គំនិតឡឺកឺ ៖ កណ្ដុំឆែប ចាក់តុលាការ យកឈាមលាយស្រាផឹក
ថាពួកក្មេងពាលទៅដែលផឹកស៊ីក្លែមសំដីគ្នា ឯខ្លះក្លែមនយោបាយ ហើយចុងក្រោយកាប់ចាក់គ្នា បន្ទាប់មកភាសាសាមញ្ញមួយ ក៏កើតឡើងភ្លាមដែរ គឺអាឈ្នះដេកគុក ឯ អាចាញ់បើមិនស្លាប់ក៏ដេកពេទ្យដែរ ។
ឥឡូវនេះក្នុងអាណាចក្រខេត្តកំពង់ធំ ស្រាប់តែលេចចេញនូវមន្ត្រីស្ទាវ ដែលយកកាំបិតទៅចាក់សម្លាប់គ្នា នៅកន្លែងផឹកស៊ីដើម្បីបង្អួតចៅហ្វាយខេត្ត ដែលទើបតែមកកាន់ការថ្មីៗ ។ ខ្លាចាក់សម្លាប់ខ្លាតែមួយរបួស ព្រោះមិនបានដឹងខ្លួនមុន ឯ ខ្លាមួយក្បាលទៀតគេចមិនផុតពីគុកឡើយ ។
រឿងរ៉ាវនេះកើតឡើងនាយប់ថ្ងៃទី១៦វិច្ឆិកា។ អាណាចក្រខេត្តកំពង់ធំ នរណាមិនស្គាល់លោកម៉ៅ ប៊ុនធូ នាយកទីចាត់ការអន្តរវិស័យសាលាខេត្តកំពង់ធំ ហើយពេលនេះគាត់មានមុខរបរមួយទៀតហើយ គឺជាឃាតករ ។ ហើយនរណាមិនស្គាល់លោកសាយ វាសនា ដែលជាព្រះរាជអាជ្ញារងនៃអយ្យការអមសាលាដំបូងខេត្តកំពង់ធំ ។
លោកប៊ុនធូ ពិតជាអ្នកសម្លាប់ដ៏មានទេពកោសល្យមែន ព្រោះលោកសាយ វាសនា អង្គុយផឹកស៊ីសុទ្ធតែជាមួយខ្លា នាភោជនីយដ្ឋានមួយដែលមានឈ្មោះថាជ្រោះពេជចិន្តា ។ ពួកគេផឹកស៊ីក្នុងបន្ទប់V I P ឈ្មោះបន្ទប់ «កែប» ដែលរួមមានលោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ , លោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ , លោក ព្រហ្ម វាសនា អនុប្រធានមន្ទីរស្រាវជ្រាវព័ត៌មានសន្តិសុខកងរាជអាវុហត្ថខេត្តកំពង់ធំ , ឈ្មោះ លី យ៉ាស៊ីន និង ឈ្មោះ ព្រាម ហាក់។
បុរសដៃឆើតម៉ា ប៊ុនធូ ក៏បាននិងកំពុងហូបចុកនៅបន្ទប់ជាប់គ្នាក្នុងភោជនីយដ្ឋានជ្រោះពេជ្រចិន្តាដែរ ។ ក្រោយមក លោក ម៉ៅ ប៊ុនធូ បានដើរមកបន្ទប់ «កែប» ហើយក៏រុញទ្វារចូល តែដោយឃើញលោក សាយ វាសនា មានវត្តមានក្នុងបន្ទប់នោះ លោក ម៉ៅ ប៊ុនធូ បានធ្វើសកម្មភាពទាញរុញៗទ្វារចូលទៅក្នុងបន្ទប់កែប ។ ហើយដើរទៅខ្សឹបប្រាប់លោក ហង្ស ថុល និង លោក ឃុន ប៊ុនហូ ថា អោយទៅជល់កែវជាមួយឯកឧត្តម សុខ លូ អភិបាលខេត្តកំពង់ធំ ដែលបាននិងកំពុងហូបចុកនៅបន្ទប់ខាងកើតជាប់គ្នានោះ ។
