អាជ្ញាធរខណ្ឌមានជ័យ ប្រើប្រាស់ឡានទឹកជាច្រើនគ្រឿង ដើម្បីបាញ់ទឹកលាងសំអាត កំណាត់ផ្លូវជាតិលេខ២
ភ្នំពេញ ៖ នាព្រឹកថ្ងៃអង្គារទី ១៧ ខែ វិច្ឆិកា ឆ្នាំ ២០២០ លោក ឌី រ័ត្នខេមរុណ អភិបាលរងខណ្ឌមានជ័យ បានដឹកនាំកំលាំង សណ្តាប់ធ្នាប់ខណ្ឌ បាញ់លាងសំអាតផ្លូវ ទាំងសងខាង តាមបណ្តោយផ្លូវជាតិលេខ២ ចាប់ពីចំណុចស្តុបវិទ្យាល័យ ហ៊ុន សែន ចាក់អង្រែ សង្កាត់ចាក់អង្រែក្រោម ដល់ចំណុចស្ពានអាកាសក្បាលថ្នល់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដោយប្រើប្រាស់ឡានដឹកទឹកសាលាខណ្ឌមានជ័យ អស់ចំនួន ៥០ ឡានទឹក ។
ក្នុងនោះដែរ លោក ឌី រ័ត្នខេមរុណ អភិបាលរង ខណ្ឌមានជ័យ បានសំណូមពរឲ្យក្រុមហ៊ុន រថយន្តដឹកដីទាំងអស់ ដែលកំពង់ចរាចរលើបណ្តោយផ្លូវជាតិលេខ២ ចូលរួមអនុវត្តន៍ច្បាប់ចរាចរណ៍ផ្លូវគោកអោយបានត្រឹមត្រូវពេលរថយន្ត ដឹកដី ឬដឹកខ្សាច់ មុនពេលដឹកចេញពីការដ្ឋានត្រូវលាងកង់រថយន្តអោយបានស្អាត ត្រូវគ្របតង់អោយបានត្រឹមត្រូវ ជៀសវាងកុំអោយមានការហូរទឹកប្រឡាក់ផ្លូវដែលធ្វើអោយ ខូចសណ្តាប់ធ្នាប់ ហើយប៉ះពាល់ដល់អ្នកធ្វើដំណើរលើដងផ្លូវ។ ម្យ៉ាងវិញទៀតស្នើសុំកុំអោយដឹកលើសទម្ងន់ អាចកើតជាបញ្ហាគ្រោះថ្នាក់ចរាចរណ៍ ក៍បណ្តាលឲ្យប៉ះពាល់ដល់សោភ័ណភាពទីក្រុងថែមទៀតផងដែរ ។
សូមជម្រាបថា លោក ឌី រ័ត្នខេមរុណ អភិបាលរង ខណ្ឌមានជ័យ បានធ្វើការណែនាំដល់ក្រុមហ៊ុន រថយន្តដឹកដី ដឹកខ្សាច់ទាំងអស់ក្នុងមូលខណ្ឌមានជ័យ ធ្វើកិច្ចសន្យា ចូលរួមសហការជាមួយអាជ្ញាធរ រាល់ការខូចខាតផ្លូវ ឬសម្បត្តិរដ្ឋផ្សេងៗ ទទួលរ៉ាប់រងទាំងអស់ ប្រសិនបើមិនអនុវត្តតាមការណែនាំរបស់អាជ្ញាធរទេ ក្រុមហ៊ុននឹងទទួលខុសត្រូវចំពោះមុខច្បាប់ជាធរមាន ៕