ឡានដឹកសត្វមាន់បុកម៉ូតូ ស្លាប់ប្តី ប្រពន្ធរងរបួសធ្ងន់
ត្បូងឃ្មុំ ៖ មានករណីគ្រោះថ្នាក់ចរាចរណ៍មួយ បានកើតឡើង ដោយឡានដឹកសត្វមាន់មួយគ្រឿង បានបុកជាមួយនឹងម៉ូតូមួយគ្រឿង បណ្តាលបុរសខ្មែរឥស្លាមម្នាក់ស្លាប់ និងប្រពន្ធបានរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យ ។ ហេតុការណ៍នេះ បានកើតឡើងនាវេលាម៉ោង១០ព្រឹក ថ្ងៃទី២១ ខែវិច្ឆិកា ឆ្នាំ២០២០ ស្ថិតនៅភូមិទី១ ឃុំស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ ។
សមត្ថកិច្ចបានឲ្យដឹងថា ជនរងគ្រោះមានឈ្មោះ អះម៉ាត់ ស្មាឯល រស់នៅភូមិទ្រាទី៣ ឃុំទ្រា ស្រុកក្រូចឆ្មារ ខេត្តត្បូងឃ្មុំ បានស្លាប់នៅនឹងកន្លែងកើតហេតុ ។ ចំណែកប្រពន្ធឈ្មោះ សា សំ រងរបួសធ្ងន់ ត្រូវបញ្ជូនទៅព្យាបាលនៅមន្ទីរពេទ្យ ។
ក្រោយបង្កហេតុ ជនបង្កជាតៃកុងឡានបានរត់គេចខ្លួន ដោយបន្សល់ទុកឡាន នៅកន្លែងកើតហេតុ ។ សមត្ថកិច្ចកំពុងស្រាវជ្រាវ តាមចាប់ខ្លួនជនបង្កយកមកផ្តន្ទាទោស តាមផ្លូវច្បាប់ ៕