ក្នុងខណៈដែលអវត្តមានមេ និង មេរងប៉េអឹមលោក ម៉ៅ ប៊ុនធូ បានហុចដៃឆ្វេង សុំលោក សាយ វាសនា ចាប់ដៃ ពេលនោះ លោក សាយ វាសនា ក៏បានយកដៃស្តាំរបស់ខ្លួនចាប់ដៃជាមួយលោក ម៉ៅ ប៊ុនធូ ដោយចាប់ដៃគ្នាយ៉ាងណែនល្អ ។ បន្ទាប់មក លោក ម៉ៅ ប៊ុនធូ បានដើររសសៀរ មកកៀកនឹងលោក សាយ វាសនា ហើយទាញកាំបិតចាក់បំពង់.ក លោក សាយវាសនាតែម្ដង។
ពេលនោះជនល្មើស បាននិយាយថា ចាក់សម្លាប់ព្រះរាជអាជ្ញារងយកឈាមលាយស្រាផឹក ។ ក្នុងសភាពពេលនោះ លោក ហង្ស ថុល ស្រែកអោយជនល្មើសទម្លាក់កាំបិតចោលតែជនល្មើសមិនព្រមទម្លាក់កាំបិត ហើយនៅតែប្រឹងយកកាំបិតបុកសំដៅបំពង់កជនរងគ្រោះ ។
ពេលនោះ ក៏មានសម្លេងឆោឡោខ្លាំង ទើបមានមនុស្សចំនួន៥ទៅ៦នាក់ បានចូលមកចាប់ដណ្តើមកាំបិតពីជនល្មើស ហើយក៏មានមនុស្សម្នាជាច្រើនផ្អើលឈុលចេញមកមើល ដោយក្នុងនោះ មានលោក សុខ លូ អភិបាលខេត្តកំពង់ធំ , លោក ប៉ែនវណ្ណរិទ្ធ ប្រធានមន្ទីរកសិកម្ម និង លោក ទូច សុខា អភិបាលស្រុកសន្ទុក ជាដើមផង។
បន្ទាប់ពីធ្វើសកម្មភាពមិនបានសម្រេច គេធ្វើអាកប្បកិរិយាស្រវឹង ធ្វើដូចមិនដឹងរឿងអីអ៊ីចឹង ។តាមពិត ជនល្មើសរូបនេះនេះ បានចងគំនុំនឹងលោក សាយ វាសនា ដោយហេតុថា លោក សាយ វាសនា បានទទួលបន្ទុកក្នុងសំណុំរឿងដែលជនល្មើសបានដឹកនាំកម្លាំងគ្មានបញ្ជាពីព្រះរាជអាជ្ញា ចុះទៅចាប់គ្រឿងចក្ររបស់ឈ្មោះ ជុត ថាន ដែលមានច្បាប់អនុញ្ញាតត្រឹមត្រូវពីអភិបាលខេត្ត និងមន្ទីរជំនាញពាក់ព័ន្ធ ដោយទាំងខ្លួនមិនមានសម្បទាជាមន្ត្រីនគរបាលយុត្តិធម៌ ដោយពេលនោះ ជនល្មើសស្នើសុំអោយលោក សាយ វាសនា កុំចាត់ការ តែលោក សាយ វាសនា បានអនុវត្តនីតិវិធីច្បាប់ ដោយហេតុថា ឈ្មោះ ជុត ថាន មិនព្រមចរចា ហើយជនល្មើសគុំគួនតាំងពីពេលនោះមករហូត ។
នេះបានចំជាមានគំនុំដូចក្នុងរឿងភាគកាប់ដាវចិនមែន ។ ហាស ហា ដេកក្នុងគុកសិនទៅ ហើយបើនៅចិញ្ចឹមគំនិតសងសឹកអ្ហេះទោះរង់ចាំ១០ឆ្នាំទៀត ក៏មិនទាន់ហួសពេលដែរ ។ ហាស ហា ៕