សមត្ថកិច្ចបង្ក្រាបជនសង្ស័យ២នាក់រឹបអូសថ្នាំញៀនជាង ១គីឡូក្រាម
ភ្នំពេញ ៖ កម្លាំងមន្ទីរប្រឆាំងគ្រឿងញឿន នៃអគ្គស្នងការដ្ឋាននគរបាលជាតិ បង្ក្រាបករណីជួញករណីរក្សាទុក ជួញដូរគ្រឿងញៀន ឃាត់ខ្លួនជនសង្ស័យ២នាក់ ជាមួយថ្នាំញៀនជាង១គីឡូក្រាម នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ។
មន្ទីរប្រឆាំងគ្រឿងញៀន នៅថ្ងៃទី១៨ ខែមីនា ឆ្នាំ២០២០នេះ បានចេញផ្សាយព័ត៌មានថា ប្រតិបត្តិការបង្ក្រាបនេះ ធ្វើឡើងនៅថ្ងៃទី១៦ ខែមីនា ឆ្នាំ២០២០ នៅម៉ោង៤និង៣០នាទីរសៀល នៅចំណុចបន្ទប់ជួលលេខ០៤ ផ្លូវបេតុង សង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ ។
កម្លាំងជំនាញរបស់មន្ទីរប្រឆាំងបទល្មើសគ្រឿងញៀន(ក៦) ដឹកនាំដោយលោក ដាំ ឈឿន នាយករងមន្ទីរប្រឆាំងគ្រឿងញៀន និងមានការសម្របសម្រួលពីលោក សឿន មុន្នីរ័ត្ន ព្រះរាជអាជ្ញារង និងក្រឡាបញ្ជី លោក ឡេង ណាង បានដំណើរការបើកកិច្ចប្រតិបត្តិការស្រាវជ្រាវ បង្ក្រាបករណី រក្សាទុកជូញដូរគ្រឿងញៀនខុសច្បាប់ ឃាត់ខ្លួនសង្ស័យ២នាក់ ឈ្មោះ ចុង សំអុល ភេទប្រុស អាយុ៣៧ឆ្នាំ ជនជាតិខ្មែរជាប្តី និងឈ្មោះ ឡេ ធីចិន ភេទស្រីអាយុ៣៨ឆ្នាំ ជនជាតិវៀតណាម ជាប្រពន្ធ ។ ប្រតិបត្តិការនេះ បានចាប់យកវត្ថុតាងជាសារធាតុញៀន ប្រភេទម៉េតំហ្វេតាមីន (ICE) ទម្ងន់១.០២៥,៥៦ក្រាម ។ កម្លាំងជំនាញកំពុងកសាងសំណុំរឿង ដើម្បីអនុវត្តបន្តតាមនីតិវិធី ៕
