្រ ជាបណ្តោះអាសន្ន ។
ដោយឡែកជនជាតិប៊ែលហ្សិក ជាបុគ្គលិកអង្គការអន្តរជាតិមួយ ក៏ត្រូវបាននាំមកព្យាបាលដាច់ដោយឡែកនៅមន្ទីរពេទ្យមិត្តខ្មែរ-សូវៀតដែរ។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងថា សាលា CIS សាខាកោះពេជ្រ ក្រសួងបានសម្រេចហើយ គឺស្នើសុំទៅក្រសួងអប់រំ យុវជន និងកីឡា ឲ្យធ្វើការបិទបណ្តោះអាសន្ន ហើយត្រូវមានការអនុវត្តន៍នូវការសម្អាត ហើយអ្នកគ្រូ លោកគ្រូ ក៏ដូចជាសិស្សានុសិស្សដែលរៀននៅសាលានោះ សូមបន្តតាមដាននូវសុខភាពផ្ទាល់ខ្លួន ក្នុងរយៈពេល១៤ថ្ងៃ ហើយក្រុមការងារ អ្នកស្រាវជ្រាវក្រសួងសុខាភិបាល នឹងធ្វើការងារបន្តទៀត ដើម្បីស្រាវជ្រាវអ្នកប៉ះពាល់ផ្ទាល់ និងប៉ះពាល់ប្រយោល ដើម្បីចាត់វិធានការបន្តទៀត។
លោកស្រីបានឲ្យដឹងថា បុរសជនជាតិកាណាដា វ័យ៤៩ឆ្នាំ ដែលរកឃើញមាន Covid-19 នោះ បានធ្វើដំណើរមកពីប្រទេសថៃ មកកម្ពុជា នៅល្ងាចថ្ងៃទី៩ ខែមីនា ឆ្នាំ២០២០។ ក្រោយពីត្រឡប់មកដល់កម្ពុជាវិញ នៅថ្ងៃទី១១ ខែមីនា ឆ្នាំ២០២០ គាត់មានអាការៈមិនស្រួលខ្លួន ក៏ទំនាក់ទំនងក្រុមគ្រូពេទ្យពិនិត្យ។ នៅថ្ងៃទី១២ ក្រុមគ្រូពេទ្យបានពិនិត្យ និងយកសំណាកធ្វើតេស្តនៅវិទ្យាស្ថានប៉ាស័រកម្ពុជា ហើយមកដល់ថ្ងៃទី១៣ ខែមីនា ឆ្នាំ២០២០ ទើបលទ្ធផលបញ្ជាក់ថា បុរសនោះមានផ្ទុកវីរុស Covid-19។
លោកស្រី បញ្ជាក់ថា បន្ទាប់ពីរកឃើញថាមាន Covid-19 ហើយបរុសជនជាតិកាណាដារូបនេះ បានរស់នៅក្នុងផ្ទះមួយ ជាមួយកូន២នាក់ ដែលត្រូវឲ្យក្រុមគ្រូពេទ្យត្រូវយកសំណាករបស់កូនៗទាំង២នាក់នោះ ទៅធ្វើតេស្តពិនិត្យរក Covid-19 ផងដែរ ដែលមកដល់នេះក្រសួងសុខាភិបាល កំពុងរង់ចាំលទ្ធផល។
លោកស្រី ឱ វណ្ណឌីន បន្ថែមទៀតថា ដោយសារសំណូមពរយ៉ាងទទូចសូមធ្វើការព្យាបាលនៅផ្ទះ ព្រោះកូនៗរបស់គាត់គ្មានអ្នកមើលថែនោះ និងកំពុងរង់ចាំលទ្ធផលធ្វើតេស្តលើកូនៗរបស់គាត់ផងដែរ ក្រសួងសម្រេចដាក់បុរសកាណាដា នៅផ្ទះដាក់ដោយឡែកតែឯង ដោយមិនឲ្យគាត់ចេញទៅណាឡើយ ដោយក្រុមគ្រូពេទ្យបន្តតាមដានយ៉ាងយកចិត្តទុកដាក់ ហើយប្រសិនបើមានការវិវត្តថ្មីបន្ថែមទៀត ក្រសួងនឹងធ្វើការដោះស្រាយ ចាត់វិធានការថ្មីៗបន្ថែមទៀត។
លោកស្រីបន្តថា សម្រាប់ករណីរកឃើញជំងឺ Covid-19 លើជនជាតិប៊ែលហ្ស៊ិក ដែលជាបុគ្គលិកនៃអង្គការអន្តជាតិមួយ ដោយសារមានសំណើពីអង្គការសុខភាពពិភពលោក ដោយមានការស្នើសុំពីសហគមន៍អន្តរជាតិ ស្នើសុំយ៉ាងទទូចនោះមិនឲ្យក្រសួងផ្សព្វផ្សាយជាសធារណៈនូវអត្តសញ្ញាណ និងទីតាំងធ្វើការជាក់លាក់របស់បុគ្គលនោះ ក្រសួងសុខាភិបាលក៏សុំអភ័យទោសផងដែរ ដោយត្រូវធ្វើតាមការស្នើសុំរបស់អន្តរជាតិ។
លោកស្រីបញ្ជាក់ថា ជនជាតិប៊ែលហ្ស៊ិកដែលរកឃើញជំងឺ Covid នេះ គាត់បានអនុវត្តន៍នូវការការពារមិនឲ្យមានការចម្លងជំងឺចេញទៅក្រៅផងដែរ ហើយបច្ចុប្បន្នជនជាតិប៊ែលហ្ស៊ិកនេះ ក្រសួងត្រូវបានដាក់ឲ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀតផងដែរ។
លោកស្រី វណ្ឌឌីន បញ្ជាក់ថា ការឃើញជំងឺលើជនជាតិប៊ែលហ្ស៊ិកនេះ ធ្វើឡើងបន្ទាប់ពីគាត់ធ្វើដំណើរត្រឡប់មកពីប្រទេសក្នុងតំបន់អឺរ៉ុប ក៏មានអាការៈមិនស្រួលខ្លួន ក៏ឲ្យក្រុមគ្រូពេទ្យធ្វើតេស្ត ក៏ឃើញលទ្ធផលវិជ្ជមាន។
សូមបញ្ជាក់ថា រហូតដល់ពេលនេះគិតត្រឹមថ្ងៃទី១៤ ខែមីនា ឆ្នាំ២០២០នេះ កម្ពុជាបានរកឃើញកូវីដ១៩ ចំនួន៧ករណីហើយ ៕
