ដាក់បម្រាមមិនឲ្យជនបរទេស មកពីប្រទេសអ៊ីតាលី អាល្លឺម៉ង់ អេស្ប៉ាញ បារាំង និងអាមេរិក ចូលកម្ពុជា ដើម្បីទប់ស្កាត់ការរីករាលដាលជំងឺ Covid-19
ភ្នំពេញ៖ ដើម្បីទប់ស្កាត់ការរីករាលដាលជំងឺ Covid-19 នៅព្រឹកថ្ងៃទី១៤ ខែមីនា ឆ្នាំ២០២០នេះ ក្រសួងសុខាភិបាល បានសម្រេចដាក់បម្រាមមិនឲ្យជនបរទេស មកពីប្រទេសអ៊ីតាលី អាល្លឺម៉ង់ អេស្ប៉ាញ បារាំង និងអាមេរិក ចូលប្រទេសរយៈពេល៣០ថ្ងៃ ចាប់ពីថ្ងៃទី១៧ ខែមីនាតទៅ។
ក្រសួងសុខាភិបាលបានបញ្ជាក់ឲ្យដឹងថា បន្ទាប់ពីរកឃើញករណី Covid-19 ថ្មីនៅលើបុរសជនជាតិកាណាដា វ័យ៤៩ឆ្នាំ ដែលជាអ្នកធ្វើការនៅសាលារៀន CIS សាខាកោះពេជ្រនោះ ក្រសួងសម្រេចស្នើដល់ក្រសួងអប់រំ យុវជន និងកីឡា ឲ្យបិទជាបណ្ណោះអាសន្ន ខណៈអ្នកគ្រូ និងសិស្ស តម្រូវឲ្យធ្វើការតាមដានសុខភាពផ្ទាល់ខ្លួន រយៈពេល១៤ថ្ងៃ។
បើតាមសេចក្តីប្រកាសព័ត៌មានរបស់ក្រសួងសុខាភិបាល បានបញ្ជាក់ថា នាពេលថ្មីៗនេះ ព្រះរាជាណាចក្រកម្ពុជា បានរកឃើញជាបន្តបន្ទាប់នូវវីរុសកូវីដ១៩ លើជនបរទេស មានសញ្ជាតិផ្សេងៗ ដែលតម្រូវឲ្យមានវិធានការការពារទប់ស្កាត់ជាបន្ទាន់ នូវការចម្លងនាំចូលវីរុសកូវីដ១៩ មកក្នុងប្រទេសកម្ពុជា។ ដូចនេះ ក្រសួងសុខាភិបាល សូមចាត់វិធានការដាក់បម្រាមផ្អាកមិនឲ្យជនបរទេស ដែលមកពីប្រទេសអ៊ីតាលី អាល្លឺម៉ង់ អេស្ប៉ាញ បារាំង និងអាមេរិក ចូលមកកម្ពុជា ក្នុងរយៈ៣០ថ្ងៃ ដោយគិតចាប់ពីថ្ងៃទី១៧ខែមីនាឆ្នាំ២០២០តទៅ។
យោងតាមរបាយការណ៍ស្ថានភាពរាតត្បាតនៃវីរុរសកូវីដ១៩ របស់អង្គការសុខភាពពិភពលោកលេខ៥២ ចុះថ្ងៃទី១២ ខែមីនា ឆ្នាំ២០២០ បានបង្ហាញថា នៅលើសកលលោក មានប្រទេសចំនួន១១៧ ហើយ ដែលមានការរាតត្បាតវីរុសកូវីដ១៩។
សេចក្ដីប្រកាសព័ត៌មានដដែលថា ការសម្រេចផ្អាកនេះ ក្រសួងថា ដើម្បីការពារទប់ស្កាត់ជាបន្ទាន់នូវការចម្លងនាំចូលវីរុសកូវីដ១៩ ចូលមកប្រទេសកម្ពុជា។
ការដាក់វិធានការទប់ស្កាត់បន្ទាន់នេះ ធ្វើឡើងបន្ទាប់ពីក្រសួងសុខាភិបាល រកឃើញបុរសជនបរទេស២ នាក់ទៀត នៅរាជធានីភ្នំពេញ មានវីរុសកូវីដ-១៩ ហើយបច្ចុប្បន្នជនរទេសម្នាក់នេះ ត្រូវបានគ្រូពេទ្យដាក់ឱ្យនៅបន្ទប់ដាច់ដោយឡែកក្នុងមន្ទីរពេទ្យមិត្តភាពខ្មែរ-សូវៀត និងម្នាក់ទៀតដាក់ឲ្យព្យាបាលនៅផ្ទះដោយយោងស្ថានភាពគ្រួសារ គ្មានអ្នកមើលថែកូនរបស់គាត់។
គិតត្រឹមថ្ងៃនេះ កម្ពុជារកឃើញអ្នកផ្ទុកកូវីដ-១៩ចំនួន៧នាក់ហើយដែលក្នុងនោះមានជនជាតិខ្មែមួយរូប និងបរទេស៦នាក់។៕
